អង្គការសង្គមស៊ីវិលស្នើអោយមានការពន្លឿនការចុះបញ្ជីដីធ្លីសមូហភាពជនជាតិដើមភាគតិច
តាមរយៈសិក្ខាសាលាថ្នាក់ជាតិស្ដីពី ការចុះបញ្ជីដីជាលក្ខណៈប្រព័ន្ធ និងការចុះបញ្ជីដីសមូហភាពសហគមន៏ជនជាតិដើមភាគតិច នៅថ្ងៃទី ១៩ កក្កដាឆ្នាំ ២០១៦នេះ អង្គការសង្គមស៊ីវិល និងសហគមន៏ជនជាតិភាគតិចបានទទូចចង់អោយមានការពន្លឿនក្នុងការ ចុះបញ្ជីដីសមូហភាពសហគមន៏ជនជាតិដើមភាគតិចអោយបានឆាប់រហ័ស។ ការពន្លឿនក្នុងដំណើរការចុះបញ្ជីដី សមូហភាពសហគមន៏ជនជាតិដើមភាគតិចនេះ នឹងផ្ដល់ផលប្រយោជន៏ជាច្រើនដល់ពួកគេទាំងនោះក្នុងការរស់នៅសព្វថ្ងៃ។ អត្តបទដោយ គីម ហុក
ចុះផ្សាយនៅថ្ងៃ៖
ស្តាប់ - ០១:៤០
លោក តឹក វណ្ណារ៉ា នាយកប្រតិបត្តិ វេទិកានៃអង្គការមិនមែនរដ្ឋាភិបាល ស្ដីពីកម្ពុជា បានបញ្ជាក់ថាដំណើរការនៃការចុះបញ្ជីដីសមូហភាពសហគមន៏ជនជាតិដើមភាគតិចនៅកម្ពុជាមានភាពយឺតយ៉ាវដែលជាហេតុធ្វើអោយមានការទទូចយ៉ាងខ្លាំងពីសំណាក់ សហគមន៏ជនជាតិដើមភាគតិច និងអង្គការសង្គមស៊ីវិលអោយមានការចុះបញ្ជីដីសមូលសហភាពសហគមន៏ជនជាតិដើមភាគតិចអោយបានឆាប់រហ័ស។
លោកបានបន្តថាការពន្លឿនក្នុងដំណើរការចុះបញ្ជីដី សមូហភាពសហគមន៏ជនជាតិដើមភាគតិចនេះ នឹងផ្ដល់ផលប្រយោជន៏ជាច្រើនដល់ពួកគេនៅក្នុងជីវភាពរស់នៅសព្វថ្ងៃ។
ម៉្យាងទៀតវាអាចធ្វើអោយពួកគេមានភាពងាយស្រួល ក្នុងការគ្រប់គ្រង ប្រើប្រាស់ដើម្បីអភិវឌ្ឍន៏ជីវភាពគ្រួសារ និងសហគមន៏របស់ពួកគេ ហើយអ្វីដែលកាន់តែសំខាន់នោះគឺថា វាអាចបញ្ជៀសជម្លោះរវាង សហគមន៏ជនជាតិដើមភាគតិចនិងក្រុមហ៊ុនអភិវឌ្ឍន៏ផងដែរ។
ខណៈពេលបញ្ហាដីសមូហភាពសហគមន៏ជនជាតិដើមភាគតិច កំពុងរងសម្ពាធពីក្រុមហ៊ុនអភិវឌ្ឍន៏មួយចំនួននោះ លោក តឹក វណ្ណារ៉ា បានលើកឡើងថា រដ្ឋាភិបាលគួរតែពិចារណាឡើងវិញទៅលើដំណើរការនៃ ការចុះបញ្ជីដីធ្លីនេះ។ ដោយគាត់បានលើកឡើងថា រដ្ឋាភិបាលគួរតែ ពង្រួញនិតិវិធីក្នុងការចុះបញ្ជីដីធ្លី អោយមានរយៈពេលខ្លី ដើម្បីធ្វើយ៉ាងណាផ្ដល់ភាពងាយស្រួលដល់ជនជាតិភាគតិចទាំងអស់។
សូមបញ្ជាក់ថា នៅទូទាំងប្រទេសកម្ពុជាមាន ដីសមូហភាពសហគមន៏ជនជាតិភាគតិចចំនួន ៥០១ សហគមន៏ ហើយក្នុងនោះមានតែដីសមូហភាពសហគមន៏ចំនួន ១១ សហគមន៏ប៉ុណ្ណោះដែលបានចុះបញ្ជីដីធ្លីរួចរាល់។
ក៏ប៉ុន្តែ លោក សេង ឡូត អ្នកនាំពាក្យនៃ ក្រសួងរៀបចំដែនដី នគរូបនីយកម្ម និងសំណង់បានបញ្ជាក់ថា ការចុះបញ្ជីដីសមូហភាពសហគមន៏ជនជាតិដើមភាគតិចនេះ គ្មានភាពយឺតយ៉ាវនោះទេដោយក្រសួងបានសម្រេចទៅតាមផែនការ ដែលបានគ្រោងទុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ