ក្រុមមេធាវីការពារក្ដីឲ្យលោកកឹម សុខា ប្ដឹងសារទុក្ខទៅតុលាការកំពូល
ក្រុមមេធាវីការពារក្ដីឲ្យលោក កឹម សុខា បានដាក់ពាក្យប្ដឹងសារទុក្ខទៅតុលាការកំពូលហើយនៅថ្ងៃសុក្រនេះ ដើម្បីជំទាស់នឹងសាលដីការបស់សាលាឧទ្ធរណ៍ ដែលរក្សាការសម្រេចឃុំខ្លួនលោក កឹម សុខា ទុកជាបានការដដែល។ លោក សំ សុគង់ មេធាវីម្នាក់របស់លោក កឹម សុខា រំពឹងទុកថា តុលាការកំពូលនឹងពិចារណាលើបណ្ដឹងសារទុក្ខរបស់ខ្លួន ហើយសម្រេចឲ្យលោក កឹម សុខា បានរស់នៅក្រៅឃុំបណ្ដោះអាសន្ន។
ចុះផ្សាយនៅថ្ងៃ៖
សម្រាប់លោកមេធាវី សំ សុគង់ លោក កឹម សុខា គួរតែមានសិទ្ធិរស់នៅក្រៅឃុំបណ្ដោះអាសន្នព្រោះតែលោកជាប្រធានគណបក្សសង្គ្រោះជាតិ ដែលជាបក្សប្រឆាំងធំជាងគេនៅកម្ពុជា និងជាគណបក្សគូប្រជែងតែមួយគត់របស់បក្សកាន់អំណាច។ ក្រៅពីនោះ លោកមេធាវីបានបន្តលើកឡើងពីស្ថានភាពសុខភាពរបស់លោក កឹម សុខា ដែលត្រូវការការព្យាបាលជាប់លាប់ ក៏ដូចជាអភ័យឯកសិទ្ធិតំណាងរាស្ត្ររបស់លោក កឹម សុខា។
តាមរយៈកត្តាអស់ទាំងនេះ លោកមេធាវី សំ សុគង់ រំពឹងទុកថា តុលាការកំពូលនឹងពិចារណាទៅលើសេចក្ដីសម្រេចរបស់តុលាការឧទ្ធរណ៍ឡើងវិញ ហើយសម្រេចឲ្យលោក កឹម សុខា បានរស់នៅក្រៅឃុំជាបណ្ដោះអាសន្ន។
សូមជម្រាបថា គិតត្រឹមថ្ងៃសុក្រទី២៩កញ្ញានេះ ប្រធានបក្សប្រឆាំងលោក កឹម សុខា បានជាប់ឃុំនៅពន្ធនាគារត្រពាំងផ្លុង ក្នុងខេត្តត្បូងឃ្មុំ អស់រយៈពេល២៦ថ្ងៃ មកហើយ បន្ទាប់ពីត្រូវបានសមត្ថកិច្ចឃាត់ខ្លួននៅពាក់កណ្ដាលអាធ្រាតថ្ងៃទី២ ឈានចូលថ្ងៃទី៣កញ្ញា ពីបទសន្ទិដ្ឋិភាព។
ជាការកត់សម្គាល់ តាំងពីលោក កឹម សុខា ជាប់ឃុំ ក្រុមមេធាវីការពារក្ដីតែងតែព្យាយាមប្រើគ្រប់សព្វលទ្ធភាព ដើម្បីឲ្យកូនក្ដីរបស់ខ្លួនបាននៅក្រៅឃុំបណ្ដោះអាសន្ន។ ក្រុមមេធាវីបានប្ដឹងទៅកាន់សាលាឧទ្ធរណ៍ ជំទាស់នឹងការសម្រេចឃុំខ្លួនរបស់សាលាដំបូង។ ប៉ុន្តែនៅក្នុងសវនាការថ្ងៃទី២៦កញ្ញា សាលាឧទ្ធរណ៍បានតម្កល់ដីកាសម្រេចឃុំខ្លួនរបស់សាលាដំបូងក្រុងភ្នំពេញទុកជាបានការដដែល។ ចំណែកក្រុមមេធាវីបានដើរចេញពីអង្គសវនាការ ដោយសារតែអង្គសវនាការនោះ ដំណើរការដោយគ្មានវត្តមានលោកកឹម សុខា ដែលជាជនត្រូវចោទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ