សែនក្បាលទឹកប៉ះពាល់ដល់វប្បធម៌ខ្មែរ តែចៀសមិនរួចខានមិនបាន
ចុះផ្សាយនៅថ្ងៃ៖
ស្តាប់ - ០៤:២៩
ប្រជាជនខ្មែរកាត់សែស្រឡាយចិនកាន់តែច្រើនត្រៀមខ្លួនរួចជាស្រេចដើម្បីរៀបចំសែនក្បាលទឹកឬភ្ជុំចិននៅថ្ងៃស្អែក។ ការសែនក្បាលទឹកនេះត្រូវបានគេធ្វើតៗគ្នា តាមប្រពៃណីចិនសុទ្ធសាធ។ តាមជំនឿ ការខកខានមិនបានប្រារព្ធពិធីនេះ ក្នុងឆ្នាំណាមួយប្រជាជនចិន និងកូនកាត់ចិនតែងយល់ថានឹងជូបប្រទះនូវគ្រោះកាច កុងម៉ានិងញាត្តិកាទាំង៧ សណ្តានរបស់គេ ពុំបានទទួលសំណែន ដូច្នេះនឹងកើតក្តីទោមនស្ស មិនតាមជួយថែរក្សារឺជ្រោមជ្រែងក្នុងការរកស៊ីរបស់កូនចៅទៀតទេ។ ដោយឡែកនៅកម្ពុជាត្រូវគេមើលឃើញថាពិធីសែនក្បាលទឹកអាចជាការព្រួយបារម្ភមួយទាក់ទងទៅនឹងអនាគតវប្បធម៌និងប្រពៃណីខ្មែរ។
នៅថ្ងៃទី២៨សីហាស្អែកជនជាតិចិន និងពលរដ្ឋកាត់សែស្រឡាយចិនទូទាំងពិភពលោកនឹងនាំគ្នាប្រារព្ធពិធីសែនព្រេនដ៏ធំមួយទៀតប្រចាំឆ្នាំបន្ទាប់ពីពិធីបុណ្យចូលឆ្នាំចិន គឺពិធីសែនក្បាលទឹកជាភាសាចិនថា ចុង យាន ជា(Zhong Yuan Jie) ឬភ្ជុំចិន។ ប្រទេសកម្ពុជាក៏បានស្វាគមន៍ជាទូទៅនូវសកម្មភាពសែនព្រេននេះកាន់តែច្រើនទៅៗដែរ គ្រប់ច្រកល្ហក។
ជាទូទៅនៅក្នុងសង្គមខ្មែរមានទស្សនៈសំខាន់ៗផ្សេងៗគ្នា ដែលបង្ហាញពីការទទួលយកបាននិងចំណុចអវិជ្ជមានទាក់ទងទៅនឹងពិធីសែនក្បាលទឹកដែលជាពិធីប្រពៃណីជនជាតិចិននៅប្រទេសកម្ពុជា។
ចំណុចដែលមិនអាចបដិសេធបាននោះគឺការទទួលយកនូវចរន្តវប្បធម៌ប្រពៃណីមួយដែលជាវប្បធម៌ប្រឡាយកាត់ ដែលឥទ្ធិពលចិនមិនមែនសាយភាយតែក្នុងតំបន់ទេគឺទូទាំងពិភពលោក។ នៅកម្ពុជា អ្នកដែលមានឈាមជ័រកាត់ចិនមានកាន់តែច្រើន ក្នុងនោះក៏មានអ្នកប្រឹងសម្តែង ធ្វើជាចិនដែរ នៅថ្ងៃសែនចូលមកដល់ដើម្បីឲ្យគេមើលមកថាខ្លួនបានកាត់សែស្រឡាយចិន ឆ្លាត ពូកែរកស៊ី។ ហើយអាចនិយាយបានថាជាការធ្វើតាមៗគ្នាពីមួយឆ្នាំទៅមួយឆ្នាំ ដែលបានក្លាយទៅជាទម្លាប់។ មួយវិញទៀត ការដែលប្រារព្ធពិធីសែនក្បាលទឹកក៏ដូចជាសែនប្រពៃណីចិនផ្សេងទៀតដែរ បានធ្វើឲ្យរូបិយប័ណ្ណដែលសន្សំទុកក្នុងគ្រួសារនីមួយៗមានចរាចរចេញមកក្រៅតាមរយៈការដកប្រាក់សន្សំទិញឥវ៉ាន់។
ផ្ទុយទៅវិញ ត្រង់ចំណុចនេះពិធីសែនក្បាលទឹកក៏ជាផ្នែកមួយរួមចំណែកធ្វើឲ្យគ្រួសារមួយចំនួនមានការខាតបង់ផងដែរ ដោយសារតែត្រូវចំណាយប្រាក់ដើម្បីរៀបចំពិធី ដែលជាពេលវេលាខ្ជះខ្ជាយប្រាក់សម្រាប់អ្នកក្រ និងជាពេលវេលាចាយលុយឥតស្រណោះសម្រាប់អ្នកមានធនធាន។ មិនមែនខាតបង់តែគ្រួសារក្រីក្រនោះទេ រដ្ឋាបាលទាំងមូលក៏ត្រូវខាតបង់ដែរ ដោយសារមានការកត់សម្គាល់ថាមន្ត្រីរាជការដែលមានសែស្រឡាយចិនកន្លងមកបាន អវត្តមានពីកន្លែងធ្វើការ ឬក៏ធ្វើការមិនពេញដៃពេញជើង។
តាមធម្មតាការសែនព្រេន តែងមានការទិញសម្ភារៈ ឬរបស់របរពីទីផ្សារមករៀបចំ។ ជាការពិតរបស់របរខ្លះមិនបាត់បង់ទៅណាទេ គឺគ្រួសារនីមួយៗទទួលទានដោយខ្លួនឯងវិញ ជួបជុំមិត្តភក្តិ ក្រុមគ្រួសារយ៉ាងសប្បាយរីករាយ។ ក៏ប៉ុន្តែសំភារៈមួយចំនួនទៀតដែលជនជាតិចិនខានមិនបានគឺការដុតក្រដាស់សែន ដុតលុយដុល្លារហ្វូតូកូពីឬដុល្លារខ្មោចចោលទទេៗ។
ចំណុចនេះត្រូវគេមើលឃើញថាជាការខាតបង់ទៅវិញ ប្រៀបដូចជាដុតលុយចោលអញ្ចឹង ព្រោះថាក្រដាសសែនទាំងអស់នេះ ត្រូវយកលុយពិតទៅទិញពីទីផ្សារ។ សម្លឹងមើលទៅលើសេដ្ឋកិច្ចគ្រួសារធ្វើឲ្យគេនឹកឃើញថា នៅប្រទេសសិង្ហបុរី អតីតនាយករដ្ឋមន្ត្រីនិងជាស្ថាបនិកប្រទេសនេះ គឺលោក លី ក្វាន់យូ មិនបានលើកទឹកចិត្តឲ្យពលរដ្ឋសិង្ហបុរីដែលភាគច្រើនកាត់ចិន ទិញក្រដាស់សែនយកមកដុតចោល ធ្វើឲ្យខាងបង់ប្រាក់កាសនោះឡើយ។ ជាមួយគ្នានេះ ការជល់កែវ រហូតដល់ស្រវឹងអួទីនួ នៅថ្ងៃសែនក្បាលទឹកជាទូទៅត្រូវគេកត់សម្គាល់ថាបានបន្ថែមស្ថិតិកាន់តែច្រើននៃគ្រោះថ្នាក់ចរាចរ នៅក្នុងអំឡុងពេលនោះ។
ងាកទៅមើលផលប៉ះពាល់ផ្នែកវប្បធម៌វិញ ចង់មិនចង់ចិនបានរំលេចវប្បធម៌ប្រពៃណីរបស់ខ្លួន លើវប្បធម៌ខ្មែររួចទៅហើយតាមរយៈប្រជាជនខ្មែរដែលមានសែស្រឡាយចិន នេះបើតាមរូបភាពនៃការប្រារព្ធពិធីមួយចំនួនជារៀងរាល់ឆ្នាំដូចជាបុណ្យចូលឆ្នាំចិន សែនលោកខែ សែននំចាំង សែនឆេងម៉េង និងសែនក្បាលទឹកនេះជាដើម។
ទន្ទឹមគ្នានេះ ក្រុមអ្នកអភិរក្សវប្បធម៌ខ្មែរ ក៏សម្តែងនូវការព្រួយបារម្ភធំធេង ដោយសារខ្មែរបានប្រកាន់យកទ្រឹស្តី«វប្បធម៌រលត់ជាតិរលាយ វប្បធម៌ពណ្ណរាយ ជាតិថ្កើងថ្កាន»។ ទោះយ៉ាងនេះក្តីគេពិតជាមិនអាចធ្វើអ្វីបានទេ ដោយសារទី១ ចរន្តសកលភាវូបនីយកម្មនៃវប្បធម៌ ទី២ភាពមិនរឹងមាំរបស់ខ្មែរក្នុងការកំណត់ដែនវប្បធម៌ប្រពៃណីបរទេសចូលមកក្នុងស្រុកខ្មែរ។ ម្យ៉ាងទៀតប្រទេសកម្ពុជាលើកទឹកចិត្តនិងមានគោលការណ៍បើកទូលាយដល់សេរីភាពក្នុងការគោរពប្រពៃណី វប្បធម៌ និងសាសនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ