អ្នកកាសែតខ្មែរ នៅតែរងការរើសអើងនិងគម្រាមកំហែងក្នុងពេលបំពេញភារកិច្ច
ចុះផ្សាយនៅថ្ងៃ៖
ស្តាប់ - ០៣:៥៩
កាលពីចុងសប្ដាហ៍កន្លងទៅនេះ លោកនាយករដ្ឋមន្ដ្រីបានជួបជាមួយនិពន្ធនាយកសារព័ត៌មានជាង១ពាន់នាក់នៅកម្ពុជា នៅសណ្ឋាគារសុខាភ្នំពេញ។ ជំនួបនេះស្ដែងឲ្យឃើញពីសារៈសំខាន់នៃអ្នកសារព័ត៌មាននៅក្នុងក្រសែភ្នែកនាយករដ្ឋមន្ដ្រីកម្ពុជា។ ប្រមុខរដ្ឋាភិបាលកម្ពុជា បានលើកឡើងពីបញ្ហាជាច្រើននៅក្នុងវិស័យសារព័ត៌មាន។ តែមានបញ្ហាមួយចំនួនដែលលោកមិនបានរំឭក។ នោះគឺការរើសអើង ការគម្រាមកំហែង និងការប្រើប្រាស់អំពើហិង្សាលើអ្នកសារព័ត៌មានក្នុងពេលបំពេញភារកិច្ច។
ការផ្សាយព័ត៌មានពិតនិងលឿនរហ័ស មិនហក់រំលងតួនាទីខ្លួនឯងជាអ្នកសារព័ត៌មាន និងភាពស្អាតស្អំ មិនទទួលសំណូកជាថ្នូរនឹងការបំភ្លៃព័ត៌មានជាដើម សុទ្ធសឹងតែគតិមានតម្លៃ ដែលលោកនាយករដ្ឋមន្ដ្រីហ៊ុនសែន រំឭកប្រាប់អ្នកសារព័ត៌មានជាង១ពាន់នាក់ នៅក្នុងពិធីជួបជុំមួយកាលពីថ្ងៃសៅរ៍ ទី១៤មករា។ លោកថែមទាំងបានលើកឡើងទៀតថា គឺដោយសារតែអ្នកសារព័ត៌មាន ទើបលោកអាចកាន់តំណែងជានាយករដ្ឋមន្ដ្រីនៃកម្ពុជាបានជាង៣០ឆ្នាំ។
តាមរយៈសុន្ទរកថាជាង១ម៉ោង លោក ហ៊ុន សែន នាយករដ្ឋមន្ដ្រី ហាក់បានយល់យ៉ាងស៊ីជម្រៅពីការងាររបស់អ្នកសារព័ត៌មាននិងស្ថាប័នព័ត៌មាននៅកម្ពុជា មិនថារឿងល្អឬរឿងអាក្រក់ឡើយ។ ប៉ុន្តែយ៉ាងណាក៏ដោយ ប្រមុខរដ្ឋាភិបាលកម្ពុជាបានរំលង ភ្លេចរំឭកពីបញ្ហាប្រឈមមួយចំនួន ដែលអ្នកកាសែតជួបប្រទះនៅក្នុងការបំពេញការងារ។ នោះគឺ៖ ការរើសអើង ការគម្រាមកំហែង និងអំពើហិង្សាលើអ្នកកាសែត នៅក្នុងពេលចុះបំពេញភារកិច្ច។
និយាយពីការរើសអើង។ ជារឿយៗ គេតែងតែឮព័ត៌មានថា អ្នកកាសែតនៅស្រុកខ្មែរ ដោយចំពោះស្ថាប័នកាសែតដែលនិយមរិះគន់រដ្ឋាភិបាល ត្រូវអាជ្ញាធរបដិសេធមិនផ្ដល់សម្ភាស ឬមិនអនុញ្ញាតឲ្យចូលរួមនៅក្នុងកម្មវិធីមួយចំនួនរបស់រដ្ឋាភិបាល។ ប៉ុន្តែមែនទែនទៅ ហេតុការណ៍ដូចគ្នានេះក៏កើតឡើងផងដែរ លើអ្នកកាសែតពីស្ថាប័នដែលមាននិន្នាការស្និទ្ធនឹងរដ្ឋាភិបាល ពីសំណាក់គណបក្សប្រឆាំងនិងអ្នកគាំទ្រគណបក្សប្រឆាំង។
ចំពោះការគម្រាមកំហែងវិញ អ្នកកាសែតជួបតាំងពីការគម្រាមប្ដឹងផ្ដល់ រហូតដល់គម្រាមបាញ់សម្លាប់។ ដែលនេះ វាបានធ្វើឲ្យប៉ះពាល់ដល់សេរីភាពសារព័ត៌មាន ដែលត្រូវបានធានាដោយច្បាប់។ អ្នកកាសែតខ្លះ មិនគ្រាន់តែត្រូវបានរើសអើង និង គម្រាមកំហែងប៉ុនណោះទេ ពួកគេថែមទាំងត្រូវបានដកហូតសម្ភារៈផលិតព័ត៌មាន និងរងការវាយដំថែមទៀត។
ជាការពិតហើយថា រហូតមកទល់ពេលនេះ សេរីភាពសារព័ត៌មាននៅកម្ពុជា បានរីកចម្រើនលូលលាស់ទៅមុខគួរឲ្យកត់សម្គាល់ បើប្រៀបធៀបទៅនឹងពីរទសវត្សរ៍មុន ដែលកម្ពុជាចាប់ផ្ដើមបើកចំហទៅកាន់លទ្ធិប្រជាធិបតេយ្យ។ បើទោះបីជាយ៉ាងណាក្ដី សុវត្ថិភាពរបស់អ្នកកាសែតនៅតែជាបញ្ហាដ៏ធំធេងមួយដែលត្រូវដោះស្រាយ។ អ្នកកាសែតជាប់ពន្ធនាគារ អ្នកកាសែតត្រូវគេសម្លាប់ អ្នកកាសែតរងការគម្រាមកំហែង ឬរងការធ្វើទុក្ខបុកម្នេញ នៅតែកើតឡើងដដែលៗ និងជាប់ជាប្រចាំ។ បញ្ហាទាំងនេះបានធ្វើឲ្យចំណាត់ថ្នាក់សេរីភាពសារព័ត៌មាននៅកម្ពុជា នៅលើឆាកអន្ដរជាតិ ស្ថិតនៅក្នុងលំដាប់មិនសូវល្អប៉ុន្មានឡើយ។
ក្នុងន័យនេះ មន្ដ្រីរដ្ឋាភិបាល អាជ្ញាធរ និងស្ថាប័នពាក់ព័ន្ធ គួរតែចាប់ផ្ដើមផ្លាស់ប្ដូរឥរិយាបថចំពោះអ្នកកាសែត ដោយគួរចាត់ទុកអ្នកកាសែតជាដៃគូសហការក្នុងការអភិវឌ្ឍសង្គម មិនមែនជាបន្លានៅក្នុងកែវភ្នែកឡើយ។ ការបើកចិត្តឲ្យទូលាយទទួលយកវប្បធម៌ពហុគំនិត ដែលជាមូលដ្ឋានគ្រឹះនៃលទ្ធិប្រជាធិបតេយ្យ ក៏ជាកត្តាសំខាន់ផងដែរ ក្នុងការធានាសុវត្ថិភាពអ្នកកាសែត ធ្វើយ៉ាងណាឲ្យពួកគេអាចបំពេញតួនាទីបានពេញលេញ។
ចំណែកអ្នកកាសែតខ្លួនឯង ដែលអះអាងថា ជាអ្នកសារព័ត៌មានអាជីព ត្រូវតែចាប់ផ្ដើមពង្រឹងខ្លួនឯងឲ្យបានរឹងមាំ តាមរយៈការគោរពក្រមសីលធម៌វិជ្ជាជីវៈឲ្យបានខ្ជាប់ខ្ជួន។ នៅក្នុងទិសដៅនេះ ម្ចាស់ស្ថាប័នសារព័ត៌មានទាំងឡាយ គួរតែគិតគូរដល់ជីវភាពអ្នកកាសែត និងពង្រឹងឯករាជភាពនៃស្ថាប័នរបស់ខ្លួនជាចាំបាច់។ ព្រោះសូមកុំភ្លេចថា សារព័ត៌មាន ដែលជាអំណាចទី៤ ឥឡូវនេះដើរតួកាន់តែសំខាន់ឡើងៗនៅក្នុងសង្គមខ្មែរ។ ទាំងនៅក្នុងការផ្ដល់ព័ត៌មានដល់ម្ចាស់ឆ្នោតអំពីការប្រព្រឹត្តរបស់អ្នកនយោបាយ និងទាំងការផ្សាយការពិត ធ្វើជាកញ្ចក់ឆ្លុះបញ្ចាំងពីសេចក្ដីត្រូវការរបស់ពលរដ្ឋដល់អ្នកនយោបាយនិងអ្នកដឹកនាំ ដើម្បីឈានទៅរកការសម្រេចចិត្តដ៏ត្រឹមត្រូវ។ ការផ្សព្វផ្សាយព័ត៌មានបញ្ចើចបញ្ចើ ប្រជាភិថុតិ ដើម្បីតែប្រយោជន៍បុគ្គល គឺជារឿងហួសសម័យហើយនៅក្នុងបរិបថដែលពលរដ្ឋខ្មែរកាន់តែច្រើនឡើង ចាប់ផ្ដើមយល់ពីសច្ចភាពនៃព័ត៌មាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ