ចៅក្រមបញ្ចប់ការសួរចម្លើយលោកកឹម សុខា បើទោះបីគ្មានមេធាវីចូលរួម
ម្សិលមិញ លោកគី ឫទ្ធី ចៅក្រមស៊ើបសួរសាលាដំបូងរាជធានីភ្នំពេញ បានចុះទៅសួរយកចម្លើយពីលោកកឹម សុខា ដោយផ្ទាល់ម្តងទៀតនៅពន្ធនាគារត្រពាំងផ្លុងក្នុងខេត្តត្បូងឃ្មុំ។ ការចុះសួរចម្លើយលើកនេះ គឺគ្មានមេធាវីការពារក្តីលោកកឹម សុខា ចូលរួមឡើយ។ បើទោះជាបែបនេះក្តី ចៅក្រមស៊ើបសួរនៅតែបន្តនីតិវិធីសួរចម្លើយរហូតដល់ចប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
នេះគឺជាលើកទីបីហើយ ដែលចៅក្រមស៊ើបសួរសាលាដំបូងរាជធានីភ្នំពេញបានចុះទៅសួរចម្លើយលោកកឹម សុខាដោយផ្ទាល់នៅក្នុងពន្ធនាគារត្រពាំងផ្លុង។ ក៏ប៉ុន្តែលើកនេះ ខុសពីលើកមុនៗ។ ខុសគ្នាដោយសារតែក្រុមមេធាវីការពារក្តីបានសម្រេចគ្នាមិនចូលរួមឡើយ ដោយហេតុថាគោរពតាមឆន្ទៈលោកកឹម សុខា។ លោកកឹម សុខា ដែលតាមរយៈក្រុមមេធាវី បានស្នើសុំឲ្យចៅក្រមសួរចម្លើយលោកនៅក្នុងតុលាការជាជាងនៅក្នុងពន្ធនាគារ។ សម្រាប់លោកកឹម សុខា ការសួរចម្លើយនៅក្នុងពន្ធនាគារ គឺធ្វើឲ្យលោកមានអារម្មណ៍មិនសន្តិសុខក្នុងការឆ្លើយនឹងសំណួររបស់ចៅក្រម។ ចំណែកសម្រាប់ក្រុមមេធាវីវិញ ពួកគេអះអាងថា ការធ្វើនីតិវិធីនៅក្នុងពន្ធនាគារគឺសិទ្ធិរបស់ពួកគេត្រូវបានកាត់បន្ថយមួយចំនួន។ ប៉ុន្តែការស្នើសុំនេះត្រូវបានចៅក្រមបដិសេធចោល។
បើទោះបីការសួរចម្លើយជាលើកទីបីនេះ មិនមានមេធាវីចូលរួមក៏ដោយ ក៏ចៅក្រមស៊ើបសួរលោកគី ឫទ្ធីនៅតែបានបន្តនីតិវិធីរបស់ខ្លួនបានដដែល។ នេះបើតាមការបញ្ជាក់ពីលោកអ៊ី រិន្ធ ប្រធានលេខាធិការដ្ឋានរដ្ឋបាលនៃសាលាដំបូងរាជធានីភ្នំពេញ ខណៈលោកគី ឫទ្ធីផ្ទាល់មិនអាចទាក់ទងសុំការបកស្រាយបានទេចំពោះបញ្ហានេះ។ នៅត្រង់ចំណុចនេះ លោកមេធាវីសំ សុគង់ ក៏បានបញ្ជាក់ដែរថា ការសួរចម្លើយលោកកឹម សុខា កាលពីថ្ងៃព្រហស្បតិ៍ ពិតជាបានប្រព្រឹត្តទៅបានមែន។ នេះ បើតាមលោកសំ សុគង់ គឺចៅក្រមស៊ើបសួរអាចសាកសួរជនសង្ស័យបាន បើសិនជនសង្ស័យយល់ព្រមឆ្លើយដោយលះបង់សិទ្ធិត្រូវការមេធាវីចូលរួម។
សូមបញ្ជាក់ថា លោកកឹម សុខា ត្រូវបានអាជ្ញាធររដ្ឋាភិបាលចាប់ខ្លួននិងឃុំខ្លួនភ្លាមៗកាលពីដើមខែកញ្ញា ឆ្នាំ២០១៧ ក្រោមការចោទប្រកាន់ពីបទសហការជាមួយបរទេសក្បត់ជាតិខ្លួនឯង។ ក្រោយការចាប់ខ្លួនលោកប៉ុន្មានសប្តាហ៍ គណបក្សសង្រ្គោះជាតិរបស់លោកក៏ត្រូវបានតុលាការកំពូលសម្រេចរំលាយចោល ហើយសហការីរបស់លោកចំនួន១១៨នាក់រួមទាំងលោកផងក៏ត្រូវបានកាត់សិទ្ធិធ្វើនយោបាយ៥ឆ្នាំផងទៀតក្រោមបទចោទដូចគ្នានេះ។ បន្ទាប់ពីលោកកឹម សុខា ត្រូវបានឃុំខ្លួននៅក្នុងពន្ធនាគារ ក្រុមមេធាវីរបស់លោកចំនួន៨នាក់បានដាក់សំណើសុំនៅក្រៅឃុំតាំងតុលាការជាន់ទាបរហូតដល់តុលាការកំពូល ប៉ុន្តែត្រូវបានច្រានចោលជាបន្តបន្ទាប់។
ក្រៅពីការខិតខំតាមផ្លូវតុលាការក្នុងស្រុក ក្រុមអតីតអ្នកតំណាងរាស្រ្តគណបក្សប្រឆាំង ពិសេសកូនស្រីលោកផ្ទាល់តែម្តងក៏ធ្វើយុទ្ធនាការនៅក្រៅប្រទេសដើម្បីទាមទារឲ្យដោះលែងលោកព្រមទាំងទាមទារឲ្យដំណើរការគណបក្សសង្រ្គោះជាតិឡើងវិញ។ ជាលទ្ធផលសហរដ្ឋអាមេរិកបានសម្រេចលែងផ្តល់ទិដ្ឋាការដល់មន្រ្តីរដ្ឋាភិបាលកម្ពុជាមួយចំនួន និងបានបញ្ឈប់ជំនួយដល់គណៈកម្មាធិការជាតិរៀបចំការបោះឆ្នោតកម្ពុជា។ រីឯសហភាពអឺរ៉ុបក៏បានសម្រេចផ្តាច់ជំនួយដល់គណៈកម្មាធិការជាតិរៀបចំការបោះឆ្នោតផងដែរ ហើយសភាអឺរ៉ុបក៏បានស្នើឲ្យគណៈកម្មការអឺរ៉ុបព្យួរប្រព័ន្ធអនុគ្រោះពន្ធ និងចង់ឲ្យបិទទិដ្ឋាការនិងបង្កក់ទ្រព្យសម្បត្តិមន្រ្តីកម្ពុជាមួយចំនួនដែលទទួលខុសត្រូវលើរឿងរ៉ាវទាំងអស់នេះថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ