សពលោក កែម ឡី នឹងដង្ហែចេញពីភ្នំពេញទៅស្រុកកំណើតនៅថ្ងៃអាទិត្យសប្ដាហ៍ក្រោយ
ជាថ្មីម្ដងទៀត គណៈកម្មការបុណ្យសព លោក កែម ឡី សម្រេចជាផ្លូវការ ថានឹងយកថ្ងៃអាទិត្យទី២៤ កក្កដា ជាការដង្ហែទៅបញ្ចុះនៅឯស្រុកកំណើត ស្ថិតនៅភូមិអង្គតាកុក ឃុំលាយបូរ ស្រុកត្រាំកក់ ខេត្តតាកែវ។ សេចក្ដីសម្រេចនេះ ធ្វើឡើងបន្ទាប់ពីគណៈកម្មការបានប្រកាសពន្យារពេលម្ដងរួចមកហើយកាលពីថ្ងៃសុក្រ សប្ដាហ៍មុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
សពលោក កែម ឡី នឹងចាប់ផ្ដើមដង្ហែចេញនៅម៉ោង៧ព្រឹកចេញពីវត្តពោធិយារាម ហៅវត្តចាស់តាមបណ្ដោយផ្លូវជាតិលេខបីឆ្ពោះទៅស្រុកត្រាំកក់។ នេះបើយោងតាមសេចក្ដីប្រកាសព័ត៌មានថ្មីរបស់គណៈកម្មការបុណ្យសព។
លោក ប៉ា ងួនទៀង សមាជិកមួយរូបនៃគណៈកម្មការបុណ្យសពលោក កែម ឡី ឲ្យដឹងថា កម្មវិធីដង្ហែសពនេះ នឹងមិនមានការប្រែប្រួលអ្វីទៀតនោះទេ ហើយគណៈកម្មការនឹងជូនដំណឹងទៅសាលារាជធានីជាថ្មីម្ដងទៀតនៅពេលក្រោយ។
លោក មាន ចាន់យ៉ាដា អ្នកនាំពាក្យសាលារាជធានីភ្នំពេញឲ្យដឹងថា សាលារាជធានីភ្នំពេញនឹងពិចារណាចំពោះការជូនដំណឹងនៃកម្មវិធីដង្ហែសពលោក កែម ឡី ជាថ្មីម្ដងទៀតបន្ទាប់ពីអាជ្ញាធរបានខកចិត្តម្ដងរួចមកហើយ ចំពោះកម្មវិធីប្រែប្រួលក្នុងការដង្ហែសពលោក កែម ឡី កាលពីសប្ដាហ៍មុនដោយពុំបានបញ្ជាក់មូលហេតុឲ្យបានច្បាស់លាស់។
ប៉ុន្តែយ៉ាងណាក៏ដោយ លោក ប៉ា ងួនទៀង បានប៉ាន់ស្មានជាជំហ៊ានដំបូងថា ការដង្ហែសពលោក កែម ឡី ទៅស្រុកកំណើតនេះអាចនឹងមានអ្នកចូលរួមរាប់ពាន់នាក់។ លោកថា អ្នកចូលរួមនឹងមានមធ្យោបាយធ្វើដំណើរដោយខ្លួនឯង។ លោកក៏មិនទាន់ដឹងថា ក្រោយយកសពទៅដល់ស្រុកកំណើតហើយគណៈកម្មការបុណ្យសពនឹងធ្វើអ្វីទៀតដែរ ដោយរងចាំពិគ្រោះយោបល់ជាមួយលោកអាចារ្យសិន។
ប៉ុន្តែប្អូនប្រុសលោក កែម ឡី ដែលកំពុងនៅស្រុកកំណើតបានប្រាប់វិទ្យុបារាំងថា ក្រុមគ្រួសារនឹងកសាងចេតិយបញ្ចុះសពលោក កែម ឡី។ ហើយចេតិយមិនទាន់ចាប់កសាងនៅឡើយទេ ដោយកំពុងគូរប្លង់។ ចេតិយនេះនឹងកសាងនៅមុខផ្ទះរបស់បណ្ឌិត កែម ឡី តែម្ដងគឺនៅក្នុងឃុំលាយបូរ ស្រុកត្រាំកក។ ហើយតាមគម្រោងចំណាយពេលមួយខែក្នុងការធ្វើចេតិយនេះ។
សូមបញ្ជាក់ថា អស់រយៈពេល៨ថ្ងៃហើយ ដែលសពរបស់លោក កែម ឡី ត្រូវបានតម្កល់ទុកធ្វើបុណ្យតាមបែបព្រះពុទ្ធសាសនា នៅវត្តពោធិ៍យារាម ហៅវត្តចាស់ ស្ថិតនៅសង្កាត់ជ្រោយចង្វារ បន្ទាប់ពីខ្មាន់កាំភ្លើងបានបាញ់សម្លាប់លោកនៅក្នុងហាង Star mart ក្រុងភ្នំពេញ កាលពីព្រឹកថ្ងៃអាទិត្យទី១០ កក្កដាឆ្នាំ២០១៦។ រាប់ចាប់តាំងពីប្រជាពលរដ្ឋ តំណាងអង្គការសង្គមស៊ីវិល តំណាងអង្គទូតនានា មន្រ្តីគណបក្សនយោបាយ និងស្ថាប័នព្រះមហាក្សត្រផង បានទៅគោរពសពលោក កែម ឡី ជាបន្តបន្ទាប់។ រហូតមកទល់នឹងពេលនេះ មានតែឃាតករតែម្នាក់គត់ ដែលអះអាងថា ឈ្មោះ ជួប សម្លាប់ ត្រូវបានចោទប្រកាន់ជាផ្លូវការពីតុលាការក្រុងភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ