ជប៉ុនគ្រោងបន្ថែមការវិនិយោគនៅកម្ពុជា ខណៈទំហំវិនិយោគមានជាង ២,៥ពាន់លានដុល្លារ ហើយនៅកម្ពុជា
សមាគមជប៉ុន-កម្ពុជា (Japan-Cambodia Association) បានអះអាងឱ្យដឹងកាលពីថ្ងៃពុធម្សិលមិញថា អ្នកវិនិយោគជប៉ុនជាច្រើនកំពុងចាប់អារម្មណ៍ចង់មកវិនិយោគរកស៊ីនៅក្នុងប្រទេសកម្ពុជា។ ជាមួយនឹងការអះអាងដូច្នេះ សមាគមជប៉ុន-កម្ពុជាក៏សន្យាថា នឹងជួយជំរុញវិនិយោគិនជប៉ុនបន្ថែមទៀត ដើម្បីឱ្យមកវិនិយោគរកស៊ីនៅកម្ពុជា។ គិតមកដល់ពេលនេះ ទំហំវិនិយោគរបស់ជប៉ុននៅកម្ពុជាបានកើនឡើងដល់ជាង២,៥ពាន់លានដុល្លារអាមេរិកហើយ។
ចុះផ្សាយនៅថ្ងៃ៖
ស្តាប់ - ០២:៣១
គឺនៅក្នុងជំនួបជាមួយរដ្ឋមន្រ្តីក្រសួងពាណិជ្ជកម្មកម្ពុជាកាលពីថ្ងៃពុធ លោកតាកាហាឈី ហ្វូមីអាគី ប្រធានសមាគមជប៉ុន-កម្ពុជា បានអះអាងឱ្យដឹងថា សមាគមជប៉ុន-កម្ពុជានឹងបន្តផ្សព្វផ្សាយពីកម្ពុជាទៅកាន់សមាជិករបស់ខ្លួនបន្ថែមទៀត ដើម្បីឱ្យយល់រឹតតែច្បាស់អំពីកម្ពុជា និង ទាក់ទាញសហគ្រាសធុនតូច និង មធ្យមជប៉ុនដែលមានបច្ចេកវិទ្យាខ្ពស់មកវិនិយោគ និងផ្ទេរចំណេះដឹងមកកម្ពុជា។ បន្ថែមពីលើការលើកឡើងយ៉ាងនេះ តំណាងក្រុមហ៊ុនជប៉ុនមួយចំនួនដែលបានចូលជូបរដ្ឋមន្រ្តីក្រសួងពាណិជ្ជកម្មកម្ពុជាដែរ ក៏បានប្រកាសឱ្យដឹងពីគម្រោងរបស់ពួកគេក្នុងការវិនិយោគនៅក្នុងវិស័យថាមពល សូត្រមាស និង គ្រឿងសម្អាងធ្វើពីដង្កូវនាង និងហេដ្ឋារចនាសម្ព័ន្ធផ្លូវដែកនៅក្នុងប្រទេសកម្ពុជា។
ចំណែក លោកប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្មកម្ពុជាវិញ បានគូសបញ្ជាក់ប្រាប់ក្រុមអ្នកវិនិយោគជប៉ុនថា ការរវិនិយោគនៅក្នុងប្រទេសកម្ពុជា គឺមិនមែនបម្រើតែទីផ្សារកម្ពុជាប៉ុណ្ណោះទេ គឺបម្រើដល់ទីផ្សារអាស៊ី អឺរ៉ុប អាមេរិក និងទីផ្សារដទៃទៀត។ នេះ ក៏ព្រោះកម្ពុជានឹងធ្វើសមាហរណកម្មទៅកាន់ទីផ្សារទាំងអស់នេះតាមរយៈកិច្ចព្រមព្រៀងពាណិជ្ជកម្មពហុភាគី និងទ្វេភាគីនៅពេលអនាគត។
សូមបញ្ជាក់ថា គិតមកដល់ឆ្នាំ២០១៩នេះ ជប៉ុនបានវិនិយោគនៅក្នុងប្រទេសកម្ពុជាក្នុងទំហំទឹកប្រាក់ប្រមាណជាជាង២.៥ពាន់លានដុល្លាអាមេរិកហើយ។ ការវិនិយោគសំខាន់ៗរបស់ជប៉ុននៅកម្ពុជា រួមមានដូចជា លើផ្នែកផលិតគ្រឿងបង្គុំអគ្គិសនី និងអេឡិចត្រូនិក គ្រឿងបង្គុំរថយន្ត និងសម្ភារៈបរិក្ខារបច្ចេកទេស កសិ-ឧស្សាហកម្ម ការកែច្នៃម្ហូបអាហារ សណ្ឋាគារ ទេសចរណ៍ មន្ទីរពេទ្យ និងផ្សារទំនើប។ កាលពីឆ្នាំ២០១៨ ទំហំពាណិជ្ជកម្មរវាងកម្ពុជា និង ជប៉ុនគឺមានជាង ១ពាន់៥រយលានដុល្លារអាមេរិក។ កម្ពុជា បាននាំចេញទៅជប៉ុនក្នុងទំហំទឹកប្រាក់ប្រមាណជាជាង១ពាន់លានដុល្លារអាមេរិក។ រីឯ ជប៉ុននាំចូលមកកម្ពុជាវិញ គឺ មានទំហំទឹកប្រាក់ជាង ៥០០លានដុល្លារអាមេរិក។
ជប៉ុន គឺជាប្រទេសវិនិយោគធំមួយនៅក្នុងចំណោមប្រទេសវិនិយោគសំខាន់ៗនៅកម្ពុជា។ ចំណែកប្រទេសដែលវិនិយោគធំបំផុតនៅកម្ពុជាវិញ គឺប្រទេសចិន។ គម្រោងវិនិយោគមកពីប្រទេសចិនស្មើនឹង៣៥ភាគរយ នៃគម្រោងវិនិយោគមកពីបរទេសសរុបចាប់ពីឆ្នាំ២០១៦ដល់ឆ្នាំ ២០១៩នេះ។ ក្នុងនោះ ទឹកប្រាក់វិនិយោគពីប្រទេសចិនមានចំនួន៧,៩ពាន់លានដុល្លារអាមេរិកនៅក្នុងគម្រោងវិនិយោគបរទេសសរុបចំនួន២២ពាន់លានដុល្លារសម្រាប់កម្ពុជា។ នេះបើតាមក្រុមប្រឹក្សាអភិវឌ្ឍកម្ពុជា (CDC)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ