ក្រសួងកសិកម្មដាក់វិធានការបន្ទាន់ ទប់ស្កាត់ការឆ្លងជំងឺប៉េស្តជ្រូកអាហ្រ្វិក
ក្រសួងកសិកម្មកម្ពុជា កាលពីថ្ងៃម្សិលមិញ បានដាក់ចេញវិធានការបន្ទាន់មួយ ដើម្បីត្រួតពិនិត្យ និងទប់ស្កាត់ការឆ្លងរាលដាលជំងឺប៉េស្តជ្រូកអាហ្វ្រិក។ វិធានការបន្ទាន់នេះ ធ្វើឡើង បន្ទាប់ពីជំងឺនេះត្រូវបានរកឃើញនៅក្នុងខេត្ត២ នៅភាគអាគ្នេយ៍នៃទីក្រុងហាណូយប្រទេសវៀតណាម និងខេត្តចំនួន២៥ទៀតក្នុងប្រទេសចិន។
ចុះផ្សាយនៅថ្ងៃ៖
ជំងឺប៉េស្តជ្រូកអាហ្រ្វិក (African Swine Fever) ជាជំងឺឆ្លងដ៏កាចសាហាវពិបាកលុបបំបាត់បំផុត និងបង្កឲ្យសត្វឈឺនិងងាប់ក្នុងអត្រាខ្ពស់ ហើយមេរោគបង្កជំងឺជាវីរុសមិនទាន់មានវ៉ាក់សាំងការពារ ដោយអាចរស់នៅបានយូរក្នុងសាច់ និងផលិតផលសាច់ជ្រូក ទោះបីមិនបង្កគ្រោះថ្នាក់ដល់មនុស្សក៏ដោយ។ នេះបើតាមការបញ្ជាក់របស់ក្រសួងកសិកម្ម កាលពីថ្ងៃទី២១ ខែកុម្ភៈ។
ឆ្លើយតបនឹងជំងឺនេះ ក្រសួងកសិកម្មកម្ពុជាបានដាក់ចេញវិធានការបន្ទាន់ចំនួន៧ ដើម្បីបង្ការ និងទប់ស្កាត់ការឆ្លងរាលដាលជំងឺប៉េស្តជ្រូកអាហ្វ្រិកនេះចូលមកក្នុងប្រទេសកម្ពុជា។ វិធានការទាំង៧នោះ រួមមានៈ ធ្វើការតាមដានស្រាវជ្រាវយ៉ាងហ្មត់ចត់លើសុខភាពសត្វជ្រូកនៅទូទាំងប្រទេស, ទប់ស្កាត់ការនាំចូលជ្រូករស់ និងផលិតផលជ្រូកគ្រប់ប្រភេទ ដែលខុសច្បាប់នៅតាមច្រកព្រំដែន, ត្រូវមានវិញ្ញាបនបត្រអនាម័យពីប្រទេសនាំចេញ, ត្រូវសហការជាមួយភាគីវៀតណាមដើម្បីផ្លាស់ប្តូរព័ត៌មាន, អប់រំណែនាំដល់ប្រជាពលរដ្ឋ និងភ្នាក់ងារសុខភាពសត្វភូមិ អ្នកចិញ្ចឹមជ្រូកគ្រប់កម្រិត, បន្តផ្សព្វផ្សាយដល់ប្រជាជន និងអ្នកចិញ្ចឹមជ្រូកពីផលប៉ះពាល់។
លោកឧកញ៉ា ម៉ុង ឫទ្ធី អ្នកជំនួញផ្នែកសិកម្ម តាមរយៈបណ្តាញសង្គមហ្វេសប៊ុកបានអំពាវនាវដល់ប្រជាកសិករ ដែលប្រកបមុខរបរចិញ្ចឹមជ្រូកទាំងអស់ ចូលរួមបង្ការហានិភ័យនេះ ដោយបង្កើនការប្រុងប្រយ័ត្នលើជីវសុវត្ថិភាពឲ្យបានខ្ពស់បំផុត។ លោកបញ្ជាក់ថា បើមានករណីនេះកើតឡើងនៅតំបន់ណា សូមកុំលាក់ពត៌មាន និងត្រូវតែយកសត្វនោះទៅកប់ចោល និងកុំយកទៅលក់នៅលើទីផ្សារអោយសោះនាំអោយមានបញ្ហាដល់សុខភាពមនុស្ស។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានថ្លែងប្រាប់វិទ្យុបារាំងអន្តរជាតិថា លោកគាំទ្រចំពោះវិធានការរបស់ក្រសួងកសិកម្មនាពេលនេះ។ លោក ស្រ៊ុន ពៅ បន្ថែមថា ការនាំចូលជ្រូកពីវៀតណាមគឺមិនមានអ្វីត្រូវព្រួយបារម្ភនោះទេ ដោយសារតែមានពេទ្យសត្វនៃប្រទេសទាំងពីរបានធានា ក៏ប៉ុន្តែអ្វីដែលសមាគមអ្នកចិញ្ចឹមសត្វព្រួយបារម្ភនោះ គឺការនាំចូលជ្រូកតាមច្រករបៀង ដែលមិនមានការត្រួតពិនិត្យត្រឹមត្រូវ ហើយអាចចម្លងជំងឺប៉េស្តជ្រូកនេះ ចូលមកក្នុងប្រទេសកម្ពុជាបាន។
យោងតាមអង្គការសុខភាពសត្វពិភពលោក គិតចាប់ពីខែសីហា ឆ្នាំ២០១៨ រហូតមកដល់ ថ្ងៃទី១៧ ខែកុម្ភៈ ឆ្នាំ២០១៩នេះ ជំងឺប៉េស្តជ្រូក បានផ្ទុះឡើងប្រមាណ១០០ករណីក្នុងខេត្តចំនួន២៥របស់ចិន ហើយជ្រូកប្រមាណជិត១លានក្បាលត្រូវបានសម្លាប់។ បើតាមសារព័ត៌មានវៀតណាមចុះផ្សាយ កាលពីថ្ងៃទី២១ ខែកុម្ភៈ ជំងឺប៉េស្តជ្រូកអាហ្វ្រិក ត្រូវបានរកឃើញនៅក្នុងកសិដ្ឋាននៃខេត្តចំនួនពីរ ២ ដែលស្ថិតនៅភាគអាគ្នេយ៍នៃទីក្រុងហាណូយប្រទេសវៀតណាម គឺខេត្តហ៊ុងយេន និងថៃប៊ិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ