រឿងអាស្រូវរបស់លោកកឹម សុខា អាចជាព្យុះក្នុងកែវទឹក
ចុះផ្សាយនៅថ្ងៃ៖
ស្តាប់ - ០៨:១៨
ប្រធានស្តីទីគណបក្សសង្គ្រោះជាតិ ហាក់ដូចជាកំពុងស្ថិតក្រោមការហ៊ុមព័ទ្ធ ដោយការចោទប្រកាន់នៃស្នេហាលួចលាក់ជាមួយស្ត្រីម្នាក់។ ការចោទប្រកាន់នេះទំនងជាពាក់ពន័្ធនឹងរឿងនយោបាយជាងរឿងបុគ្គល។ ហើយដើម្បីឲ្យប្រជាពលរដ្ឋទទួលបានការពិតក្រសួងមហាផ្ទៃ និងបណ្តាញផ្សព្វផ្សាយត្រូវបំពេញតួនាទីរបស់ខ្លួនឲ្យចំគោលដៅ។ បទវិភាគរបស់គង់ សុឋានរិទ្ធ៖
ប៉ុន្មានសប្តាហ៍ចុងក្រោយនេះមានការលេចធ្លាយ ដែលគេធ្វើឲ្យជឿថាគឺជារឿងអាស្រូវស្នេហាលួចលាក់របស់លោកកឹម សុខា ប្រធានស្តីទីគណបក្សសង្គ្រោះជាតិជាមួយស្ត្រីម្នាក់។ ហើយរឿងរ៉ាវស្នេហានេះបានលេចឮសុះសាយតាមរយៈការជួយបន្ទរបន្ថែមនៃបណ្តាញផ្សព្វផ្សាយក្នុងស្រុកជាពិសេសបណ្តាញផ្សព្វផ្សាយគាំទ្ររដ្ឋាភិបាលនិងគណបក្សកាន់អំណាច។
រឿងអាស្រូវផ្លូវភេទនេះត្រូវគេពុះអង្កាន់ជាភាគៗផ្សព្វផ្សាយម្តងមួយៗ ដំបូងបំផុតតាមរយៈបណ្តាញសង្គម ហើយត្រូវរើសមកផ្សព្វផ្សាយជាឈុតឬស្រង់បន្តទាំងស្រុងដោយបណ្តាញផ្សព្វផ្សាយទាំងនោះ។ បន្ទាប់មកយុវជនមួយក្រុមដែលអះអាងថាជាក្រុមនិស្សិតបានព្យាយាមយ៉ាងទទូចស្វែងរកការស្រាយបំភ្លឺជាសាធារណៈពីលោកកឹម សុខាដោយផ្ទាល់។
បើពិនិត្យជារួមរឿងរ៉ាវដែលត្រូវគេអះអាងថាជាស្នេហាសម្ងាត់លួចលាក់របស់លោកកឹម សុខា ជាមួយស្ត្រីម្នាក់នោះកំពុងតែក្លាយជាព្យុះមួយចំពីលើក្បាលម៉ាស៊ីននយោបាយរបស់គណបក្សសង្គ្រោះជាតិ ដែលជាគណបក្សប្រឆាំងដ៏គួរឲ្យភ័យខ្លាចសម្រាប់គណបក្សកាន់អំណាចគឺគណបក្សប្រជាជនកម្ពុជា។ ជាគណបក្សគួរឲ្យភ័យខ្លាចដោយសារតែគណបក្សនេះកំពុងតែរត់ប្រដេញយកប្រជាប្រិយភាពពីម្ចាស់ឆ្នោតដោយភាពជាក់លាក់ជាងគណបក្សប្រឆាំងដទៃទៀត។
ហេតុអ្វីបានជាព្យុះនយោបាយបែបនេះកើតឡើងលើលោកកឹម សុខា សារជាថ្មីម្តងទៀត? ក្រោយពីរឿងរ៉ាវដូចគ្នានេះកើតឡើងម្តងរួចមកហើយចំពោះលោកកឹម សុខា នៅមុន និងក្នុងអំឡុងពេលឃោសនាបោះឆ្នោតជ្រើសតាំងតំណាងរាស្ដ្រឆ្នាំ២០១៣។
ហេតុអ្វីបានជាលោកកឹម សុខា គឺជាគោលដៅនៃការវាយប្រហារ? ហេតុអ្វីបានជាស្ត្រីខ្មែរមួយរូបហ៊ានលះបង់ភាពអាម៉ាស់មួយមកបើកកកាយនៅក្នុងពេលនេះ?
ដំបូងបំផុត ការបើកកកាយអំពីវាំងននស្នេហាលួចលាក់ ដែលគេអះអាងថាជាស្នេហារវាងលោកកឹម សុខា ជាមួយនារីកំណាន់ម្នាក់នោះ ទំនងជាព្យុះនយោបាយជាជាងរឿងរវាងបុគ្គលនិងបុគ្គល។ ជារឿងនយោបាយដោយហេតុថាលោកកឹម សុខា គឺជាក្បាលម៉ាស៊ីនសំខាន់តែមួយគត់សម្រាប់ដឹកនាំគណបក្សសង្គ្រោះជាតិដោយផ្ទាល់នៅក្នុងប្រទេសកម្ពុជានៅពេលនេះនៅពេលអវត្តមានរបស់លោកសម រង្ស៊ី។ លោកសម រង្ស៊ី មិនអាចកាន់ចង្កូតគណបក្សសង្គ្រោះជាតិដោយផ្ទាល់បានទៀតទេ។
ដោយសារតែការហ៊ុំព័ទ្ធដោយសំណុំរឿងតុលាការ លោកសម រង្ស៊ី បានរត់និរទេសខ្លួនដោយស្ម័គ្រចិត្តទៅក្រៅប្រទេស ហើយអ្វីៗទាក់ទងជាមួយការដឹកនាំគណបក្ស គឺធ្វើឡើងពីចម្ងាយតែប៉ុណ្ណោះ។ រីឯលោកកឹម សុខា ប្រៀបដូចជាដៃឆ្វេងដែលមានសកម្មភាពខ្លាំងជាងលោកសម រង្ស៊ី ក្នុងការចុះឃោសនា ដល់មូលដ្ឋាន ជួបជាមួយអ្នកគាំទ្រនយោបាយ ហើយលោកសម រង្ស៊ី បង្ហាញមុខ និងសម្លេងតាមរយៈការភ្ជាប់រូបភាពផ្ទាល់តាមប្រព័ន្ធអ៊ីនធើណែត ឬហៅតាមភាសាបច្ចេកទេសថា video conference។
ដូចនេះប្រសិនបើរឿងអាស្រូវស្នេហា ដែលគេធ្វើឲ្យជឿថាមានជាប់ពាក់ព័ន្ធនឹងលោកកឹម សុខា នោះវិវត្តន៍កាន់តែអាក្រក់ នោះលោកកឹម សុខា អាចនឹងទទួលហានិភ័យឬគ្រោះថ្នាក់ក្នុងការកាច់ចង្កូតគណបក្សដោយផ្ទាល់។ ប្រសិនបើលោកកឹម សុខា ត្រូវកៀសចេញពីចង្កូតនយោបាយសម្រាប់គណបក្សប្រឆាំងទៀតនោះ គណបក្សនេះនឹងក្លាយជាគណបក្សកំបុតក្បាល ហើយគណបក្សប្រជាជនកម្ពុជាឬគណបក្សកាន់អំណាចនឹងមានក្តីរំពឹងច្រើនក្នុងការផ្តាច់យកសម្លេងឆ្នោត។
នេះបើសិនគេនិយាយពីបច្ចុប្បន្នភាព។ ប៉ុន្តែបើគេរំលឹកអតីតកាលតែបន្តិចនោះ មានស្ត្រីវ័យកណ្តាលម្នាក់ធ្លាប់បានរំលើកបើកកកាយពីទំនាក់ទំនងស្នេហាជាមួយលោកកឹម សុខា នៅមុនពេលបោះឆ្នោតឆ្នាំ២០១៣។ ប៉ុន្តែក្រោយពីការបោះឆ្នោតបានបញ្ចប់ស្រ្តីនោះក៏បាត់ដំណឹងសូន្យទៅវិញ។ហើយក្នុងពេលនេះបែរជាលេចមុខស្ត្រីម្នាក់ទៀតដែលពាក់ពន្ធ័ស្នេហាជាមួយលោកកឹម សុខាទៅវិញ។
ហេតុនេះហើយសំណួរ សួរថា ការណ៍នេះជាសេណារីយោ ដែលមានការរៀបចំទុកជាមុនសម្រាប់ប្រឆាំងលោកកឹម សុខា ឬយ៉ាងណា? ហើយហេតុការណ៍នៃស្ត្រីថ្មីនេះនឹងអាចរលត់បាត់ទៅដោយងាយដូចស្ត្រីទី១ឬទេ?
ប្រសិនបើរឿងនេះមិនពាក់ព័ន្ធនឹងអន្ទាក់នយោបាយនៅពីក្រោយខ្នង នោះចម្លើយសមស្របអាចមានចំនួនពីរយ៉ាងតិច។
ទី១ ស្ត្រីដែលអះអាងថាជាគូស្នេហ៍លួចលាក់ជាមួយលោកកឹម សុខា បានព្យាយាមដោះស្រាយបញ្ហាជាមួយលោកកឹម សុខា ដោយមិនបានជោគជ័យមុននឹងទម្លាយរឿងអាម៉ាស់របស់ខ្លួនចេញជាសាធារណៈ។
ទី២ ប្រសិនបើរឿងរ៉ាវស្នេហានោះជារឿងពិត លោកកឹម សុខា អាចនឹងមិនអើពើចំពោះការទាមទារបែបណាមួយរបស់គូកំណាន់របស់ខ្លួនដែលធ្វើឲ្យស្ត្រីរូបនោះធ្វើការវាយបក។
ទោះជាយ៉ាងណាក៏ដោយរឿងអាស្រូវស្នេហាដែលត្រូវទម្លាយភ្ជាប់ជាមួយលោកកឹម សុខា នៅពេលនេះកំពុងស្ថិតនៅក្នុងទឹកល្អក់នៅឡើយ។ គេមិនដឹងថាការពិតកម្រិតណានោះទេ។ ដោយសារគេមើលឃើញថាបណ្តាញផ្សព្វផ្សាយទាំងស្រុងបានផ្តោតចង់បានការបកស្រាយសំខាន់ពីលោកកឹម សុខា រាប់ទាំងយុវជនមួយក្រុមដែលអះអាងថាខ្លួនជានិស្សិតមិនពាក់ពន្ធ័នយោបាយទៀតផង។
ដូច្នេះដើម្បីដឹងការពិតក្នុងរឿងនេះ គេគប្បីសើរើរកសាវតារនិងរឿងរ៉ាវនៅពីក្រោយខ្នងស្ត្រីដែលពាក់ពន្ធ័នឹងការចោទប្រកាន់លោកកឹម សុខា នៅមុនពេលបោះឆ្នោតឆ្នាំ២០១៣។ ស្រាវជ្រាវលើស្ត្រីតួអង្គបច្ចុប្បន្ន ស្រាវជ្រាវលើមូលហេតុនៃការបើកគណនីហ្វេសប៊ុកចំនួនពីរដែលទម្លាយរឿងអាស្រូវលោកកឹម សុខា ដំណាលគ្នា។ វែករកមូលហេតុតើស្ថាប័នណាអនុញ្ញាតការលួចថតសម្លេងសន្ទនានោះ បើសិនជាការសន្ទនានោះជាការពិត។ ពីព្រោះថារឿងផ្ទាល់ខ្លួនរបស់លោកកឹម សុខា មិនបានធ្វើឲ្យប៉ះពាល់ដល់សន្តិសុខជាតិនោះទេ ដូច្នេះការលួចថតសម្លេងបែបនេះគឺជាការប្រព្រឹត្តិផ្ទុយនឹងច្បាប់។
បើផ្អែកតាមការវិវត្តនានាក្រសួងមហាផ្ទៃគឺជាសមត្ថកិច្ចតែមួយគត់ក្នុងការបង្ហាញការពិតនៃការលួចថតសម្លេងនេះរួមទាំងម្ចាស់គណនីហ្វេសប៊ុកដែលទម្លាយរឿងអាស្រូវបែបនេះជាសាធារណៈដូចដែលក្រសួងមហាផ្ទៃធ្លាប់បានចាត់ការលើការគំរាមមួយចំនួនតាមបណ្តាញសង្គមរួចមកហើយ។ ដើម្បីប្រយោជន៍សាធារណៈបណ្តាញផ្សព្វផ្សាយព័ត៌មានមាននាទីធ្វើបទស៊ើបអង្កេត ដោយចៀសវាងការបាញ់មុខព្រួញតែម្ខាង។ ការស្វែងរកការពិតពីស្ត្រីចុងក្រោយនិងស្ត្រីទី១ដែលទម្លាយរឿងអ្វីមួយដែលគេហៅថាជាស្នេហាលួចលាក់របស់លោកកឹម សុខា នោះនឹងជួយបកស្រាយឲ្យឃើញកាន់តែច្បាស់ថាតើព្យុះដែលកំពុងបោកបក់លើមេដឹកនាំបក្សប្រឆាំងសព្វថ្ងៃមិនមែនជារឿងនយោបាយឬយ៉ាងណា? ការពិតបែបណានោះលោកកឹម សុខា នឹងទទួលបានការវិនិច្ឆ័យដែលអាចជះឥទ្ធិពលដល់ជំនឿនយោបាយរបស់លោក។
តើរឿងអាស្រូវស្នេហាពាក់ព័ន្ធនឹងលោកកឹម សុខា អាចនឹងក្លាយជាគ្រោះថ្នាក់របស់គណបក្សប្រឆាំង ឬវាគ្រាន់តែជាព្យុះកំណាចនៅក្នុងកែវទឹក?។ ព្យុះកំណាចនៅក្នុងកែវទឹកដែលមានន័យថាជាព្យុះឮសម្លេងកងរំពងខ្ទរខ្ទារ រំជើបរំជួលយ៉ាងខ្លាំងតែជាលទ្ធផលនឹងមិនទទួលបានអ្វីជាដុំកំភួននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ