រដ្ឋសភាប្រាប់ក្រុមនិស្សិតថា មិនទាន់ទទួលបានការឆ្លើយតបពីលោក កឹម សុខា ជុំវិញបញ្ហាខ្សែអាត់សំឡេង
អគ្គលេខាធិការដ្ឋានរដ្ឋសភា ពុំបានទទួលប្រតិកម្មឬការឆ្លើយបំភ្លឺអ្វីឡើយពីលោក កឹម សុខា ជុំវិញបញ្ហាខ្សែអាត់សំឡេង ដែលសង្ស័យថាជាសំឡេងលោក កឹម សុខា និងនារីឈ្មោះ ស្រីមុំ។ នេះគឺជាខ្លឹមសារលិខិតដែលលោក ឡេង ប៉េងឡុង អគ្គលេខាធិការរដ្ឋសភា សរសេរទៅកាន់លោក ស្រី ចំរើន ឆ្លើយតបទៅនឹងញត្តិចំនួនពីររបស់មេដឹកនាំក្រុមយុវជនរូបនេះ។ សូមជម្រាបជូនថា បើទោះបីជាមិនទាន់មានការឆ្លើយបំភ្លឺពីលោក កឹម សុខា ក៏ដោយ ក៏អង្គភាពប្រឆាំងអំពើពុករលួយបានធ្វើកោសល្យវិច័យ និងស៊ើបអង្កេតលើខ្សែអាត់សំឡេងនោះរួចហើយ។ និងថែមទាំងបានឈានទៅបើកស្រោមសំបុត្រប្រកាសទ្រព្យសម្បត្តិរបស់លោក កឹម សុខា ទៀតផង។
ចុះផ្សាយនៅថ្ងៃ៖
ស្តាប់ - ០២:២២
នៅក្នុងលិខិតសរសេរទៅលោក ស្រី ចំរើន លោក ឡេង ប៉េងឡុង អគ្គលេខាធិការរដ្ឋសភា បានអះអាងថា អគ្គលេខាធិការដ្ឋានរដ្ឋសភា បានផ្ញើលិខិតចំនួនពីរទៅកាន់លោក កឹម សុខា ដើម្បីស្នើសុំឲ្យលោក កឹម សុខា ពិនិត្យ ពិចារណា បំភ្លឺឲ្យបានឆាប់ ចំពោះញត្តិដែលលោក ស្រី ចំរើន និងក្រុមយុវជនបានដាក់នាពេលកន្លងមក។ លិខិតទី១ ធ្វើនៅថ្ងៃទី២១ខែមីនា។ ចំណែកលិខិតទី២ ធ្វើនៅថ្ងៃទី២៨មីនា។ ការផ្ញើលិខិតទាំងពីរនោះទៅលោក កឹម សុខា អគ្គលេខាធិការដ្ឋានក៏បានភ្ជាប់ជូនផងដែរ ញត្តិដែលក្រុមនិស្សិតយកមកដាក់នៅរដ្ឋសភា កាលពីថ្ងៃទី២៥មីនាកន្លងទៅ។ យ៉ាងណាក៏ដោយ រហូតមកទល់ពេលនេះ អគ្គលេខាធិការដ្ឋានរដ្ឋសភា ពុំទាន់បានទទួលប្រតិកម្មឬការឆ្លើយបំភ្លឺអ្វីពីលោក កឹម សុខា ជុំវិញបញ្ហាខ្សែអាត់សំឡេងនៅឡើយទេ។
សូមរំលឹកថា លោក ស្រី ចំរើន បានដឹកនាំក្រុមយុវជនទៅដាក់ញត្តិសុំការបំភ្លឺពីលោក កឹម សុខា នៅវិមានរដ្ឋសភា ចំនួន៣ដងរួចមកហើយ។ ក្រៅពីដាក់ញត្តិនៅរដ្ឋសភា ក្រុមយុវជនក៏បានយកញត្តិទៅដាក់នៅអង្គភាពប្រឆាំងអំពើពុករលួយផងដែរ ដោយមានខ្លឹមសារស្នើឲ្យធ្វើការស៊ើបអង្កេតលើករណីលោក កឹម សុខា ផ្ដល់ថវិកាឲ្យស្រីកំណាន់ទិញផ្ទះ និងបើករបររកស៊ី។
ក្រោយការស៊ើបអង្កេត និងធ្វើកោសល្យវិច័យលើខ្សែអាត់សំឡេង អង្គភាពប្រឆាំងអំពើពុករលួយ ACU បានប្រកាសថា ខ្សែអាត់សំឡេងនោះ ជាសំឡេងរបស់លោក កឹម សុខា និងនារីឈ្មោះ ស្រីមុំ ពិតប្រាកដមែន។ តាមរយៈពាក្យបណ្ដឹងរបស់ក្រុមនិស្សិតដឹកនាំដោយលោក ស្រី ចំរើន ACU បានបើកការស៊ើបអង្កេតមួយជំហានទៀត ដោយសម្រេចបើកស្រោមសំបុត្រប្រកាសទ្រព្យសម្បត្តិទាំងបីលើក របស់លោក កឹម សុខា ប្រធានស្ដីទីគណបក្សសង្គ្រោះជាតិ។ ការងារនេះធ្វើឡើងដើម្បីពិនិត្យមើល និងផ្ទៀងផ្ទាត់ឲ្យដឹងការពិតថាតើ ការប្រកាសទ្រព្យសម្បត្តិនោះ ត្រឹមត្រូវឬមិនត្រឹមត្រូវ។ លោក ឱម យ៉ិនទៀង ប្រធានអង្គភាពប្រឆាំងអំពើពុករលួយបានបញ្ជាក់ថា ក្រុមការងារកំពុងតែធ្វើការសង្ខេប និងឈានទៅពិនិត្យមើលលទ្ធផលនៅក្នុងសប្ដាហ៍នេះតែម្ដង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ