ឆ្នាំ២០១៩៖ កម្ពុជារឹបអូសសាច់ប្រាក់នាំចូលខុសច្បាប់ជាង១០លានដុល្លារពីជនបរទេស
កាលពីល្ងាចម្សិលមិញ មន្រ្តីគយ នៅព្រលានយន្ដហោះអន្ដរជាតិភ្នំពេញ បានចាប់ខ្លួនជនជាតិចិន៣នាក់ ដោយសារនាំលុយចូលចំនួន៩០ម៉ឺនដុល្លារ ដោយគ្មានប្រភពច្បាស់លាស់។ នេះជាករណីរឹបអូសសាច់ប្រាក់នាំចូលខុសច្បាប់ផ្ទួនៗគ្នា បន្ទាប់ពីចាប់ខ្លួនជនជាតិកូរ៉េ២នាក់ ជាមួយនឹងប្រាក់ជាង២លានដុល្លារនៅព្រលានយន្តហោះខេត្តសៀមរាបកាលពីថ្ងៃទី៧ខែកក្កដា។ ជាតុល្យការធ្វើឲ្យចំនួនទឹកប្រាក់ដែលរឹបអូសបានកើនឡើងដល់ជាង១០លានដុល្លារអាមេរិក ក្នុងការបង្រ្កាបការនាំចូលលុយខុសច្បាប់នៅពាក់កណ្តាលឆ្នាំនេះ។
ចុះផ្សាយនៅថ្ងៃ៖
ស្តាប់ - ០២:១៣
ជនជាតិចិន៣នាក់ដែលសមត្ថកិច្ចកម្ពុជាចាប់ខ្លួនជាមួយទឹកប្រាក់៩០ម៉ឺនដុល្លារនៅល្ងាចថ្ងៃទី០៩កក្កដាគឺមានឈ្មោះ Huang Canming អាយុ២៧ឆ្នាំ ឈ្មោះ Yang Yongwei អាយុ២៦ឆ្នាំ។ អ្នកទាំងពីរធ្វើដំណើរចេញពីទីក្រុងហុងកុង ប្រទេសចិន មកអាកាសយានដ្ឋានអន្ដរជាតិភ្នំពេញ ខណៈឈ្មោះ Zizheng Zheng អាយុ៣២ឆ្នាំ ជាអ្នកមកចាំទទួលនៅភ្នំពេញ។
ប្រាក់ដែលជនសង្ស័យ ដាក់ក្នុងកាបូបយួរដៃចំនួន៣ គឺមានចំនួន ៩០ម៉ឺនដុល្លារ ដោយមន្ដ្រីគយ និងរដ្ឋាករ បញ្ជាក់ថា ជាប្រាក់ដែលមិនមានប្រភពច្បាស់លាស់។
សូមបញ្ជាក់ថា នៅថ្ងៃទី០៧ ខែកក្កដា សមត្ថកិច្ចកម្ពុជានៅព្រលានយន្ដហោះខេត្តសៀមរាប ក៏បានចាប់ខ្លួនជនជាតិកូរ៉េ២នាក់ ជាមួយទឹកប្រាក់ជាង២លានដុល្លារ មកពីទីក្រុងហុងកុងផងដែរ។
លើសពីនេះទៀត កាលពីខែមេសា ឆ្នាំ២០១៩នេះ តុលាការកម្ពុជាបានសម្រេចចោទប្រកាន់ជនជាតិចិន៣នាក់ពាក់ព័ន្ធនាំលុយជាង ៣លាន៥សែនដុល្លារ ដោយគ្មានប្រភពច្បាស់លាស់ ពីទីក្រុងហុងកុង ក្រោមបទចោទ លាងសម្អាតប្រាក់ និងប្រឆាំងហិរញ្ញទាន។ ក្រោយមក នៅថ្ងៃទី០១ ខែមិថុនាឆ្នាំ២០១៩ដដែល តុលាការកម្ពុជាក៏បានឃុំខ្លួនបុរសជនជាតិចិនម្នាក់ ជាប់ពាក់ព័ន្ធករណីដឹកលុយជាង៨៥ម៉ឺនដុល្លារអាមេរិក ពីទីក្រុងហុងកុងចូលកម្ពុជាដោយខុសច្បាប់។
យោងតាមអគ្គនាយកដ្ឋានអន្តោប្រវេសន៍ ក្នុងឆមាសទី ១ ឆ្នាំ ២០១៩នេះ អាជ្ញាធរកម្ពុជា បានឃាត់ខ្លួន និងបង្ក្រាបការនាំចូលសាច់ប្រាក់ផ្ទាល់តាមព្រលានយន្តហោះ ប្រមាណជាង៤លានដុល្លារ។ ក្រៅពីនេះ ទឹកប្រាក់ជិត ១០លានដុល្លារ ត្រូវបានរកឃើញថា ជាលុយកខ្វក់ តាមរយៈលំហូរចេញចូលនៃបច្ចេកវិទ្យា ឬ តាមរយៈធនាគារ។
ផ្អែកលើករណីទាំងអស់នេះ នាំឲ្យមានសំណួរចោទឡើងថា តើចិនកំពុងតែរំដោះលុយរបស់ខ្លួនចេញពីទូដែកនៅហុងកុងចូលមកកម្ពុជាឬយ៉ាងណា ខណៈទីក្រុងហុងកុងនឹងដូរទៅតំបន់មួយដែលមានប្រព័ន្ធគ្រប់គ្រងតែមួយនៅឆ្នាំ២០៤៧នោះ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ