អាជ្ញាធរ និងគ្រួសារសព ឯកភាពដង្ហែសពលោក កែម ឡី តាមទិសដៅកំណត់ តែមិនអនុញ្ញាតឲ្យហែថ្មើរជើង
នៅទីបំផុតទៅ អាជ្ញាធរក្រុងភ្នំពេញ បានយល់ព្រមឲ្យក្បួនដង្ហែសពលោក កែម ឡី កាត់តាមមហាវិថីសំខាន់ៗនៅក្នុងទីក្រុងភ្នំពេញ ទៅតាមការទាមទារចង់បានរបស់គ្រួសារសពហើយ ។ តែទន្ទឹមគ្នានេះ អាជ្ញាធរបានហាមមិនឲ្យមានការដង្ហែដោយថ្មើរជើងនោះទេ។ សេចក្តីសម្រេចនេះ បានធ្វើឡើងបន្ទាប់ពីមានការខ្វែងគំនិតគ្នារវាងអាជ្ញាធរក្រុង និងគ្រួសារសព ជុំវិញតម្រាយផ្លូវហែសពលោកបណ្ឌិត កែម ឡី ហើយភាគីទាំងពីរបានមកជួបប្រជុំគ្នាជាថ្មីនៅព្រឹកមិញនេះ។
ចុះផ្សាយនៅថ្ងៃ៖
ស្តាប់ - ០២:១៨
បើផ្អែកតាមសេចក្តីសម្រេចនេះ ក្បួនដង្ហែសពអ្នកវិភាគដ៏ល្បីល្បាញរបស់កម្ពុជាលោក បណ្ឌិត កែម ឡី នឹងផ្តើមចេញពីវត្តពោធិយារាមហៅវត្តចាស់ នៅវេលាម៉ោង៧ព្រឹក នាថ្ងៃអាទិត្យ ទី២៤កក្កដា ដោយឆ្លងកាត់តាមស្ពានមិត្តភាពកម្ពុជា-ចិន (ជ្រោយចង្វារ) តាមបណ្តោយមហាវិថីព្រះមុនីវង្ស រហូតដល់ស្តុបកាណាឌីយ៉ា រួចបត់ស្តាំតាមបណ្តោយមហាវិថីសហព័ន្ធរុស្ស៊ី រហូតដល់រង្វង់មូលចោមចៅ រួចក៏តម្រង់ឆ្ពោះទៅកាន់ផ្លូវជាតិលេខ៣ ដើម្បីបន្តដំណើរទៅកាន់ខេត្តតាកែវតែម្តង។ ក្បួនដង្ហែសពលោក កែម ឡី នេះ នឹងធ្វើឡើងដោយរថយន្ត និងម៉ូតូ ដោយមិនមានការដង្ហែដោយថ្មើរជើងនោះទេ។ នេះបើផ្អែកតាមលទ្ធផលនៃកិច្ចប្រជុំរវាងអាជ្ញាធរក្រុងភ្នំពេញ ដឹកនាំដោយលោក ឃួង ស្រេង អភិបាលរងក្រុង និងលោកស្រី ប៊ូ រចនា ដែលជាភរិយាសពលោក កែម ឡី នៅព្រឹកថ្ងៃទី២១កក្កដានេះ។
គួររំលឹកជូនថា នៅក្នុងកិច្ចប្រជុំលើកទីមួយ កាលពីថ្ងៃទី២០ កក្កដា ភាគីទាំងពីរបានខ្វែងគំនិតគ្នាលើតម្រាយផ្លូវហែសពលោក កែម ឡីនេះ ដោយភាគីខាងអាជ្ញាធរមិនចង់ឲ្យក្បួនដង្ហែសពនេះចូលមកកាន់ទីក្រុងភ្នំពេញនោះទេ ដោយអះអាងថា នឹងបង្កឲ្យកកស្ទះចរាចរណ៍ ហើយថាជាផ្លូវ ដែលភ្ញៀវអន្តរជាតិឆ្លងកាត់។ អាជ្ញាធរក្រុងភ្នំពេញ ដែលចង់ឲ្យក្បួនដង្ហែសពនេះ ធ្វើឡើងតាមបណ្តោយផ្លូវជាតិលេខ៦ ឆ្ពោះត្រង់តាមផ្លូវលេខ៧០ (ឬផ្លូវទំនប់ទួលគោក) កាត់តាមផ្លូវ៣៣៧ ផ្លូវលេខ៥៩៨ (ឬផ្លូវត្រឡោកបែក) ឡើងទៅកាន់មហាវិថីសហព័ន្ធរុស្ស៊ី រួចឆ្ពោះទៅកាន់រង្វង់មូលចោមចៅតែម្តង។ ប៉ុន្តែភាគីគ្រួសារសព មិនចង់បានទៅតាមផ្លូវនេះទេ។
សពលោក កែម ឡី នឹងត្រូវដង្ហែយកទៅបញ្ចុះនៅស្រុកកំណើត ស្ថិតនៅភូមិអង្គតាកុក ឃុំលាយបូរ ស្រុកត្រាំកក់ ខេត្តតាកែវ នៅវេលាម៉ោង៧ព្រឹក នាថ្ងៃអាទិត្យ ទី២៤កក្កដា ចុងសប្តាហ៍នេះ។ គេរំពឹងថា ពិធីដង្ហែសពលោកបណ្ឌិត កែម ឡី នេះ នឹងមានមនុស្សរាប់ម៉ឺននាក់ចូលរួម ហើយក្នុងនោះ ក៏មានសមាជិកអង្គការសង្គមស៊ីវិល ប្រជាពលរដ្ឋ និងសមាជិកគណបក្សប្រឆាំងផងដែរ។
តាមគម្រោង អាជ្ញាធរក្រុងភ្នំពេញនឹងដាក់កម្លាំងការពារ នៅតាមបណ្តាផ្លូវដង្ហែសព រាប់ចាប់តាំងពីវត្តចាស់ជាទីតម្កល់សពលោក កែម ឡី រហូតដល់ជាយរាជធានីភ្នំពេញ និងតាមបណ្តោយផ្លូវទៅកាន់ខេត្តតាកែវដើម្បីរក្សាសណ្តាប់ធ្នាប់ និងសន្តិសុខរហូតដល់ក្បួនដង្ហែសពបានទៅដល់គោលដៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ