សំណុំរឿងស្ត្រីអ្នកភូមិបឹងកក់នឹងប្រកាសសាលក្រមនៅថ្ងៃទី២៦ មករា
បន្ទាប់ពីជំនុំជម្រះពេញមួយរសៀលថ្ងៃព្រហស្បតិ៍នេះ ចៅក្រមតុលាការសាលាឧទ្ធរណ៍បានសម្រេចថា សាលក្រមវិនិច្ឆ័យលើសំណុំរឿងស្ត្រីអ្នកភូមិបឹងកក់ចំនួន១០នាក់ និងអតីតព្រះសង្ឃមួយអង្គនឹងប្រកាសឲ្យដឹងនៅថ្ងៃទី២៦ មករាខាងមុខនេះ។ អង្គការការពារសិទ្ធិមនុស្សដែលបានចូលរួមឃ្លាំមើលសវនាការនេះ លើកឡើងថា ដំណើរការសវនាការហាក់មិនមានភាពប្រក្រតី ប៉ុន្តែរំពឹងថា ជនជាប់ចោទទាំងនោះនឹងត្រូវដោះលែងឲ្យមានសេរីភាពឡើងវិញ។
ចុះផ្សាយនៅថ្ងៃ៖
ស្តាប់ - ០២:៣៩
គឺបន្ទាប់ពីធ្វើការសាកសួរជនជាប់ចោទទាំងនោះអស់ជាច្រើនម៉ោងមក ចៅក្រមតុលាការសាលាឧទ្ធរណ៍បានប្រកាសថា សាសក្រមលើសំណុំរឿងនេះនឹងប្រកាសឲ្យដឹងនៅព្រឹកថ្ងៃទី២៦ មករា ខាងមុខនេះ។ ជាសាលក្រមសម្រេចជោគវាសនាជនជាប់ចោទទាំងនោះ មានសេរីភាពឡើងវិញឫត្រូវមានទោសតាមសេចក្តីសម្រេចរបស់សាលាដំបូងរាជធានីភ្នំពេញ។
ជាការកត់សម្គាល់ សវនាការនៅថ្ងៃនេះ មានចូលរួមឃ្លាំមើលពីសំណាក់អង្គទូតនានានៅក្នុងប្រទេសកម្ពុជា អង្គការការពារសិទ្ធិមនុស្ស និង មានវត្តមានលោកសុរិយា ប្រាសាទ ស៊ូប៊ែឌី អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជាផងដែរ។ ប៉ុន្តែលោកស៊ូប៊ែឌី បានចាកចេញពីបន្ទប់សវនាការ ក្រោយពីចូលរួមស្ដាប់ប្រមាណជិតពីរម៉ោងរួចមក ហើយលោកមិនបានធ្វើការអត្ថាធិប្បាយបែបណានោះទេចំពោះដំណើរការសវនាការនៅថ្ងៃនេះ។ ជាមួយគ្នានេះដែរ នៅខាងក្រៅរបងតុលាការឯណោះវិញ ក្រុមប្រជាពលរដ្ឋ និងសាច់ញាតិជនជាប់ចោទជាច្រើននាក់បានប្រមូលផ្តុំគ្នាទាមទារឲ្យតុលាការដោះលែងអ្នកជាប់ចោទទាំងនោះ។
យ៉ាងណាក៏ដោយ អង្គការការពារសិទ្ធិមនុស្សនៅកម្ពុជាដែលបានចូលរួមស្ដាប់សវនាការ បានលើកឡើងថា ដំណើរការសវនាការនៅថ្ងៃនេះ បានប្រព្រឹត្តទៅហាក់មិនមានភាពប្រក្រតីនោះឡើយ។ លោកណៃ វង់ដា អនុប្រធានស៊ើបអង្កេតរបស់សមាគមអាដហុកបានកត់សម្គាល់ថា ចៅក្រម និងព្រះរាជអាជ្ញា បានសួរសំណួរជាច្រើនដាក់បន្ទុកលើជនជាប់ចោទ តែមិនបានផ្តល់សិទ្ធិគ្រប់គ្រាន់ដល់ជនជាប់ចោទក្នុងការឆ្លើយដោះបន្ទុកនោះឡើយ។ រីឯស្ត្រីជាប់ចោទដែលឆ្លៀតពេលមកបន្ទប់ទឹក ក៏បានថ្លែងប្រាប់អ្នកាសែតដូចគ្នានោះដែរ។
មិនតែប៉ុណ្ណោះ បើតាមលោកណៃ វង់ដា ដដែល ចៅក្រមមិនអនុញ្ញាតឲ្យចាក់បង្ហាញខ្សែវីឌីអូបង្ហាញពីសកម្មភាពស្ត្រីអ្នកភូមិបឹងកក់ធ្វើការតវ៉ាតាមការស្នើសុំរបស់ក្រុមមេធាវីការពារក្តីជនជាប់ចោទនោះទេ។ លោកអំ សំអាតប្រធានបច្ចេកទេសឃ្លាំមើលការរំលោភសិទ្ធិមនុស្សរបស់អង្គការលីកាដូ បានបន្ថែមថា មិនត្រឹមតែមិនចាក់បង្ហាញខ្សែវីឌីអូទេ ហើយចៅក្រមក៏មិនមានបង្ហាញភស្តតាងណាផងដែរ។
សូមបញ្ជាក់ថា ជនជាប់ចោទទាំងនោះ ត្រូវបានតុលាការសាលាដំបូងរាជធានីភ្នំពេញកាលពីអំឡុងខែវិច្ឆិកា ឆ្នាំ២០១៤ បានសម្រេចផ្ទន្ទាទោសឲ្យជាប់ពន្ធនាគារក្នុងម្នាក់ៗរយៈពេលមួយឆ្នាំ និងពិន័យជាប្រាក់ចំនួន២ លានរៀល ពីបទធ្វើឲ្យកកស្ទះចរាចរណ៍ និងប្រឆាំងមន្ត្រីរាជការសាធារណៈ បន្ទាប់ពីពួកគេចេញតវ៉ាបិទផ្លូវនៅមុខសាលារាជធានីភ្នំពេញ រឿងទឹកលិចផ្ទះរបស់ខ្លួន។
ចំពោះសាលក្រមខាងមុខនេះ ទាំងលោកណៃ វង់ដា និងលោកអំ សំអាត បានសម្តែងសុទុដ្ឋិនិយមថា សាលាឧទ្ធរណ៍នឹងដោះលែងអ្នកទាំងនោះឲ្យមានសេរីភាពឡើងវិញ បើសិនចៅក្រមតុលាការមួយនេះ ជម្រះក្តីផ្អែកលើផ្លូវច្បាប់នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ