ផ្លូវរថភ្លើងទៅកាន់ព្រលានយន្តហោះជាលើកដំបូង ត្រូវបានដាក់ឲ្យដំណើរការជាបណ្តោះអាសន្ន
អាជ្ញាធរកម្ពុជា និងក្រុមហ៊ុនឯកជន Royal Railway នៅថ្ងៃអង្គារនេះបានដាក់ឲ្យដំណើរការជាបណ្តោះអាសន្ននូវកំណាត់ផ្លូវរថភ្លើងនិងការដឹកជញ្ជូនអ្នកដំណើរពីរាជាយស្ម័យាន ឆ្ពោះទៅកាន់ព្រលានយន្តហោះអន្តរជាតិភ្នំពេញជាលើកដំបូង។ កំណាត់ផ្លូវរថភ្លើងដែលមានប្រវែងជាង ៩ គីឡូម៉ែត្រ គឺជាមុខមាត់ថ្មីមួយ របស់ទីក្រុងភ្នំពេញ ដើម្បីបញ្ចៀសការកកស្ទះចរាចរណ៍។ នេះបើតាមអាជ្ញាធរនៃវិស័យដឹកជញ្ជូន។
ចុះផ្សាយនៅថ្ងៃ៖
ស្តាប់ - ០២:២៥
កំណាត់ផ្លូវរថភ្លើងថ្មីនេះ មានប្រវែងសរុប ៩៦១៣ ម៉ែត្រ ត្រូវបានសម្ពោធដាក់ឲ្យដំណើរការជាបណ្តោះអាសន្ន ចាប់ពីថ្ងៃទី ១០ ខែមេសា នេះរហូតដល់ថ្ងៃទី ១ ខែសីហា ឆ្នាំ២០១៨ ដោយមិនគិតថ្លៃនោះទេ។ នេះបើតាមលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន ដែលបានថ្លែងនៅក្នុងពិធីដាក់ឲ្យដំណើរការកំណាត់ផ្លូវរថភ្លើងជាបណ្តោះអាសន្ន កាលពីព្រឹកថ្ងៃអង្គារនេះ ដែលមានការចូលរួមពីលោក ឧកញ៉ា គិត ម៉េង ប្រធានក្រុមហ៊ុន Royal Group និងជាម្ចាស់ភាគហ៊ុនក្រុមហ៊ុនដឹកជញ្ជូនផ្លូវដែក Royal Railwayនេះ។
បើតាមសេចក្តីរាយការណ៍ ផ្លូវដែកនេះ ត្រូវបានរៀបចំឡើងជាប្រភេទ Tramway ដែលគេបង្កប់ផ្លូវដែកទៅក្នុងផ្លូវថ្នល់ ដែលអាចអនុញ្ញាតអោយយានយន្តនិងយានផ្សេងៗ អាចធ្វើដំណើរឆ្លងកាត់បាន ដោយមិនមានការព្រួយបារម្ភនោះទេ។ សេវាដឹកជញ្ជូនតាមរថភ្លើងនេះ ចេញដំណើររៀងរាល់៣០នាទី ដោយប្រើប្រាស់ថេរៈវេលាប្រមាណ ២២-២៥នាទី ពីស្ថានីយយស្ម័យានរាជធានីភ្នំពេញទៅកាន់អាកាសយានដ្ឋានអន្តរជាតិភ្នំពេញ ដោយឆ្លងកាត់កំណាត់ផ្លូវសហព័ន្ធរុស្សី ចូលអាកាសយានដ្ឋានអន្តរជាតិភ្នំពេញតែម្តង។
សម្រាប់រដ្ឋាភិបាល ការដាក់អោយដំណើរការផ្លូវរថភ្លើងនៅពេលនេះ គឺដើម្បីផ្តល់ជម្រើសក្នុងការធ្វើដំណើរជូនប្រជាពលរដ្ឋ កាត់បន្ថយការចំណាយថវិកា ពេលវេលា សុវត្ថិភាព គ្មានការរំខាន ព្រមទាំងរួមចំណែកកាត់បន្ថយការកកស្ទះ និងគ្រោះថ្នាក់ចរាចរណ៍ក្នុងរាជធានីភ្នំពេញ។ ក្នុងដំណាក់កាលដំបូងនេះ គេនឹងប្រើប្រាស់រថភ្លើងចំនួន២គ្រឿង ដែលមានស្រាប់ សម្រាប់ការផ្តល់សេវាដឹកជញ្ជូនអ្នកដំណើរទៅមក ខណៈរងចាំក្បាលរថភ្លើងថ្មីចំនួន០៣គ្រឿងទៀត ដែលបានបញ្ជាទិញមកពីប្រទេសម៉ិចស៊ីក។
គួររំលឹកជូនថា កាលពីថ្ងៃទី ៤ មេសាកន្លងទៅ រដ្ឋាភិបាលកម្ពុជា ក៏បានដាក់ឲ្យដំណើរការជាបណ្ដោះអាសន្ននូវកំណាត់ផ្លូវរថភ្លើងពីក្រុងប៉ោយប៉ែត-សិរីសោភ័ណ ក្នុងខេត្តបន្ទាយមានជ័យ ដោយឥតគិតថ្លៃផងដែរ ចាប់តាំងពី ថ្ងៃទី៤ មេសា ដល់ថ្ងៃទី ១ សីហា ឆ្នាំ២០១៨ បន្ទាប់ពីបោះបង់ចោលអស់រយៈពេលជាង៤៥ឆ្នាំដោយសារតែភ្លើងសង្គ្រាម។ ការស្តាឡើងវិញនូវកំណាត់ផ្លូវរថភ្លើងជាបន្តបន្ទាប់នេះ គឺជាផែនការរបស់រដ្ឋាភិបាលកម្ពុជា ក្នុងការកាត់បន្ថយការកកស្ទះចរាចរណ៍នៅក្នុងទីក្រុងភ្នំពេញ តាមរយៈការផ្តល់ជម្រើសកាន់តែច្រើនឡើង លើមធ្យោបាយធ្វើដំណើរសាធារណៈ តួយ៉ាង ការធ្វើដំណើរតាមផ្លូវទឹក និងប្រព័ន្ធដឹកជញ្ជូនរថយន្តក្រុងសាធារណៈជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ