លោកកឹម សុខា បញ្ជាក់ប្រាប់អ្នកគាំទ្រថា គណបក្សសង្គ្រោះជាតិ មិនមែនជាបក្សហែហមបក្សកាន់អំណាចឡើយ
បន្ទាប់ពីមានរូបភាពនយោបាយយ៉ាងស្អិតរមួត រវាងលោកសម រង្ស៊ី ប្រមុខគណបក្សប្រឆាំង និងលោកនាយករដ្ឋមន្ត្រីហ៊ុន សែន ក្នុងពេលចូលឆ្នាំខ្មែររួចមក, លោកកឹម សុខា អនុប្រធានគណបក្សសង្គ្រោះជាតិ បានចេញមុខថ្លែងប្រាប់អ្នកគាំទ្ររបស់ខ្លួនថា គណបក្សសង្គ្រោះជាតិមិនមែនជាគណបក្សក្នុងរដ្ឋាភិបាល ដើម្បីហែហមគណបក្សកាន់អំណាច នាពេលបច្ចុប្បន្ននោះទេ។ ការថ្លែងនេះ បានធ្វើឡើង ក្នុងពេលប្រមុខគណបក្សសង្គ្រោះជាតិទាំងពីរ បានចូលរួមក្នុងពិធីប្រកាសសុពលភាពប្រធាន និងអនុប្រធានក្រុមការងារគណបក្សសង្គ្រោះជាតិ នៅខេត្តកំពង់ឆ្នាំង និងខេត្តពោធិ៍សាត់ នៅថ្ងៃទី២០មេសា។
ចុះផ្សាយនៅថ្ងៃ៖
ស្តាប់ - ០១:៤៣
(សម្លេង លោកកឹម សុខា)
នេះគឺជាការថ្លែងរបស់លោកកឹម សុខា អនុប្រធានគណបក្សសង្គ្រោះជាតិ ទៅកាន់សកម្មជន អ្នកគាំទ្ររបស់ខ្លួន នៅក្នុងឱកាស ដែលប្រមុខគណបក្សប្រឆាំងទាំងពីរ បានទៅចូលរួមនៅក្នុងពិធីប្រកាសសុពលភាពប្រធាន និងអនុប្រធានក្រុមការងារគណបក្សសង្គ្រោះជាតិ នៅខេត្តកំពង់ឆ្នាំង និងខេត្តពោធិ៍សាត់ កាលពីថ្ងៃចន្ទ ទី២០មេសា។
ការថ្លែងរបស់លោកកឹម សុខា នៅពេលនេះ ត្រូវបានគេសង្គេតឃើញថា គឺបន្ទាប់ពីលោកសម រង្ស៊ី ប្រមុខគណបក្សប្រឆាំង និងលោកនាយករដ្ឋមន្ត្រីហ៊ុន សែន បានបង្ហាញភាពស្អិតរមួតជាមួយគ្នា នៅក្នុងឱកាសទៅចូលរួមបើកព្រឹត្តិការណ៍អង្គរសង្គ្រាន្ត នៅក្នុងខេត្តសៀមរាប កាលពីថ្ងៃទី ១៤មេសា។
លោកកឹម សុខា បានបញ្ជាក់ជាថ្មីថា គណបក្សសង្គ្រោះជាតិ នៅតែប្រកាន់ជំហរដដែល គឺត្រូវតែផ្លាស់ប្តូរមេដឹកនាំបច្ចុប្បន្ន តាមរយៈការបោះឆ្នោតបែបប្រជាធិបតេយ្យ ដើម្បីឈានទៅកាន់អំណាច ប្រយោជន៍គឺដើម្បីសង្គ្រោះជាតិ ប្រជាពលរដ្ឋខ្មែរ ពីការដឹកនាំបែបកុម្មុយនិស្ត។ តាមលោកកឹម សុខា បើគណបក្សសង្គ្រោះជាតិ មិនឈ្នះឆ្នោតទេនោះ គឺគ្មានឡើយការផ្លាស់ ប្តូរ ឬកំណែទម្រង់ពិតប្រាកដ។
លើសតែពីការបញ្ជាក់ពីគោលដៅ និងជំហររបស់គណបក្សខ្លួន លោកកឹម សុខា ក៏បានបន្ថែមថា ថ្វីត្បិតតែមេដឹកនាំគណបក្សទាំងពីរ ត្រូវរូវគ្នា ហើយបង្កើតចេញនូវវប្បធម៌សន្ទនាគ្នាពិតមែន ប៉ុន្តែគណបក្សប្រឆាំង មិនដែលផ្លាស់ប្តូរគោលដៅរបស់ខ្លួននោះឡើយ។ លោកថា គណបក្សសង្គ្រោះជាតិ នឹងមិនឲ្យមានអនាគតបែកបាក់ ដូចគណបក្សហ្វ៊ុនស៊ិនប៉ិចនោះទេ។ លើសពីនេះ លោកកឹម សុខា បញ្ជាក់ថា ការធ្វើនយោបាយ គឺត្រូវតែមានយុទ្ធសាស្ត្របត់បែន ទៅតាមកាលៈទេសៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ