រយៈពេល១១ខែឆ្នាំ២០១៧ ការនាំចេញទៅអាមេរិកមានការកើនឡើង
ការនាំចេញរបស់កម្ពុជាទៅកាន់ទីផ្សារអាមេរិកក្នុងរយៈពេល១១ខែដើមឆ្នាំ២០១៧នេះ មានទំហំជាទឹកប្រាក់ប្រមាណ២,៨២៦លានដុល្លារ។ ការនាំចេញនេះមានការកើនឡើងប្រៀបធៀបរយៈពេល១១ខែដូចគ្នា កាលពីឆ្នាំ២០១៦។ នេះបើតាមទិន្នន័យពាណិជ្ជកម្មរបស់រដ្ឋាភិបាលអាមេរិក។
ចុះផ្សាយនៅថ្ងៃ៖
ស្តាប់ - ០២:៤២
ទិន្នន័យពីគេហទំព័រការិយាល័យជំរឿនរបស់សហរដ្ឋអាមេរិក បានបង្ហាញថាការនាំចូលទំនិញពីកម្ពុជាក្នុងរយៈពេល១១ខែនៃឆ្នាំ២០១៧ មានទំហំជាទឹកប្រាក់ប្រមាណ ២ ៨២៦លានដុល្លារអាមេរិក កើនឡើងប្រហែល៧ភាគរយ បើធៀបនឹងរយៈពេល១១ខែដូចគ្នា កាលពីឆ្នាំ២០១៦ ដែលមានទំហំប្រមាណ២ ៦៣៣លានដុល្លារអាមេរិក។ ចំពោះការនាំចេញពីសហរដ្ឋអាមេរិក ចូលក្នុងប្រទេសកម្ពុជាមានការកើនឡើងពី៣៣៤លានដុល្លារក្នុងរយៈពេល១១ខែនៃឆ្នាំ២០១៦ មក៣៦១លានដុល្លារអាមេរិកក្នុងរយៈពេល១១ខែនៃឆ្នាំ២០១៧នេះ។
លោក តេង ឌឺលុច សាស្ត្រាចារ្យផ្នែកវិទ្យាសាស្ត្រសេដ្ឋកិច្ចលើកឡើងថាលោកមិនសូវប្រាកដប៉ុន្មានទេចំពោះទិន្នន័យនៃការកើនឡើងនេះ។ ប៉ុន្តែលោកបន្ថែមថា ការកើនឡើងនេះអាស្រ័យលើការប្រែប្រួលលើតម្លៃនៃការនាំចេញ ឬការប្រែប្រួលនៃបរិមាណនៃការនាំចេញ។
សាស្ត្រាចារ្យផ្នែកវិទ្យាសាស្ត្រសេដ្ឋកិច្ចរូបនេះឲ្យដឹងទៀតថា ២ ឬ៣ឆ្នាំកន្លងមកនេះការនាំចេញទំនិញពីកម្ពុជាទៅអាមេរិក ស្ថិតក្នុងរង្វង់២ ទៅ៣ពាន់លានដុល្លារអាមេរិក ពោលគឺមិនមានការប្រែប្រួលនោះទេ។ លោកបន្ថែមថាអ្វី ដែលគួរកត់សម្គាល់គឺការនាំចេញពីកម្ពុជាទៅទីផ្សារអឺរ៉ុបទៅវិញទេ ដែលមានការកើនឡើងពីមួយឆ្នាំទៅមួយឆ្នាំ។
ក្រសួងពាណិជ្ជកម្មកម្ពុជាមិនអាចទាក់ទងបានទេនៅថ្ងៃនេះ។ ប៉ុន្តែក្រសួងនេះធ្លាប់បានប្រាប់វិទ្យុបារាំងអន្តរជាតិថា បច្ចុប្បន្នការនាំចេញរបស់កម្ពុជាទៅកាន់ទីផ្សារសហរដ្ឋអាមេរិកភាគច្រើនគឺជាសម្លៀកបំពាក់ ស្បែកជើង កាបូបជាដើម។ នេះបើតាមអគ្គនាយករងពាណិជ្ជកម្មអន្តរជាតិនៃក្រសួងពាណិជ្ជកម្មកម្ពុជា។
ជាការកត់សម្គាល់ ទំហំពាណិជ្ជកម្មនៃប្រទេសទាំងពីរ មានការកើនឡើង ក្នុងពេលបញ្ហានយោបាយក្នុងប្រទេសកម្ពុជាបានរុញច្រានឲ្យទំនាក់ទំនង នៃប្រទេសទាំងពីរនេះមានភាពល្អក់កករ។ មន្ត្រីគណបក្សប្រឆាំង ដែលត្រូវបានតុលាការរំលាយបានស្នើឲ្យអាមេរិក ឬសហភាពអឺរ៉ុបចាត់វិធានការដាក់ទណ្ឌកម្មផ្សេងៗលើរដ្ឋាភិបាលកម្ពុជា។
កាលពីថ្ងៃទី៤ខែធ្នូ លិខិតមួយ ដែលត្រូវបានគេផ្សព្វផ្សាយ និងចាត់ទុកថាជាលិខិតរបស់ក្រសួងពាណិជ្ជកម្ម ជម្រាបមកលោកនាយករដ្ឋមន្ត្រីហ៊ុន សែន ឲ្យដឹងថាទឹកប្រាក់នៃការនាំចេញសរុបក្នុងឆ្នាំ២០១៦ទៅកាន់សហរដ្ឋអាមេរិកមានទំហំប្រមាណ២ ៩១៦លានដុល្លារអាមេរិក។
ក្នុងលិខិតដែលនោះ ក្រសួងពាណិជ្ជកម្មកម្ពុជាបានស្នើសុំលោកនាយករដ្ឋមន្ត្រី ពិចារណារឿងបញ្ចុះបញ្ចូលសមាជិកសហភាពអឺរ៉ុប ដើម្បីទប់ស្កាត់ការសម្រេចព្យួរសម្បទានពន្ធគយលើគ្រប់មុខទំនិញ ដោយសភាអឺរ៉ុបជាយថាហេតុ ។
ប៉ុន្តែលិខិតនោះ មិនបានលើកឡើងពីការស្នើឲ្យបញ្ចុះបញ្ចូលសហរដ្ឋអាមេរិកនោះទេ ដោយលិខិតនោះក្រសួងពាណិជ្ជកម្មបញ្ជាក់ថាសហរដ្ឋអាមេរិកមិនបានផ្តល់ភាពអនុគ្រោះពន្ធគ្រប់មុខដូចសហភាពអឺរ៉ុបឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ