តុលាការបន្តនីតិវិធីចំពោះអ្នកចោទរដ្ឋាភិបាលសម្លាប់លោក កែម ឡី ជាបន្តបន្ទាប់
ពីរថ្ងៃជាប់គ្នាហើយ ដែលតុលាការបានបន្តនីតិវិធីចំពោះអ្នកចោទរដ្ឋាភិបាលសម្លាប់លោក កែម ឡី ជាបន្តបន្ទាប់ ។ ម្សិលមិញ សាលាឧទ្ធរណ៍បានបើកសវនាការលើសំណុំលោកស្រី ថាក់ ឡានី រីឯលោក គឹម សុខ ត្រូវបានសាលាដំបូងផ្តន្ទាទោសដាក់ពន្ធនាគារ១៨ខែ និងពិន័យប្រាក់ជាង៨លានរៀល និងសង់សំណងជំងឺចិត្ត៨០០លានរៀល។ ចំណែកថ្ងៃសុក្រនេះសាលាឧទ្ធរណ៍បើកសវនាការលើសំណុំរឿងរបស់លោក សម រង្ស៊ី។ ឆ្លៀតពេលនេះ អេង គីមហុង សូមរម្លឹករឿងក្ដីក្ដាំទាំងនេះឡើងវិញ។
ចុះផ្សាយនៅថ្ងៃ៖
ស្តាប់ - ០១:៥៩
សំណុំរឿងលោក សម រង្ស៊ី ដែលត្រូវបានសាលាឧទ្ធរណ៍បើកសវនាការនៅថ្ងៃនេះគឺធ្វើឡើងបន្ទាប់ពីសាលាដំបូងរាជធានីភ្នំពេញ ប្រកាសសាលក្រមផ្តន្ទាទោសលើរូបលោករួចហើយដាក់ពន្ធនាគារ១ឆ្នាំ៨ខែ ពិន័យ១០លានរៀល និងសងសំណង១០០រៀល។ ប្រសាសន៍លោក សម រង្ស៊ី កាលណោះលើកឡើងភ្លាមៗតាមរយៈសំណេលើហ្វេសបុកចំថ្ងៃគេបាញ់សម្លាប់ លោក កែម ឡី នៅថ្ងៃទី១០កក្កដា នោះថា «ការបាញ់សម្លាញ់លោក កែម ឡី ថ្ងៃនេះ ជាអំពើភេវកម្មមួយទៀត រៀបចំដោយរដ្ឋអំណាច។»
បន្ទាប់មកមិនយូរប៉ុន្មានលោកស្រី ថាក់ ឡានី សមាជិកព្រឹទ្ធសភាគណបក្សសម រង្ស៊ី ដែលបច្ចុប្បន្នគណបក្សនេះត្រូវបានប្ដូរឈ្មោះជាគណបក្សភ្លើងទៀនគឺពីខេត្តរតនគីរី លោកស្រី ថាក់ ឡានី បានថ្លែងទៅកាន់ពលរដ្ឋក្នុងវេទិកាមួយកាលពីថ្ងៃទី២៩ កក្កដា មានភស្តុតាងជាវីដេអូឃ្លីប ក្នុងន័យថា «អាឡូវហ្នឹង ហ៊ុន សែន មិនដឹងគិតម៉េចទៀតទេ នៅមិននៅ ចុះឡើង ចុះឡើង ទៅបាញ់លោក កែម ឡី អ្នកវិភាគនយោបាយ ឃើញទេ»។ សំណុំរឿងរបស់អ្នកទាំងពីរត្រូវបាន មេធាវីតំណាងដោយរដ្ឋាភិបាលចាត់ទុកថាជាការចោទប្រកាន់ មានចរិតញុះញង់បំផុសបំផុល ក្នុងចលនាបញ្ឆេះកំហឹង មហាជន និងប៉ះពាល់ដល់ដំណើរការនីតិវិធី របស់តុលាការ។
ហើយបច្ចុប្បន្នភាពនៃសំណុំរឿង លោកស្រី ថាក់ ឡានី គឺតាមរយៈសវនាការនៅថ្ងៃម្សិលមិញ សាលាឧទ្ធរណ៍បានសម្រេចលើកពេលប្រកាសសាលដីកាទៅថ្ងៃទី២៩ខែសីហាខាងមុខវិញ។ ក្នុងសំណុំរឿងនេះ លោកនាយករដ្ឋមន្ដ្រី ហ៊ុន សែន បានប្ដឹងទាមទារសំណងជំងឺចិត្តពីលោកស្រីថាក់ ឡានី ចំនួន១០០រៀល។ លោកស្រីក៏ត្រូវបានសាលាដំបូងផ្ដន្ទាទោសឲ្យជាប់ពន្ធនាគាររយៈពេល១ឆ្នាំ និងពិន័យ៨លានរៀលរួចហើយដែរ។ បច្ចុប្បន្នលោកស្រី ថាក់ ឡានី កំពុងរស់នៅក្រៅប្រទេស។
ចំណែកលោក គឹម សុខ តុលាការក្រុងភ្នំពេញនៅរសៀលថ្ងៃទី ១០ សីហាបានកាត់ទោស ឲ្យជាប់ពន្ធនាគាររយៈពេល១៨ខែ និងពិន័យជាប្រាក់ជាង ៨០៨ លានរៀលពីបទបរិហារកេរ្តិ៍ជាសាធារណៈ និង ញុះញង់ ឲ្យមានភាពវឹកវរដល់សន្តិសុខសង្គម។
ក្រៅពីសំណុំរឿងនេះ លោក គឹម សុខ នៅរងបណ្តឹងមួយករណីទៀតពីលោកនាយករដ្ឋមន្ត្រី ហ៊ុន សែន ដែលចោទប្រកាន់រដ្ឋាភិបាលកម្ពុជាសព្វថ្ងៃបង្កើតប្រព័ន្ធសម្លាប់មនុស្ស រួចរកឃាតកមិនដែលឃើញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ