ម្ចាស់ជំនួយមូលនិធិពិភពលោកនៅតែមិនអស់ចិត្ត ចំពោះអង្គភាពអំពើពុករលួយដែលមិនកាត់ទោសអតីតប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់
ករណីពុករលួយដែលត្រូវបានចោទប្រកាន់លើអតីតប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ដែលផ្ទុះឡើងនៅឆ្នាំ២០១៣នោះ ពេលនេះ នៅតែធ្វើអោយម្ចាស់ជំនួយដ៏ធំជាងគេរបស់មូលនិធិពិភពលោក និងប្រធានអង្គភាពប្រឆាំងអំពើពុករលួយ មើលមុខគ្នាមិនចំ។ ការលើកឡើងផ្ទុយដាច់ស្រឡះ ពីគ្នាជុំវិញករណីនេះ ត្រូវបានធ្វើឡើងនាថ្ងៃទី៨ ធ្នូ ម្សិលមិញ នៅក្នុងកិច្ចពិភាក្សាស្តីពីអំពើពុករលួយ ដែលរៀបចំឡើងដោយសភាពាណិជ្ជកម្មអឺរ៉ុបប្រចាំនៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៥
លោក Joachim Baron von Marschall ឯកអគ្គរដ្ឋទូតអាល្លឺម៉ង់ប្រចាំនៅកម្ពុជា បានថ្លែងថា ក្រុមហ៊ុនអាល្លឺម៉ង់ ជាញឹកញាប់បានប្រាប់លោកថា សំណូក និងអំពើពុករលួយនៅកម្ពុជា បានធ្វើអោយពួកគេមានហានិយភ័យណាស់ក្នុងការដាក់ទុននៅកម្ពុជា។ អ្នកតំណាងប្រទេសអាល្លឺម៉ង់ ជាប្រទេសផ្តល់ជំនួយធំជាងគេដល់មូលនិធិពិភពលោកបន្តថា ដូច្នេះ ការយកមនុស្សដូចជាលោកអតីតប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ទៅកាន់តុលាការ គឺជាគន្លឹះ ដើម្បីការពារកុំអោយអំពើពុករលួយ បំភ័យអ្នកវិនិយោគបរទេស។
ពាក់ពន្ធ័នឹងរឿងនេះ លោក ឯកអគ្គរដ្ឋទូតអាល្លឺម៉ង់បានបញ្ជាក់ថាករណីអតីតប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់នេះ មើលទៅគឺស្តែងណាស់ ក៏ប៉ុន្តែហេតុអីមិនមានការកាត់ទោសអ្វីសោះ។ លោកឯកអគ្គរដ្ឋទូតបានបន្តថា បើទោះបីជា មូលនិធិពិភពលោកបានបដិសេធមិនផ្តល់ការយល់ឃើញចំពោះករណីនេះជាសាធារណៈក៏ដោយ ក៏ប៉ុន្តែពួកគេគឺចង់ទទួលបានចម្លើយ ដូចដែលលោកចង់បាន។
ផ្ទុយទៅវិញ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ជាថ្មីម្តងទៀត នៅក្នុងឱកាសកិច្ចពិភាក្សាស្តីពីអំពើពុករលួយនាថ្ងៃទី០៨ ធ្នូ បានការពារសេចក្តីសម្រេចរបស់អង្គភាពប្រឆាំងអំពើពុករលួយ ដោយនិយាយថា អតីតប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់រូបនោះ គឺបានទទួលយកលុយដែលមិនគួរទទួល។ ហើយ ការធ្វេសប្រហែសយកលុយមិនគួរទទួលនេះ មិនមានច្បាប់ណាចែងដាក់ទោសឡើយ។ ACU នៅបានយកច្បាប់ ដែលចែងដោយUNTAC មកប្រើ តែក៏មិនមានមាត្រាណាចែងអំពីករណីធ្វេសប្រហែសនេះដែរ។ លោកប្រធាន អង្គភាពប្រឆាំងអំពើពុករលួយក៏បានគូសបញ្ជាក់បន្ថែមដែរថា អតីតប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់រូបនោះគ្មានសិទ្ធិត្រួតត្រាលើការសម្រេចថាត្រូវទទួលយកក្រុមហ៊ុនណាមួយផ្គត់ផ្គង់សម្ភារៈអោយនោះទេ។ សរុបមកវិញ លោក ឱម យ៉ិនទៀង បញ្ជាក់ថាករណី លោក ដួង សុជាតិ ដែលជាអតីតប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់នេះ គឺជាបទគៃបន្លំ។ បទគៃបន្លំដែលមិនមានចែងនៅក្នុងមាត្រានៃច្បាប់ប្រឆាំងអំពើពុករលួយ។ នេះបើតាមលោកប្រធានACU។
សូមបញ្ជាក់ថា កាលពីឆ្នាំ ២០១៣ មូលនីធិពិភពលោកប្រឆាំងនឹងជំងឺអេដស៍ ជំងឺរបេង និង ជំងឺគ្រុនចាញ់ ដែលមានមូលដ្ឋាននៅទីក្រុងហ្សឺណែវ បានលាតត្រដាងថា លុយចំនួន១២លានដុល្លាររបស់ខ្លួន ត្រូវបានចំណាយដោយមិនត្រឹមត្រូវ ពីសំណាក់ លោក ដួង សុជាតិ ដែលបានលាឈប់ពីតំណែងកាលពីឆ្នាំ ២០១១។ លោក ដួង សុជាតិ បានទទួលរងការចោទប្រកាន់ថាបានទទួលសំណូក ដើម្បីធានាការពារកិច្ចសន្យាផ្គត់ផ្គង់មុងដែលមានតម្លៃរាប់លានដុល្លារ របស់ក្រុមហ៊ុនពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ