សហភាពអន្តរសភា ថានឹងជួយសម្របសម្រួលការចរចានយោបាយ បើសិនភាគីកម្ពុជាត្រូវការជំនួយពីខ្លួន
សហភាពអន្តរសភា (IPU) ដែលតំណាងឲ្យប្រទេសចំនួន១៧៨ នៅថ្ងៃទី២៨ មីនា បានថ្កោលទោស និងសម្តែងការព្រួយបារម្ភយ៉ាងខ្លាំងចំពោះការបំពានសិទ្ធិមនុស្សដោយខុសច្បាប់ទៅលើអ្នកតំណាងរាស្រ្តក្នុងប្រទេស៤ គឺម៉ាល់ឌីវ តួកគី វេណេស៊ុយអេឡា និងកម្ពុជា។ សម្រាប់កម្ពុជា សហភាពអន្តរសភា (IPU) បានស្នើឲ្យរដ្ឋអំណាចខ្មែរផ្តល់ភាពស្របច្បាប់ដល់អតីតអ្នកតំណាងរាស្រ្តបក្សប្រឆាំង និងបន្តការចរចាផ្នែកនយោបាយឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
“សហភាពអន្តរសភា (IPU) អំពាវនាវឲ្យអាជ្ញាធរកម្ពុជាផ្តល់ភាពស្របច្បាប់ដល់អតីតអ្នកតំណាងរាស្រ្តរបស់បក្សប្រឆាំងទាំង៥៥រូបឡើងវិញជាបន្ទាន់”។ នេះគឺជាសាររបស់សហភាពអន្តរសភា (IPU) មកកាន់រដ្ឋាភិបាលកម្ពុជា តាមរយៈសេចក្តីប្រកាសព័ត៌មានមួយរបស់ខ្លួននៅថ្ងៃពុធ។ ជាការឆ្លើយតប លោកឡេង ប៉េងឡុង ដែលជាអ្នកនាំពាក្យរដ្ឋសភាខ្មែរ លើកឡើងថា “វាមិនមែនជារឿងថ្មី និងមិនមែនជាលើកទីមួយទេ ដែល IPU អំពាវនាវមកកាន់កម្ពុជា”។ សម្រាប់លោកឡេង ប៉េងឡុង អ្វីដែលកម្ពុជាបានធ្វើគឺគោរពទៅតាមគោលការណ៍លទ្ធិប្រជាធិបតេយ្យ និង ច្បាប់របស់កម្ពុជា។
ប៉ុន្តែសម្រាប់សហភាពអន្តរសភា (IPU) វិញ អ្វីដែលកម្ពុជាបានធ្វើ ដូចជាការរំលាយគណបក្សសង្រ្គោះជាតិ និងការកាត់សិទ្ធិធ្វើនយោបាយរបស់សមាជិកគណបក្សនេះរយៈពេល៥ឆ្នាំក្នុងនោះមានទាំងតំណាងរាស្រ្ត៥៥រូបផង គឺបានឆ្លុះបញ្ចាំងយ៉ាងច្បាស់ពីការរំលោភបំពានទៅលើសិទ្ធិជាមូលដ្ឋានរបស់អ្នកតំណាងរាស្រ្តខ្មែរ។ ប៉ុន្តែលោកឡេង ប៉េងឡុង បានទាត់ចោលការលើកឡើងនេះ ហើយថែមទាំងចាត់ទុកសហភាពអន្តរសភា (IPU) ថា មិនមែនជាស្ថាប័នអព្យាក្រឹតទេ ដោយលោកចោទចំៗថា ស្ថាប័នមួយនេះតែងតែគាំទ្រអតីតបក្សប្រឆាំងហើយមិនស្ដាប់ការពន្យល់របស់រដ្ឋសភាកម្ពុជាចំពោះរឿងរ៉ាវដែលបានកើតឡើងឡើយ។
ក្រៅពីលើកឡើងពីបញ្ហារំលាភសិទ្ធិទៅលើអតីតអ្នកតំណាងរាស្រ្តគណបក្សប្រឆាំង សហភាពអន្តរសភា(IPU) បានអំពាវនាវឲ្យរដ្ឋាភិបាលកម្ពុជាបន្តការសន្ទនាផ្នែកនយោបាយ។ ហើយថា បើចាំបាច់ សហភាពអន្តរសភា (IPU) នឹងជួយនៅក្នុងរឿងនេះថែមទៀត។ ប៉ុន្តែការចរចានយោបាយនេះ ធ្លាប់ត្រូវបានលោកនាយករដ្ឋមន្រ្តីហ៊ុន សែន ប្រកាសបិទទ្វារម្តងជាពីរដងរួចមកហើយ។ លោកសុខ ឥសាន អ្នកនាំពាក្យបក្សកាន់អំណាចគូសបញ្ជាក់បន្ថែមត្រង់ចំណុចនេះថា វាមិនអាចកើតឡើងនោះទេ ព្រោះថា វប្បធម៌សន្ទនាបានស្លាប់បាត់ទៅហើយ។
សូមបញ្ជាក់ថា នេះមិនមែនលើកទីមួយទេដែលសហភាពអន្តរសភាលើកឡើងពីបញ្ហាកម្ពុជា។ កន្លងមក សហភាពអន្តរសភា (IPU) ក៏ធ្លាប់បានបានថ្កោលទោស និងសម្តែងនូវការព្រួយបារម្ភពីបញ្ហានៅកម្ពុជាដែរ ដូចយ៉ាងការចាប់ខ្លួនលោកកឹម សុខា ការរំលាយគណបក្សសង្រ្គោះជាតិ ក៏ដូចជាការធ្វើវិសោធនកម្មច្បាប់នានាដោយតំណាងរាស្រ្តគណបក្សប្រជាជនកម្ពុជា។ សម្រាប់លោកសុខ ឥសាន សកម្មភាពរបស់សហភាពអន្តរសភា (IPU) មិនមានអ្វីចម្លែកនោះទេ ព្រោះថា សហភាពអន្តរសភា (IPU) នេះ មាននិន្នាការកាន់ជើងអតីតគណបក្សសង្រ្គោះជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ