អនុក្រឹត្យស្តីពីការគ្រប់គ្រងទ្រព្យសម្បត្តិអ្នកទោសគ្រឿងញៀន អាចមានប្រសិទ្ធភាពនៅឆ្នាំ ២០១៦នេះ
ក្រោយពីលោកឧបនាយករដ្ឋមន្ត្រីស ខេង រដ្ឋមន្ត្រីក្រសួងមហាផ្ទៃ បានប្រកាសតឿន ឱ្យក្រសួងសេដ្ឋកិច្ច និងហិរញ្ញវត្ថុ ពន្លឿនសេចក្តីព្រាងអនុក្រឹត្យ ស្តីពីមូលនិធិជាតិប្រយុទ្ធប្រឆាំងគ្រឿងញៀន, នៅព្រឹកថ្ងៃទី ៩កុម្ភៈ នេះ មន្ត្រីអាជ្ញាធរជាតិប្រយុទ្ធប្រឆាំងគ្រឿងញៀននៃក្រសួងមហាផ្ទៃ បានឲ្យដឹងថា អនុក្រឹត្យនេះ នឹងអាចសម្រេចបាន ក្នុងឆ្នាំ ២០១៦នេះតែម្តង។ អនុក្រឹត្យនេះ ត្រូវបានក្រសួងមហាផ្ទៃ បញ្ជាក់ថា គឺដើម្បីគ្រប់គ្រង និងប្រើប្រាស់ទ្រព្យសម្បត្តិរបស់អ្នកទោសជួញដូរគ្រឿងញៀន។ តាមមន្ត្រីដដែល អនុក្រឹត្យនេះ បានព្រាងចប់សព្វគ្រប់ហើយ នៅចាំតែក្រសួងសេដ្ឋកិច្ច និងហិរញ្ញវត្ថុ ពិនិត្យ និងផ្តល់យោបល់ចុងក្រោយ តែប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
លោកនាក់ យុទ្ធា អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀនក្រសួងមហាផ្ទៃ បានប្រាប់វិទ្យុបារាំងថា សេចក្តីព្រាងអនុក្រឹត្យស្តីពីមូលនិធិជាតិប្រយុទ្ធប្រឆាំងគ្រឿងញៀន អាចនឹងសម្រេចឲ្យអនុវត្តបាន ក្នុងឆ្នាំ២០១៦នេះតែម្តង។
ខ្លឹមសារនេះ ត្រូវបានបង្ហើបឲ្យដឹង បន្ទាប់ពីលោកឧបនាយករដ្ឋមន្ត្រីស ខេង រដ្ឋមន្ត្រីក្រសួងមហាផ្ទៃ ជាថ្មីម្តងទៀត នៅក្នុងសន្និបាតបូកសរុបលទ្ធផលការងារត្រួតពិនិត្យគ្រឿងញៀន ឆ្នាំ ២០១៥ និងទិសដៅការងារឆ្នាំ ២០១៦ កាលពីដើមខែនេះ បានតឿន ដល់ក្រសួងសេដ្ឋកិច្ច និងហិរញ្ញវត្ថុ ឲ្យពន្លឿនការងារនេះ ឲ្យបានកាន់តែឆាប់រហ័ស ព្រោះថាសេចក្តីព្រាងអនុក្រឹត្យនេះ បានធ្វើរួចជាយូរមកហើយ។ តាមលោករដ្ឋមន្ត្រី ភាពយឺតយ៉ាវនៃការធ្វើអនុក្រឹត្យនេះ គឺប្រៀបដូចជាការរាំងខ្ទប់ដំណើរការបង្ក្រាបគ្រឿងញៀន។
រីឯលោកនាក់ យុទ្ធា ការពិត ឲ្យដឹងថាសេចក្តីព្រាងអនុក្រឹត្យនេះ ត្រូវបានអាជ្ញាធរជាតិប្រយុទ្ធប្រឆាំងគ្រឿងញៀន និងក្រសួងយុត្តិធម៌ ពិភាក្សាគ្នា និងបញ្ជូនទៅកាន់ក្រសួងសេដ្ឋកិច្ច តាំងពីយូរមកហើយ ប៉ុន្តែមិនដឹងថា តើក្រសួងសេដ្ឋកិច្ច នៅមានភាពប្រទាំងប្រទើសអ្វីផ្សេងនោះទេ។ តែលោកជឿថា អនុក្រឹត្យនេះ អាចសម្រេចបានក្នុងឆ្នាំនេះ ដោយសារតែការពន្លឿនរបស់លោកស ខេង តាំងពីឆ្នាំ ២០១៥មក។
លោកនាក់ យុទ្ធា បានបន្ថែមថា ពេលនេះប្រហែលជាអនុក្រឹត្យនេះ បានឆ្លងទៅដល់ខុទ្ទកាល័យលោកនាយករដ្ឋមន្ត្រីផងក៏មិនដឹង។ យ៉ាងណាក៏ដោយ វិទ្យុបារាំងអន្តរជាតិ មិនអាចទាក់ទងសុំការបំភ្លឺបន្ថែមពីខាងក្រសួងសេដ្ឋកិច្ចបានទេ នៅព្រឹកថ្ងៃទី៩កុម្ភៈ។
កន្លងមកក្រសួងមហាផ្ទៃ និងក្រសួងសេដ្ឋកិច្ច បានទាស់គំនិតគ្នាបន្តិចបន្តួច ក្នុងសេចក្តីព្រាងអនុក្រឹត្យនេះ ដោយសារក្រសួងមហាផ្ទៃ ចង់ប្រមូលចាត់ចែងទ្រព្យសម្បត្តិទាំងឡាយណា ដែលតុលាការរកឃើញ ថាពាក់ព័ន្ធនឹងជំនួញគ្រឿងញៀន យកទៅលក់ និងប្រើប្រាស់ ក្នុងការងារប្រយុទ្ធប្រឆាំងគ្រឿងញៀន។ ប៉ុន្តែក្រសួងសេដ្ឋកិច្ច ចង់យកទ្រព្យសម្បត្តិទាំងនោះ ទៅលក់ ហើយបង្វែរចូលថវិកាជាតិសិន ទើបកាត់ថវិកានោះ ចូលមកអាជ្ញាធរជាតិប្រយុទ្ធប្រឆាំងគ្រឿងញៀនតាមក្រោយ។
សូមបញ្ជាក់ថា អនុក្រឹត្យស្តីពីមូលនិធិជាតិប្រយុទ្ធប្រឆាំងគ្រឿងញៀន ឬហៅថាអនុក្រឹត្យគ្រប់គ្រងទ្រព្យសម្បត្តិអ្នកជួញដូរគ្រឿងញៀននេះ បង្កើតឡើងក្នុងគោលដៅយកទ្រព្យសម្បត្តិរបស់អ្នកទោសជួញដូរគ្រឿងញៀន ទៅប្រើប្រាស់ដើម្បីបម្រើផលប្រយោជន៍ជាតិ។ ប៉ុន្តែបើតាមលោកនាក់ យុទ្ធា ទោះបីជាអនុក្រឹត្យនេះ ត្រូវបានសម្រេចក៏ដោយ ក៏មិនទាន់អាចយកទ្រព្យសម្បត្តិទាំងនោះ ទៅប្រើប្រាស់បាននោះទេ ព្រោះនៅមាននិតិវិធីផ្សេងទៀត លុះណាមានសាលដីកាសម្រេចជាស្ថាពររបស់តុលាការ។ យ៉ាងណាក៏ដោយ ក្នុងសន្និបាតគ្រឿងញៀន ក្រសួងមហាផ្ទៃ ចង់ធ្វើវិសោធនកម្មច្បាប់គ្រឿងញៀន ដើម្បីបង្រួបនីតិវិធីនៃអនុក្រឹត្យនោះ ឲ្យខ្លី ឲ្យងាយស្រួល ក្នុងការចាត់ចែងទ្រព្យសម្បត្តិអ្នកទោសឲ្យបានឆាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ