កម្ពុជាខាតបង់ទឹកប្រាក់រាប់លានដុល្លារ បណ្តាលមកពីផលវិបាកនៃអំពើហិង្សាលើកុមារ
កម្ពុជាទទួលរងការខាតបង់សេដ្ឋកិច្ចជាទឹកប្រាក់ចំនួន១៦១ លានដុល្លារអាមេរិក ដែលជាផលវិបាកផ្នែកសុខភាពបណ្តាលមកពីអំពើហិង្សាលើកុមារ។ នេះបើតាមការប៉ាន់ស្មានរបស់អង្គការមូលនិធិអង្គការសហប្រជាជាតិសម្រាប់កុមារឆ្នាំ២០១៣ និងដែលត្រូវបានផ្សព្វផ្សាយ ដោយអង្គការទស្សនៈពិភពលោកក្នុងពេលបើកយុទ្ធានាការ It Takes a World ដើម្បីបញ្ឈប់អំពើហិង្សាលើកុមារ នៅកម្ពុជានៅថ្ងៃនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
អង្គការទស្សនៈពិភពលោកក្នុងឱកាសបើកយុទ្ធនាការ “It Takes a World ដើម្បីបញ្ឈប់អំពើហិង្សាលើកុមារ” នៅកម្ពុជាបានឲ្យដឹងថាកុមារនៅក្នុងប្រទេសកម្ពុជាប្រមាណ៧៥ភាគរយជួបប្រទះអំពើហិង្សាយ៉ាងហោចណាស់មួយទម្រង់មុនពេលពួកគេមានអាយុ១៨ឆ្នាំ។ ការស្ទង់មតិថ្នាក់ជាតិមួយបង្ហាញថា កុមារកម្ពុជាច្រើនជាង៥០ភាគរយ ទទួលរងនូវអំពើហិង្សាលើរូបរាងកាយ ២៥ភាគរយ ទទួលរងអំពើហិង្សាផ្នែកផ្លូវចិត្ត និងប្រមាណ៥ភាគរយទទួលរងនូវអំពើហិង្សាផ្នែកផ្លូវភេទ។
លោកស្រី ជីល រេម័រ ប្រធានបច្ចេកទេសផ្នែកអប់រំ និងបំនិនជីវិតរបស់អង្គការទស្សនៈពិភពលោកបានថ្លែងតាមរយៈសេចក្តីថ្លែងការណ៍ថា “អំពើហិង្សាមានឥទ្ធិពលអាក្រក់ទៅលើការអភិវឌ្ឍន៍ផ្នែកសតិអារម្មណ៍ផ្លូវចិត្ត និងភាសារបស់កុមារ។ លោកបន្ថែមថា អាចអំពើហិង្សាអាចមានផលប៉ះពាល់អវិជ្ជមានដល់ទំនាក់ទំនងសង្គម និងការសិក្សារបស់កុមារដែរ។
លោកស្រី ជា លីដា ប្រធានយុទ្ធនាការ It Takes a World បាននិយាយនៅព្រឹកថ្ងៃទី២០ ខែវិច្ឆិកាថា យុទ្ធនាការនេះគឺជារបស់អង្គការទស្សនៈពិភពលោកអន្តរជាតិ ដែលកំពុងអនុវត្តនៅ៨៥ប្រទេសក្នុងរយៈពេល៥ឆ្នាំ។ សម្រាប់ប្រទេសកម្ពុជាយុទ្ធនាការនេះ មានរយៈពេល៥ឆ្នាំ ដែលផ្តោតទៅលើការបញ្ឈប់ហិង្សាលើកុមារនៅផ្ទះ និងនៅសាលារៀន។
ប្រធានយុទ្ធនាការ It Takes a World នៅកម្ពុជាបន្ថែមថា យុទ្ធនាការនេះផ្តោតលើកុមារ ដែលងាយរងគ្រោះខ្លាំងនៅក្នុងប្រទេសកម្ពុជា តាមនិយមន័យរបស់អង្គការទស្សនៈពិភពលោក។ លោកស្រីបានលើកឡើងដោយដកស្រង់និយមន័យរបស់អង្គការទស្សនៈពិភពលោកថា កុមារដែលងាយរងគ្រោះ គឺជាកុមារស្ថិតក្នុងទំនាក់ទំនង ដែលមានការកេងប្រវ័ញ្ចខ្ពស់ កុមារដែលត្រូវបានបោះបង់ចោល កុមារដែលរស់នៅក្នុងបរិយាកាស ដែលគេរើសអើង និងកុមារ ដែលងាយរងគ្រោះដោយគ្រោះធម្មជាតិ។
អង្គការទស្សនៈពិភពលោកបានបញ្ជាក់ថាខ្លួននឹងធ្វើជាមួយឪពុកម្តាយ គ្រួបង្រៀន សហគមន៍ និងសាធារណៈជនទូទៅដើម្បីផ្លាស់ប្តូរឥរិយាបទ និងទម្លាប់ ដើម្បីការពារកុមារពីអំពើហិង្សា និងការលើកទឹកចិត្តការអប់រំបែបវិជ្ជមាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ