តុលាការមិនឲ្យលោក កឹម សុខា ចេញពីកម្ពុជា CNRPចាត់ទុកថា នេះជារឿងនយោបាយ
សំណុំរឿងលោក កឹម សុខា បានវិវដ្ដមួយជំហានទៀតហើយនោះគឺ ដីកាសម្រេចថ្មីមិនអនុញ្ញត្តឲ្យលោក កឹម សុខា ចេញទៅក្រៅប្រទេសបានទេនៅពេលនេះ ព្រោះលោកកំពុងស្ថិតនៅក្រោមការត្រួតពិនិត្យរបស់តុលាការ។ភ្លាមៗក្រោយការចេញដីកា គណបក្សសង្គ្រោះជាតិ ចាត់ទុកថា នេះជាការរំលោភសេរីភាពរបស់អ្នកតំណាងរាស្ត្រ និងជាការរំលោភម្ដងហើយម្ដងទៀតទៅលើមាត្រា៨០នៃរដ្ឋធម្មនុញ្ញ។ និងថា ទង្វើនេះបញ្ជាក់កាន់តែច្បាស់ថា ករណីលោក កឹម សុខា ជារឿងនយោបាយ។
ចុះផ្សាយនៅថ្ងៃ៖
ស្តាប់ - ០១:៣១
ដូចរៀងរាល់ដងដីកាត្រូវបានប៉ូលិស យកទៅបិតនៅមុខផ្ទះរបស់លោកកឹម សុខា ប្រធានស្តីទីគណបក្សសង្គ្រោះជាតិ ក្នុងខណ្ឌទួលគោក រាជធានីភ្នំពេញ នាព្រឹកថ្ងៃទី១៤ ខែកក្កដានេះ។
ដីកាសម្រេចចុះទី៨ កក្កដា ដែលត្រូវបានផ្សព្វផ្សាយជាសាធារណៈនៅថ្ងៃទី១៤ កក្កដានេះ លោក ថាន់ ឡេង ចៅក្រមស៊ើបសួរសាលាដំបូងរាជធានីភ្នំពេញ បានសម្រេចដាក់លោក កឹម សុខា ស្ថិតនៅក្រោមការត្រួតពិនិត្យរបស់តុលាការ និងមិនឲ្យចាកចេញទៅក្រៅប្រទេសនោះឡើយ។
ដើមហេតុ ដែលនាំឲ្យ លោក កឹម សុខា ត្រូវតុលាការដាក់នៅក្រោមការត្រួតពិនិត្យព្រោះ លោក កឹម សុខា ជាជនត្រូវចោទ ក្នុងសំណុំរឿង បដិសេធក្នុងការចូលខ្លួនទៅបំភ្លឺតុលាការ ដោយសារតែតំណាងអយ្យការ បានចេញដីកាកោះហៅរូបលោក ២ លើកហើយលោក កឹម សុខា មិនចូលបំភ្លឺ ក្នុងសំណុំរឿង សញ្ចារកម្ម។
គួររម្លឹកថា តុលាការបានសម្រេចបិទបញ្ចប់ការស៊ើបអង្កេតលើករណីរបស់លោក កឹម សុខា និងត្រៀមបញ្ជូនទៅជំនុំជម្រះនៅពេលខាងមុខ។ ក្រុមសមាជិកសភាគណបក្សសង្រ្គោះជាតិ នៅថ្ងៃទី៧ កក្កដាកន្លងទៅ បានចេញសេចក្តីថ្លែងការណ៍មួយដោយបានពន្យល់ជាថ្មីថា តុលាការមិនអាចចោទប្រកាន់មកលើតំណាងរាស្រ្ត ដើម្បីបញ្ជូនសំណុំរឿងទៅជំនុំជម្រះបានជាដាច់ខាត ដរាបណារដ្ឋសភាមិនទាន់ប្រជុំដកអភ័យឯកសិទ្ធិតាមមតិភាគច្រើន២/៣នៃសមាជិកសភាទាំងមូល។
គួរជម្រាបជូនថា លោក កឹម សុខា ត្រូវបានចោទប្រកាន់ពីបទល្មើសជាក់ស្តែង ដោយបានបដិសេធមិនព្រមចូលខ្លួនទៅបំភ្លឺតាមដីកាកោះហៅរបស់តុលាការក្រុងភ្នំពេញចំនួន២លើក នៅក្នុងសំណុំរឿងសញ្ចារកម្ម ដែលប្តឹងដោយកញ្ញា ខុម ចាន់តារ៉ាទី ហៅស្រីមុំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ