មេធាវីលោក កឹម សុខា គ្រោងប្ដឹងទៅក្រុមប្រឹក្សាធម្មនុញ្ញបកស្រាយចំណាត់ការរបស់តុលាការកំពូល
ក្រុមមេធាវីលោក កឹម សុខា មានគម្រោងដាក់សំណើទៅក្រុមប្រឹក្សាធម្មនុញ្ញបកស្រាយចំណាត់ការរបស់តុលាការកំពូល បន្ទាប់ពីពួកគេគ្មានជំនឿទៅលើសាលដីកានៃបណ្ដឹងសាទុក្ខ ដែលនឹងប្រកាសនៅថ្ងៃទី ៤ ខែវិច្ឆិកាខាងមុខ។ បណ្ដឹងសាទុក្ខ ដែលត្រូវបានតុលាការកំពូលបើកសវនាការជំនុំជម្រះនៅថ្ងៃទី ២៨ តុលានេះ។
ចុះផ្សាយនៅថ្ងៃ៖
ស្តាប់ - ០១:៣៥
សវនាការជំនុំជម្រះរបស់តុលាការកំពូលនៅព្រឹកមិញនេះ គឺជាសវនាការសុំមោឃភាពនីតិវិធីរបស់សាលាដំបូងរាជធានីភ្នំពេញ ដែលសម្រេចផ្តន្ទាទោសឱ្យលោក កឹម សុខា ជាប់ពន្ធនាគារ ៥ខែ និងពិន័យជាប្រាក់ ៨សែនរៀល ក្រោមការចោទប្រកាន់ពីបទ«បដិសេធក្នុងការចូលខ្លួន» តាមមាត្រា ៥៣៨ នៃក្រមព្រហ្មទណ្ឌ ដែលតុលាការចាត់ទុកថា ជាបទល្មើសព្រហ្មទណ្ឌជាក់ស្តែង។ ហើយសេចក្ដីសម្រេចនេះនឹងប្រកាសនៅថ្ងៃ ទី ៤វិច្ឆិកាខាងមុខ។
លោក ហែម សុជាតិ មេធាវីមួយរូបនៃក្រុមមេធាវីការពារក្ដីលោក កឹម សុខា ដឹងមុនថាតុលាការនឹងចាត់ទុកសេចក្ដីសម្រេចរបស់សាលាដំបូងរាជធានីភ្នំពេញទុកជាបានការដដែល ហើយនឹងច្រានចោលចំពោះបណ្ដឹងសុំមោឃភាពរបស់ក្រុមមេធាវីការពារក្ដី លោក កឹម សុខា។ ព្រោះលោកមេធាវីយល់ថា នេះជារឿងក្ដីពាក់ព័ន្ធបញ្ហានយោបាយ។ លោក ហែម សុជាតិ មិនអស់សង្ឃឹមនឹងប្ដឹងទៅក្រុមប្រឹក្សាធម្មនុញ្ញឲ្យស្ថាប័នជាតិមួយនេះធ្វើការបកស្រាយចំណាត់ការរបស់តុលាការកំពូលថា ត្រឹមត្រូវតាមនីតិវិធីច្បាប់ដែលឬទេ។
យ៉ាងណាមិញលោក ហែម សុជាតិ ពន្យល់ថាត្បិតតែសំណុំរឿងលោក កឹម សុខា ឡើងមកដល់ដៃតុលាការកំពូលមែនពិតតែមិនមែនមានន័យថា លោក កឹម សុខា ត្រូវបានឃុំ ឬចាប់ខ្លួននោះទេ ព្រោះថា សវនាការរបស់តុលាការកំពូលនៅថ្ងៃទី ២៨តុលានេះជំនុំជម្រះទៅលើនីតិវិធី គឺមិនមែនជំនុំជម្រះទៅលើអង្គសេចក្ដីនោះទេ។ ដូច្នេះតុលាការមិនអាចអនុវត្តសាលក្រមឲ្យចាប់ខ្លួនលោក កឹម សុខា បានទេ ព្រោះថាសាលក្រមផ្ដន្ទាទោសលោក កឹម សុខា ឲ្យជាប់ពន្ធនាគារ ៥ខែនៅជាប់បណ្ដឹងឧទ្ទរណ៍។ ទន្ទឹមនឹងនេះអ្នកនាំពាក្យក្រសួងយុត្តិធម៌ លោក កឹម សន្តិភាព ក៏យល់ឃើញដូច្នោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ