សហគមន៍ខ្មែរកម្ពុជាក្រោមទៅទទួលយកឯកសារប្រវត្តិសាស្ត្រទឹកដីខ្មែរកម្ពុជាក្រោមពីបារាំង
ឯកសារស្តីពីប្រវត្តិសាស្ត្រទឹកដីខ្មែរកម្ពុជាក្រោមដែលតម្កល់ទុកនៅក្នុងបណ្ណាល័យជាតិបារាំង នឹងត្រូវប្រគល់មកអោយសហគមន៍ខ្មែរកម្ពុជាក្រោម ទៅតាមសំណើររបស់សហគមន៍នេះ កាលពីខែតុលាឆ្នាំ២០១។ លោក ថាច់ សេដ្ឋា ប្រធានសហគមន៍ខ្មែរកម្ពុជាក្រោម នឹងចាកចេញពីប្រទេសកម្ពុជាឆ្ពោះទៅកាន់ប្រទេសបារាំង នៅរសៀលថ្ងៃសុក្រ ទី៣០មករានេះ ដើម្បីទទួលយកឯកសារទាំងនោះ។
ចុះផ្សាយនៅថ្ងៃ៖
ស្តាប់ - ០២:១០
ជាការឆ្លើយតបទៅនឹងសំណើររបស់សហគមន៍ខ្មែរកម្ពុជាក្រោម កាលពីខែតុលាឆ្នាំទៅ ស្ថានទូតបារាំងប្រចាំនៅកម្ពុជា បានសម្រេចបើកផ្លូវឲ្យ លោក ថាច់ សេដ្ឋា ប្រធានសហគមន៍ខ្មែរកម្ពុជាក្រោមធ្វើដំណើរទៅកាន់ប្រទេសបារាំង ដើម្បីនាំយកឯកសារទាក់ទងនឹងប្រវត្តិសាស្ត្រទឹកដីខ្មែរកម្ពុជាក្រោមមកកាន់ប្រទេសកម្ពុជា។
សេចក្តីសម្រេចរបស់រដ្ឋាភិបាលបារាំងតាមរយៈស្ថានទូតបារាំងប្រចាំនៅទីក្រុងភ្នំពេញ បានធ្វើឡើងតាំងពីដើមខែតុលាឆ្នាំ២០១៤មកម្លេះ ប៉ុន្តែទើបតែពេលនេះ ប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា ដែលអមដោយព្រះសង្ឃខ្មែរកម្ពុជាក្រោមមួយអង្គ គង់នៅសហរដ្ឋអាមេរិក និងតំណាងពលរដ្ឋខ្មែរកម្ពុជាក្រោមពីរនាក់មកពីប្រទេសអូស្ត្រាលី ទៅទទួលយកឯកសារទាំងនោះ ពីបណ្ណាល័យជាតិ អូទ្រើមែ (Outre-Mer) ស្ថិតនៅទីក្រុងម៉ាក់សី ប្រទេសបារាំង។
លោក ថាច់ សេដ្ឋា បានបញ្ជាក់ថា យុទ្ធនាការប្រមូលឯកសារទាក់ទងនឹងប្រវត្តិសាស្ត្រទឹកដីខ្មែរកម្ពុជាក្រោមពីប្រទេសបារាំងនេះ មានគោលបំណងបី៖ ទី១- គឺដើម្បីបញ្ជាក់និងឆ្លើយតបទៅនឹងការអះអាងរបស់អ្នកនាំពាក្យស្ថានទូតវៀតណាម លោក ត្រឹង វ៉ាន់ថុង ទី២-គឺដើម្បីយល់ដឹងពីសន្ធិសញ្ញានិងកិច្ចព្រមព្រៀងផ្លូវការនានាដែលបារាំងបានធ្វើជាមួយវៀតណាម ឈានទៅដល់ការសម្រេចកាត់ទឹកដីខ្មែរកម្ពុជាក្រោមនៅឆ្នាំ១៩៤៩ ដោយរបៀបណាខ្លះ? និងទី៣-គឺដើម្បីរក្សាទុកជាឯកសារសំរាប់សិក្សាស្រាវជ្រាវ។
គួររំលឹកជូនថា សហគមន៍ខ្មែរកម្ពុជាក្រោម រួមទាំងក្រុមសម្ព័ន្ធយុវជន បានដឹកនាំបាតុកម្មនៅមុខស្ថានទូតវៀតណាមប្រចាំនៅទីក្រុងភ្នំពេញជាបន្តបន្ទាប់កាលពីខែវិច្ឆិការ ដើម្បីអោយមានការបកស្រាយ ក្រោយពីការអះអាងរបស់លោក ត្រឹង វ៉ាន់ថុង អ្នកនាំពាក្យស្ថានទូតវៀតណាមប្រចាំនៅកម្ពុជា ដែលបានអះអាងថា ទឹកដីខ្មែរកម្ពុជាក្រោមជារបស់វៀតណាមតាំងពីយូមកហើយ។
ដើម្បីបញ្ជាក់រឿងនេះអោយកាន់តែច្បាស់ លោក ថាច់ សេដ្ឋា ក៍បានដាក់ញត្តិទៅកាន់ស្ថានទូតបារាំងកាលពីដើមខែសីហាឆ្នាំ២០១៤ ដើម្បីស្នើឲ្យរដ្ឋាភិបាលបារាំងបញ្ជាក់អំពីកិច្ចព្រមព្រៀងនានា ដែលឈានដល់ការធ្វើសេចក្តីសម្រេចក្នុងការកាត់ទឹកដីកម្ពុជាក្រោម ទៅឲ្យវៀតណាមនៅឆ្នាំ១៩៤៩នោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ