បញ្ហាគ្រឿងញៀន ទាមទារឲ្យអាជ្ញាធរដុតដៃដុតជើងដោះស្រាយ
ចុះផ្សាយនៅថ្ងៃ៖
ស្តាប់ - ០៤:៣២
កាលពីសប្ដាហ៍មុន សមត្ថកិច្ចទើបតែបង្ក្រាបមេខ្លោងជួញដូរគ្រឿងញៀនទ្រង់ទ្រាយធំមួយរូប និងអ្នកពាក់ព័ន្ធ៥នាក់ទៀត រួមជាមួយនឹងថ្នាំញៀនជាង១សែនគ្រាប់។ នេះ គឺជាជោគជ័យថ្មីមួយទៀតរបស់អាជ្ញាធរកម្ពុជា ក្នុងកិច្ចខិតខំប្រឹងប្រែងបង្ក្រាបគ្រឿងញៀន។ ប៉ុន្តែនៅពីក្រោយជោគជ័យគួរអបអរនេះ វាក៏បានស្ដែងចេញពីទំហំជួញដូរគ្រឿងញៀនដ៏ធំ ដែលកំពុងតែរីករាលដាលគួរឲ្យបារម្ភនៅកម្ពុជា និងដែលទាមទារឲ្យអាជ្ញាធរដុតដៃដុតជើងដោះស្រាយជាចាំបាច់។
សភាពការណ៍គ្រឿងញៀននៅក្នុងតំបន់និងពិភពលោក នៅតែបន្តជះឥទ្ធិពលដល់សន្តិសុខ សណ្ដាប់ធ្នាប់ សុខភាពសាធារណៈ និងភាពក្រីក្ររបស់ប្រជាពលរដ្ឋទូទៅ។ នៅកម្ពុជាក៏ដូចគ្នាដែរ។ បញ្ហាគ្រឿងញៀននៅតែជាបញ្ហាស្មុគស្មាញ និងគួរឲ្យបារម្ភនៅឡើយ។
របាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀនបង្ហាញថា ក្នុងឆ្នាំ២០១៥កន្លងទៅ អាជ្ញាធរបង្ក្រាបបទល្មើសគ្រឿងញៀនបានចំនួនជាង៣ពាន់ករណី កើនឡើង១២៨ភាគរយ បើធៀបនឹងឆ្នាំ២០១៤។ សម្រាប់បទល្មើសទាំងជាង៣ពាន់ករណីនេះ សមត្ថកិច្ចឃាត់ខ្លួនមនុស្សចំនួន៧ពាន់៨នាក់ កើនឡើង១២៣ភាគរយ បើទៀបនឹងឆ្នាំ២០១៤ ដែលមានតែជាង៣ពាន់នាក់តែប៉ុណ្ណោះ។ ចំណែកគ្រឿងញៀនដែលរឹបអូសបានមានចំនួនសរុបប្រមាន១តោន៦រយគីឡូក្រាម រួមមាន មេតំហ្វេតាមីន ហេរ៉ូអ៊ីន កញ្ឆាក្រៀម និងអ៊ិចស្តាស៊ីជាដើម។
គួររំលឹកថា នៅពាក់កណ្ដាលខែមិថុនាឆ្នាំ២០១៥កន្លងទៅ សមត្ថកិច្ចបានបើកប្រតិបត្តិការបង្ក្រាបករណីជួញដូចគ្រឿងញៀនទ្រង់ទ្រាយធំ ឃាត់ខ្លួនមេក្លោងម្នាក់ ព្រមទាំងអ្នកពាក់ព័ន្ធ៣នាក់ផ្សេងទៀត។ ក្រៅពីនោះ សមត្ថកិច្ចក៏បានរឹបអូសគ្រឿងញៀនជិត៥៥គីឡូក្រាម ដែលមានតម្លៃជាទឹកប្រាក់ប្រមាណ៣លានដុល្លារអាមេរិកឯណោះ។ បើតាមសមត្ថកិច្ច នេះគឺជាលើកទីបីហើយ ដែលកម្ពុជាចាប់បានគ្រឿងញៀនក្នុងបរិមាណច្រើនបែបនេះ។
ដោយឡែក កាលពីថ្ងៃទី០៣ខែមីនាឆ្នាំ២០១៦ថ្មីៗនេះ សមត្ថកិច្ចបានបង្ហាញមុខជនសង្ស័យជាមេក្លោងជួញដូរគ្រឿងញៀនទ្រង់ទ្រាយធំម្នាក់ និងអ្នកពាក់ព័ន្ធ៥នាក់ផ្សេងទៀត ដែលជាទណ្ឌិតនៅក្នុងពន្ធនាគារនៅឡើយ។ ទន្ទឹមនឹងការបង្ក្រាបជនល្មើសជួញដូរគ្រឿងញៀននេះ សមត្ថកិច្ចក៏បានរឹបអូសគ្រឿងញៀនជាង១សែនគ្រាប់ផងដែរ។
សមត្ថកិច្ចពាក់ព័ន្ធបានបង្ហាញពីមោទនភាព បន្ទាប់ពីបង្ក្រាបករណីជួញដូរគ្រឿងញៀនទ្រង់ទ្រាយធំជាបន្តបន្ទាប់ដូច្នេះ។ ជាការពិតហើយថា នេះ គឺជាជោគជ័យរបស់អាជ្ញាធរកម្ពុជា ក្នុងកិច្ចខិតខំប្រឹងប្រែងបង្ក្រាបគ្រឿងញៀន។ ប៉ុន្តែនៅពីក្រោយជោគជ័យគួរអបអរនេះ វាក៏បានស្ដែងចេញពីទំហំជួញដូរគ្រឿងញៀនដ៏ធំ ដែលកំពុងតែរីករាលដាលគួរឲ្យបារម្ភនៅកម្ពុជាផងដែរ។ ដោយឡែកយុទ្ធនាការបង្ក្រាបគ្រឿងញៀននោះទៀតសោត ភាគច្រើនមានតែនៅតាមបណ្ដាខេត្តក្នុងប្រទេស។ ចំណែកការបង្ក្រាបករណីគ្រឿងញៀនចូលមកប្រទេសកម្ពុជា ឬចេញទៅក្រៅប្រទេស ហាក់នៅមានកម្រិតនៅឡើយ។
គ្រឿងញៀនបាននាំចូលមកកម្ពុជាតាមបណ្ដាច្រកនៃខេត្តក្នុងភូមិភាគឦសាន តាមកំពង់ផែក្រុងព្រះសីហនុ និងតាមអាកាសយានដ្ឋានអន្ដរជាតិភ្នំពេញ ហើយបន្ទាប់ពីនោះ នឹងត្រូវនាំចេញទៅវិញតាមផ្លូវគោកទៅប្រទេសថៃនិងប្រទេសវៀតណាម តាមអាកាសយានដ្ឋានអន្ដរជាតិភ្នំពេញ និងតាមបញ្ញើប្រៃសនីយ៍ជាដើម។
ការរឹតបន្តឹងសកម្មភាពបង្ក្រាបគ្រឿងញៀននៅតាមច្រកនាំចេញនាំចូលទាំងនេះ ចាត់ទុកថាជារឿងចាំបាច់ និងទាមទារឲ្យចាត់វិធានការជាបន្ទាន់។ ព្រោះប្រសិនបើសកម្មភាពរត់ពន្ធគ្រឿងញៀនឆ្លងប្រទេសជាពិសេសគឺការនាំចូលនៅតែមានច្រើនលើសលប់ នោះការជួញដូរនិងប្រើប្រាស់គ្រឿងញៀននៅក្នុងប្រទេស គឺនៅតែមាន មិនអាចកាត់បន្ថយបានឡើយ។
ជាការកត់សម្គាល់ យុទ្ធនាការបង្ក្រាបគ្រឿងញៀននៅកម្ពុជា ភាគច្រើនលើសលុប គឺជាករណីជួញដូរថ្នាំញៀនតូចតាចតែប៉ុណ្ណោះ។ យូរៗម្ដង ទើបគេបានលឺពីព័ត៌មានបង្ក្រាបគ្រឿងញៀនទ្រង់ទ្រាយធំ នៅកម្ពុជា។ លោក ស ខេង ក៏ធ្លាប់សម្ដែងក្ដីបារម្ភចំពោះបញ្ហានេះ និងបានអំពាវនាវឲ្យនគរបាលកម្ពុជាទូទាំងប្រទេស ផ្ដោតការខិតខំប្រឹងប្រែងបន្ថែមទៀត ដើម្បីស្វែងរកចាប់ខ្លួនមេខ្លោងជួញដូរគ្រឿងញៀនធំៗ។
ចំពោះមុខបញ្ហាគ្រឿងញៀនដែលរីកធំធាត់ឡើងដូចសព្វថ្ងៃនេះ វិធានការជាក់លាក់ដើម្បីដោះស្រាយគួរតែត្រូវបានដាក់ចេញជាបន្ទាន់ និងជាដាច់ខាត។ ជាពិសេស គឺការរឹតបន្តឹងសកម្មភាពបង្ក្រាបគ្រឿងញៀននៅតាមច្រកនាំចេញនាំចូលនៃប្រទេសកម្ពុជា។ ការស៊ើបអង្កេតប្រមូលភស្តុតាងដើម្បីឈានទៅចាប់មេខ្លោងជួញដូរគ្រឿងញៀន ក៏ជារឿងចាំបាច់ ដែលគួរតែត្រូវបានលើកទឹកចិត្តផងដែរ។
ចំណែកការបង្ក្រាបគ្រឿងញៀននៅក្នុងប្រទេសជាលក្ខណៈតូចតាច ឬធំដុំក៏ដោយ គឺជារឿងល្អ ដែលសុទ្ធតែបង្ហាញពីភាពជោគជ័យគួរឲ្យអបអរ។ ក៏ប៉ុន្តែ នៅពីក្រោយជោគជ័យនេះ ស្ថាប័នពាក់ព័ន្ធទាំងអស់ ក៏ត្រូវព្រួយចិត្តខ្លះដែរ អំពីទំហំនៃការរីករាលដាលរបស់គ្រឿងញៀននៅកម្ពុជា។ មានការងារច្រើនណាស់ ដែលកម្ពុជាចាំបាច់ត្រូវធ្វើ ដើម្បីបញ្ចៀសកុំឲ្យបញ្ហាគ្រឿងញៀន ក្លាយទៅជាសង្គ្រាមថ្មីមួយទៀតសម្រាប់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ