ចិនគាំទ្រចំណាត់ការរបស់រដ្ឋាភិបាល ខណៈអាមេរិកនិងអង់គ្លេសទាមទារឲ្យដោះលែងលោក កឹម សុខា
យ៉ាងហោចណាស់ មានប្រទេសមហាអំណចចំនួន២ គឺអាមេរិក និងអង់គ្លេស បានចេញប្រតិកម្មប្រឆាំងនឹងការចាប់ខ្លួនលោក កឹម សុខា និងបានទាមទារឲ្យមានការដោះលែងប្រធានគណបក្សប្រឆាំងមកវិញ។ ប៉ុន្តែចិន ដែលជាប្រទេសមហាអំណាចទីមួយ ដែលបានបង្ហាញការគាំទ្រចំណាត់ការរបស់រដ្ឋាភិបាលកម្ពុជាលើគណបក្សប្រឆាំង ខណៈបារាំង និងរុស្ស៊ី បានរក្សាភាពស្ងៀមស្ងាត់។
ចុះផ្សាយនៅថ្ងៃ៖
ស្តាប់ - ០២:៣៤
ក្នុងចំណោមបណ្តាប្រទេសធំៗដែលបញ្ចេញប្រតិកម្ម ក្រោយពីការចាប់ខ្លួនលោក កឹម សុខា ប្រធានគណបក្សសង្រ្គោះជាតិមក ចិនគឺជាប្រទេសទី១ហើយ ដែលបានបង្ហាញការគាំទ្ររបស់ខ្លួនទៅលើរដ្ឋាភិបាលកម្ពុជា។ តាមរយៈអ្នកនាំពាក្យរបស់ខ្លួន រដ្ឋាភិបាលចិនប៉េកាំង បានបង្ហាញការគាំទ្រលើចំណាត់ការរបស់រដ្ឋាភិបាលកម្ពុជា ខណៈដែលប្រទេសមហាអំណាចពីរទៀត គឺបារាំង និងរុស្ស៊ី បានរក្សាភាពស្ងៀមស្ងាត់នៅឡើយ។
គួរជំរាបជូនថា មកទល់នឹងពេលនេះ មានប្រទេសមហាអំណាចអាមេរិក និងអង់គ្លេស បានបង្ហាញប្រតិកម្មមិនគាំទ្រចំពោះចំណាត់ការរបស់រដ្ឋាភិបាលលើគណបក្សប្រឆាំងនោះទេ។
កាលពីថ្ងៃទី ៣ កញ្ញា ក្រសួងការបរទេសអាមេរិក បានចេញសេចក្តីថ្លែងការណ៍ព្រួយបារម្ភរបស់ខ្លួនភ្លាមៗ នៅប៉ុន្មានម៉ោងក្រោយពីការចាប់ខ្លួនលោក កឹម សុខា។ ដោយឡែកអង់គ្លេសកាលពីថ្ងៃទី ៤ កញ្ញា តាមរយៈលោក Hon Mark Field រដ្ឋមន្រ្តីទទួលបន្ទុកកិច្ចការបរទេសប្រចាំតំបន់អាស៊ីប៉ាស៊ីហ្វិចនៃប្រទេសអង់គ្លេស បានចេញសេចក្តីថ្លែងការណ៍មួយដែរ។ សេចក្តីថ្លែងការណ៍នេះបានអំពាវនាវដល់រដ្ឋាភិបាលកម្ពុជា ឲ្យងាកមកស្តារស្ថានភាពនេះឡើងវិញ ដើម្បីធានាដល់ការរៀបចំការបោះឆ្នោតជាតិនៅឆ្នាំក្រោយ។ លោក Mark Field បានថ្លែងថា លោកមានការព្រួយបារម្ភជាខ្លាំងចំពោះការវាយប្រហារជាស៊េរីនៅក្នុងប្រទេសកម្ពុជានារយៈពេលចុងក្រោយនេះ។ នៅថ្ងៃទី ៤ កញ្ញា ដែរ ស្ថានទូតអូស្រ្តាលីប្រចាំនៅទីក្រុងភ្នំពេញ ក៏បានចេញសេចក្តីប្រកាសព័ត៌មានមួយដែរ ដោយបានបង្ហាញពីក្តីព្រួយបារម្ភនិងបានវាយតម្លៃជាទូទៅលើស្ថានភាពនយោបាយនៅកម្ពុជាមួយរយៈពេលចុងក្រោយនេះថា គឺជាការគំរាមកំហែងដល់ការរឹតត្បិតនៃលម្ហនយោបាយ ជាពិសេសសេរីភាពរបស់គណបក្សប្រឆាំង អង្គការសង្គមស៊ីវិល និងសារព័ត៌មាន ក្នុងការដើរតួនាទីរបស់ពួកគេក្នុងលទ្ធិប្រជាធិបតេយ្យនៅកម្ពុជា។ តាមរយៈសេចក្តីប្រកាសព័ត៌មានរបស់ខ្លួន ស្ថានទូតអូស្ត្រាលី បានដាក់ការព្រួយបារម្ភជាពិសេសលើការចាប់ខ្លួនលោក កឹម សុខា កាលពីថ្ងៃទី ៣ កញ្ញា ថា គឺជាការបង្ហាញនូវការវិវត្តន៍កាន់តែអាក្រក់ទៅនៃស្ថានភាពនយោបាយនៅកម្ពុជាមុនពេលបោះឆ្នោតជាតិ នាខែកក្កដា ឆ្នាំ២០១៨ ខាងមុខ។
ក្រៅពីនេះប្រតិកម្មពីបណ្តាប្រទេសធំខាងលើនេះហើយ ក៏មានដែរប្រតិកម្មមកពីសហភាពអឺរ៉ុប (EU) ឧត្តមស្នងការអង្គការសហប្រជាជាតិទទួលបន្ទុកខាងសិទ្ធិមនុស្ស (United Nations Human Rights), អង្គការលើកលែងទោសអន្តរជាតិ (Amnesty International), អង្គការឃ្លាំមើលសិទ្ធិមនុស្សអន្តរជាតិ (Human Right Watch) និង អង្គការឃ្លាំមើលសិទ្ធិមនុស្សសភាអាស៊ានជាដើម។ សហគមន៍អន្តរជាតិទាំងនេះ សុទ្ធសឹងតែបានលើកឡើងពីក្តីព្រួយបារម្ភរបស់ខ្លួន ចំពោះសភាពការណ៍ចុងក្រោយបង្អស់នៅកម្ពុជា និងបានជម្រុញឲ្យអាជ្ញាធរកម្ពុជា ចាត់វិធានការណ៍ចាំបាច់នានា ដើម្បីធានារក្សានូវលម្ហលទ្ធិប្រជាធិបតេយ្យ នៅក្នុងប្រទេសនេះឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ