អ្នកកាសែតសោកស្ដាយចំពោះការបិទការិយាល័យផ្សាយរបស់អាស៊ីសេរី
វិទ្យុអាស៊ីសេរីបានប្រកាសបិទការិយាល័យរបស់ខ្លួននៅភ្នំពេញតាមរយៈសេចក្ដីថ្លែងការណ៍មួយចុះថ្ងៃទី១២ខែកញ្ញា។ ការបិទនេះធ្វើឡើងក្រោមហេតុផលថា រដ្ឋាភិបាល បានបង្ក្រាបមកលើសំឡេង ឯករាជ្យឥតស្រាកស្រាន្ត ក្នុងរយៈពេលចុងក្រោយនេះដោយមិនអនុញ្ញាតឲ្យវិទ្យុអាស៊ីសេរី បន្តបើកដំណើរការការិយាល័យព័ត៌មាននៅភ្នំពេញ។ នេះបើតាមអាស៊ីសេរី។ ទន្ទឹមនឹងនេះអ្នកកាសែតជើងចាស់មួយចំនួនសោកស្ដាយចំពោះការបិទនេះ។
ចុះផ្សាយនៅថ្ងៃ៖
ស្តាប់ - ០២:២៣
លោក មឿន ឈានណារិទ្ធ នាយកវិទ្យាស្ថានកម្ពុជាសម្រាប់ការសិក្សាផ្នែកសារព័ត៌មានបានហៅការបិទការិយាល័យរបស់វិទ្យុអាស៊ីសេរីនៅភ្នំពេញគឺជាការខាតបង់យ៉ាងខ្លាំងចំពោះសារព័ត៌មានឯករាជ្យ និងមានវិជ្ជាជីវៈនៅកម្ពុជា។ លោកបន្ថែមថា សារព័ត៌មាននៅកម្ពុជាអាចនឹងរង្គោះរង្គើបន្តិចដែរ ព្រោះតែការដួលរលំរបស់អាស៊ីសេរីដែលជាសសរស្ដម្ភមួយតំណាងឲ្យសេរីភាពសារព័ត៌មានឯករាជ្យក្នុងចំណោមវិទ្យុដទៃទៀតដូចជា វិទ្យុវីអូអេ វិទ្យុអូស្ត្រាលី និងវិទ្យុបារាំងអន្តរជាតិជាដើម។ អ្វីដែលលោកមឿន ឈានណារិទ្ធ កាន់តែសោកស្ដាយទៀតនោះគឺការបិទការិយាល័យនៅកម្ពុជាបានប៉ះពាល់យ៉ាងធ្ងន់ធ្ងរដល់បុគ្គលិកអាស៊ីសេរី។
ចំណែកលោក សយ សុភាព អគ្គនាយកមជ្ឈមណ្ឌលព័ត៌មានដើមអម្ពិលមើលឃើញផ្សេងថា ការបិទការិយាល័យរបស់អាស៊ីសេរីជារឿងមួយត្រឹមត្រូវ បើគិតដល់ផលប្រយោជន៍ជាតិសម្រាប់បច្ចុប្បន្ន និងអនាគត។ តែប៉ះពាល់បន្តិចដែល ត្រង់សេរីភាពសារព័ត៌មាន។ លោក សយ សុភាពបន្ថែមថា ចាំពេលណាមួយមានការយោគយល់គ្នាឬនិយាយជាមួយគ្នាត្រង់ទៅត្រង់មករវាងកម្ពុជា និងអាមេរិកគឺវិទ្យុអាស៊ីសេរីដំណើរការឡើងវិញទើបជារឿងល្អ។
ដោយឡែក លោក ប៉ែន បូណា ប្រធានក្លឹបអ្នកកាសែតកម្ពុជាមានយោបល់ថា វិទ្យុអាស៊ីសេរីគួរតែចុះបញ្ចីតាមការចង់បានរបស់ក្រសួងព័ត៌មានជាមុនសិន មុនសម្រេចបិទការិយាល័យរបស់ខ្លួនដើម្បីមានលទ្ធភាពនៃការផ្សាយបន្ត។ លោក ប៉ែន បូណា បន្ថែមថា ការបិទពិតជាប៉ះពាល់ដល់ការទទួលបានព័ត៌មានរបស់ពលរដ្ឋដែលពីមុន១០ភាគរយធ្លាក់មកនៅត្រឹម៨ភាគរយ។ តែយ៉ាងណាក៏ដោយលោកមានជំនឿថា ពលរដ្ឋនៅតែទទួលបានព័ត៌មានឯករាជ្យពីស្ថាប័នផ្សេងទៀត។
ចំពោះលោក ពុយ គា អ្នកឆ្លើយឆ្លងព័ត៌មានរបស់កាសែតជប៉ុនក្យូដូយល់ឃើញថា ការបិទការិយាល័យនេះមិនមែនជារឿងធ្ងន់ធ្ងរចំពោះសេរីភាពសារព័ត៌មាននៅកម្ពុជានោះទេ។ តែអាចប៉ះពាល់ដែរ ដល់ទំហំនៃការផ្សាយឬកម្រិតនៃការទទួលព័ត៌មានរបស់ពលរដ្ឋមានការថមថយជាងមុន។
យ៉ាងណាក៏ដោយការបិទការិយាល័យអាស៊ីសេរីនៅកម្ពុជាមិនមែនមានន័យថា ពលរដ្ឋកម្ពុជាមិនស្ដាប់លឺការផ្សាយរបស់វិទ្យុនេះនោះទេ។ តែការស្ដាប់នេះអាចធ្វើបានតាមរយៈរលកធាតុអាកាសវិទ្យុកម្រិតទាប លើបណ្ដាញសង្គមហ្វេសប៊ុក Facebook យូធូប YouTube និងគេហទំព័រអាស៊ីសេរី www.rfa.org/khmer/ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ