ខ្មែរកម្ពុជាក្រោម ប្រារព្ធខួប៦៨ ឆ្នាំ នៃការបាត់បង់ទឹកដី
តំណាងព្រះមហាក្សត្រកម្ពុជា ព្រះបាទនរោត្តមសីហមុនី គណបក្សនយោបាយ និងពលរដ្ឋខ្មែរកម្ពុជាក្រោម រាប់រយនាក់ នៅថ្ងៃនេះ បានជួបជុំគ្នានៅវត្តចាស់ សង្កាត់ជ្រោយចង្វារ ខណ្ឌជ្រោយចង្វារ ដើម្បីប្រារព្ធខួប៦៨ឆ្នាំនៃការបាត់បង់ទឹកដីខ្មែរកម្ពុជាក្រោម។ ថ្លែងនៅក្នុងពិធីនេះ ប្រធានសហគមន៍ខ្មែរកម្ពុជាក្រោម បានរៀបរាប់ពីទុក្ខវេទនារបស់ពលរដ្ឋ និងព្រះសង្ឃខ្មែរកម្ពុជាក្រោម ដែលត្រូវអាជ្ញាធរវៀតណាមធ្វើទុក្ខបុកម្នេញជាប្រចាំ និងបានអំពាវនាវឲ្យមានការរួមគ្នា ទារយកទឹកដីខ្មែរកម្ពុជាក្រោមមកវិញ។
ចុះផ្សាយនៅថ្ងៃ៖
៤ មិថុនា ឆ្នាំ ១៩៤៩ - ៤ មិថុនា ឆ្នាំ ២០១៧ គឺជាខួប ៦៨ឆ្នាំដែលអាណានិគមបារាំង បានកាត់ផ្ទេរទឹកដីខ្មែរកម្ពុជាក្រោម ដែលមានខេត្តសរុបចំនួន២១ខេត្តទៅឲ្យវៀតណាម។
ថ្លែងក្នុងកម្មវិធីខួប៦៨ ឆ្នាំនៃការបាត់បង់ទឹកដីខ្មែរកម្ពុជាក្រោម លោក ថាច់ សេដ្ឋា នាយកប្រតិបត្តិសមាគមខ្មែរកម្ពុជាក្រោម បានរំឭកឡើងវិញនូវប្រវត្តិសាស្រ្ត ការឈឺចាប់របស់ពលរដ្ឋខ្មែរកម្ពុជាក្រោម ដោយសារតែការធ្វើទុក្ខបុកម្នេញពីរដ្ឋាភិបាលវៀតណាម និងការរិះគន់ទៅលើរដ្ឋាភិបាលកម្ពុជាផង ថាមិនបានអើពើ និងមិនសូវយកចិត្តទុកដាក់លើប្រជាពលរដ្ឋខ្មែរក្រោម។
មិនខុសគ្នាដែរ លោកកឹម ស៊ីសំណាង តំណាងអង្គការសមាគមខ្មែរកម្ពុជាក្រោម អះអាងថា បច្ចុប្បន្ន សិទ្ធសេរីភាពនៃជំនឿនិងសាសនា ការសិក្សាអប់រំ ក៏ដូចជាសិទ្ធិសេរីភាពក្នុងការទទួលបានព័ត៌មានត្រូវបានរឹតត្បិត ហើយមិនមានភាពល្អប្រសើរគួរឲ្យកត់សម្គាល់នោះទេ។ ចំណែកជីវភាពរស់នៅរបស់ពលរដ្ឋទៀតសោត ក៏នៅតែមានភាពដុនដាបដោយសារតែការរឹបអូសយកដីស្រែចំការរបស់អាជ្ញាធរវៀតណាម។
ក្រៅតែពីរំឮកពីភាពឈឺចាប់នៃការបាត់បង់ទឹកដី និងបញ្ហាប្រឈមរបស់ពលរដ្ឋខ្មែរកម្ពុជាក្រោម លោក ថាច់ សេដ្ឋា ថ្លែងថា នៅដើមសប្តាហ៍ក្រោយនេះ នឹងដឹកនាំសមាជិកចំនួនជាង២០០ នាក់ ដើម្បីហែរញ្ញត្តិទៅរដ្ឋសភា សុំដាក់បញ្ចូលថ្ងៃទី ៤ មិថុនា ជាទិវាកាន់ទុក្ខជាតិ។ ជាទិវាដែលលោក អះអាងថា មានសារៈសំខាន់ណាស់ ព្រោះថាវាជាការរំឮកឲ្យកូនខ្មែរជំនាន់ក្រោយៗចងចាំនូវថ្ងៃដែលបាត់បង់ទឹកដីកម្ពុជាក្រោម។ ក៏ប៉ុន្តែការហែរញ្ញត្តិនេះ មិនត្រូវបានសាលារាជធានីភ្នំពេញ អនុញ្ញាត្តិនោះឡើយ ដោយចាត់ទុកថាជាសកម្មភាពដែលអាចប៉ះពាល់ដល់សន្តិសុខ និងសណ្តាប់ធ្នាប់សាធារណៈ ហើយអាចបង្កឲ្យមានការកកស្ទះចរាចរណ៍។
លោក មាស ម៉េត្រភក្តី អ្នកនាំពាក្យសាលារាជធានីភ្នំពេញ ពន្យល់ថា សមាគមខ្មែរកម្ពុជាក្រោម គួរជ្រើសរើសវិធីសាស្រ្តផ្សេងដើម្បីដាក់ញ្ញត្តិទៅរដ្ឋសភាដើម្បីបញ្ចៀសបញ្ហានានា ហើយសាលារាជធានីជឿជាក់ថាសមាគមនឹងមិនល្មើសសេចក្តីណែនាំរបស់អាជ្ញាធរនោះឡើយ។
បើតាមឯកសាររបស់សហគមន៍នេះ ទឹកដីកម្ពុជាក្រោមមានផ្ទៃដី ៦៨,៩៦៥គីឡូម៉ែត្រក្រឡា ហើយបច្ចុប្បន្នមានប្រជាជនរស់នៅជាង ១៤លាននាក់ មានវត្តអារាមពុទ្ធសាសនា ៥៦៧វត្ត និងមានព្រះសង្ឃខ្មែរជាង ២ម៉ឺនអង្គគង់នៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ