យុវជនបក្សនយោបាយនៅកម្ពុជា គ្មានឯករាជ្យ គ្មានរចនាសម្ព័ន្ធច្បាស់លាស់ និងគ្មានកម្មវិធីគោលនយោបាយផ្ទាល់ខ្លួន
យុវជនគណបក្សនយោបាយនៅកម្ពុជា បង្កើតឡើងដោយគណបក្សមេ គឺធ្វើឲ្យក្រុមចលនាយុវជននោះ គ្មានឯករាជ្យភាព គ្មានកម្មវិធីគោលនយោបាយផ្ទាល់ខ្លួន គ្មានរចនាសម្ព័ន្ធច្បាស់លាស់ និងគ្មានប្រភពចំណូលជាក់លាក់ពីសមាជិកក្រុមរបស់ខ្លួន គឺខុសពីក្រុមអ្នកនយោបាយវ័យក្មេង នៅអាល្លឺម៉ង់។ នេះបើតាមការសិក្សាប្រៀបធៀបមួយរបស់មូលនិធិ Konrad Adenauer Stiftung ដែលចេញផ្សាយនៅថ្ងៃសៅរ៍ម្សិលមិញនេះ។
ចុះផ្សាយនៅថ្ងៃ៖
ស្តាប់ - ០២:៤០
ការសិក្សានេះ គឺមានចំណងជើងថា យុវជននយោបាយនៅកម្ពុជា និងអាល្លឺម៉ង់, PARTY YOUTH WINGS IN CAMBODIA AND GERMANY, A Comparative Perspective សរសេរដោយលោក Johannes Vogel ជោហាននេស វ៉ូហ្គ៊ែល ដែល ជានិស្សិតផ្នែកវិទ្យាសាស្ត្រសង្គម ច្បាប់និងសេដ្ឋកិច្ច នៅសកលវិទ្យាល័យ Erfurt ប្រទេសអាល្លឺម៉ង់។
មានកម្រាស់៧៧ទំព័រជាខ្មែរនិងអង់គ្លេស ការសិក្សាទស្សនៈប្រៀបធៀបនេះ គឺជ្រើសរើសតែយុវជនគណបក្សនយោបាយនៅស្រុកខ្មែរ តែពីរប៉ុណ្ណោះ គឺក្រុមយុវជនគណបក្សប្រជាជនកម្ពុជា និងក្រុមយុវជនគណបក្សសង្គ្រោះជាតិ ដើម្បីទៅប្រៀបធៀបជាមួយនឹងក្រុមយុវជននយោបាយ ចំនួន ៤ ចលនា ក្នុងប្រទេសអាល្លឺម៉ង់។
អ្នកនិពន្ធសៀវភៅនេះ បានចុះមកសង្កេតនៅស្រុកខ្មែរ ហើយបានសិក្សាលម្អិតចំណុចនីមួយៗ នៃក្រុមយុវជនគណបក្សប្រជាជនកម្ពុជា និងក្រុមយុវជនគណបក្សសង្គ្រោះជាតិ។ ទីបំផុត អ្នកនិពន្ធវាយតម្លៃថា ក្រុមយុវជននយោបាយនៃបក្សទាំងពីរ គឺបង្កើតឡើងយកគណបក្សមេ ដូចគ្នា។ ជាហេតុធ្វើឲ្យក្រុមពួកគេទាំងនោះ គ្មានឯករាជ្យភាព។
មិនតែប៉ុណ្ណោះ គឺក្រុមទាំងនោះ គ្មានកម្មវិធីគោលនយោបាយផ្ទាល់ខ្លួនទេ ពោលគឺអនុវត្តគោលនយោបាយគាំទ្រតែទៅលើគណបក្សមេរបស់ខ្លួន។ លើសពីនេះ ក្នុងក្រុមយុវជននោះទៀតសោត គឺគ្មានរចនាសម្ព័ន្ធច្បាស់លាស់ ដែលតម្រូវឲ្យតែងតាំងថ្នាក់ដឹកនាំបក្ស និងគ្មានប្រភពចំណូលជាក់លាក់ពីសមាជិកក្រុមរបស់ខ្លួន ដោយគ្មានតម្រូវឲ្យសមាជិកយុវជនបង់វិភាគទានសម្រាប់ទ្រទ្រង់ចលនារបស់ខ្លួននោះទេ។ ពោលគឺបានប្រាក់ចំណូលពីការឧបត្ថម្ភរបស់បក្សមេ និងសប្បុរសជនទៅវិញ។
ទាំងអស់នេះ គឺខុសផ្ទុយស្រឡះ ពីក្រុមយុវជនគណបក្សនយោបាយនៅអាល្លឺម៉ង់ ដែលក្រុមយុវជននយោបាយខ្លះ ដំបូងឡើង គឺកើតចេញដោយចលនាយុវជនខ្លួនឯង មានឯករាជ្យភាព ហើយតម្រូវឲ្យសមាជិកបង់វិភាគទានចូលចលនារបស់ខ្លួន ជាប្រចាំទៀតផង។ ហើយបើទោះបីជាចលនានោះ ខ្លះភ្ជាប់ខ្លួនទៅនឹងគណបក្សធំៗហើយក្តី ក៏សហភាពយុវជន យុវជនសង្គមនិយម យុវជននិយមឆ្វេង និងយុវជនបៃតង ដែលជាចលនាអ្នកនយោបាយវ័យក្មេងនៅអាម្លឺម៉ង់ មិនស្ទាក់ស្ទើរក្នុងការលើកឡើងទាក់ទងទៅនឹងកម្មវិធីនយោបាយរបស់ខ្លួនឡើយ ទោះបីវាផ្ទុយទៅនោះកម្មវិធីនយោបាយរបស់បក្សមេក្តី។
ដូច្នេះហើយ ការសិក្សារបស់លោក Johannes Vogel នៅពេលនេះ គឺចង់បង្ហាញជាមេរៀនមួយសម្រាប់ក្រុមយុវជននយោបាយនៅស្រុកខ្មែរ ដើម្បីឲ្យមានការកំណត់ពីសមាសភាពក្រុមអ្នកនយោបាយវ័យក្មេងរបស់ខ្លួនឲ្យបានច្បាស់លាស់ កំណត់តាំងអាយុ កម្រិតសិទ្ធិនិងកាតត្វកិច្ច និងការចូលវិភាគទានលុយកាក់។ ពិសេសនោះគឺត្រូវរៀបចំរចនាសម្ព័ន្ធយុវជនឲ្យត្រឹមត្រូវ ដូចជា បែកចែកជា មហាសន្និបាត-សន្និបាតប្រតិភូ គណៈកម្មាធិការគ្រប់គ្រង តំណាងថ្នាក់ជាតិ-ថ្នាក់ក្រោមជាតិ គណៈកម្មការជំនាញ និងគណៈកម្មាធិអាជ្ញាកណ្តាល ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ