សំណុំរឿងស្នេហាលួចលាក់លោក កឹម សុខា និងស្រីមុំ អូសទាញអ្នកពាក់ព័ន្ធបាន ១៦នាក់ហើយ
នៅព្រឹកថ្ងៃព្រហស្បតិ៍ស្អែកនេះ តុលាការក្រុងភ្នំពេញ នឹងបើកសវនាការសាកសួរ នាយកប្រតិបត្តិមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ (CCIM) ជាសាក្សីថ្មីមួយរូបទៀត ទាក់ទងនឹងសំណុំរឿងស្នេហាលួចលាក់របស់លោក កឹម សុខា និងអ្នកនាង ខុម ចាន់ដារាទី ហៅស្រីមុំ។ មកទល់នឹងពេលនេះ អ្នកពាក់ព័ន្ធនឹងសម័្ពន្ធភាព ស្នេហាមួយនេះបានបន្ថែមបញ្ជីឈ្មោះក្នុងសមត្ថកិច្ចតុលាការ ១៦រូបហើយ។
ចុះផ្សាយនៅថ្ងៃ៖
ស្តាប់ - ០៣:១៤
គិតមកដល់ពាក់កណ្តាលខែសីហា ២០១៦ នេះ អ្នកពាក់ព័ន្ធនៅតុលាការ ក្នុងសំណុំរឿង ស្នេហាលួចលាក់ របស់លោក កឹម សុខា និង អ្នកនាង ខុម ចាន់ដារាទី កើនឡើងដល់ ១៦នាក់ ហើយ បើរាប់ទាំង អ្នកចេញមុខ តាំងខ្លួនជាដើមបណ្តឹង ៣រូប អ្នកត្រូវឃុំខ្លួន ៦រូប អ្នករងការចោទប្រកាន់ ៣រូប និងសាក្សី ៤រូប ដែលត្រូវតុលាការកោះហៅ មកសាកសួរជាបន្តបន្ទាប់។
ផ្ដើមចេញពីសាក្សី លោក ប៉ា ងួនទៀង នាយកប្រតិបត្តិមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ (CCIM) ដែលត្រូវចូលខ្លួនទៅបំភ្លឺនៅតុលាការនៅព្រឹកថ្ងៃព្រហស្បតិ៍ ទី១៨សីហា។ លោក ប៉ា ងួនទៀង បានបញ្ជាក់ថា លោកនឹងចូលបង្ហាញខ្លួនតាមការណាត់របស់តុលាការ ក្នុងនាមជាសាក្សី ជុំវិញដំណើររឿង សូកប៉ាន់សាក្សី។ លោក ប៉ា ងួនទៀង ជាសាក្សីទីបី ក្នុងនាមជាសង្គមស៊ីវិល បន្ទាប់ពី អ្នកស្រី ធីតា ឃិះ នាយិកា ប្រតិបត្តិនៃអង្គការសីលការ និង អ្នកស្រី អ៊ាង គឹមលី មន្ត្រីសមាគមអាដហុក ប្រចាំខេត្តព្រៃវែង ដែលត្រូវតុលាការ សាកសួរលើរឿងតែមួយ ពាក់ព័ន្ធនឹងសម័្ពន្ធភាពស្នេហាលួចលាក់ រវាង អនុប្រធានគណបក្សប្រឆាំង លោក កឹម សុខា និងអ្នកនាង ខុម ចាន់តារាទី ហៅ ស្រីមុំ។ ក្នុងសំណុំរឿងដដែល កាលពីសប្តាហ៍មុន (ថ្ងៃទី១២ សីហា ២០១៦) ប្រធានផ្នែកស្រ្តីប្រចាំសមាគមអាដហុក គឺ អ្នកស្រី ឆន សុគន្ធា ម្នាក់ទៀត ក៏ត្រូវតុលាការកោះហៅ ជា សាក្សីទីបួន ដើម្បីសាកសួរ នៅថ្ងៃទី២៤ សីហា ២០១៦ ខាងមុខ ផងដែរ។
ងាកមកដើមបណ្តឹងទាំងបី ដែលគេស្គាល់ រួមមាន លោក ស្រី ចំរើន ដែលអះអាងខ្លួនថាជា និស្សិត បានប្តឹងលោក កឹម សុខា ពីបទពុករលួយ ទៅអង្គភាពប្រឆាំងអំពើពុករលួយ (ថ្ងៃទី១៨ មីនា ២០១៦)។ អ្នកនាង ខុម ចាន់តារាទី ស្រីមុំ រស់នៅស្រុកកំពង់សៀម ខេត្តកំពង់ចាម បានដាក់ពាក្យបណ្តឹងទៅសាលាដំបូងរាជធានី (ថ្ងៃទី២២ មេសា ២០១៦) ប្តឹងលោក កឹម សុខា ទារសំណងជំងឺចិត្ត ៣០ ម៉ឺនដុល្លារ ដោយនាងយល់ថា លោក កឹម សុខា ធ្វើឲ្យរូបនាងខាតបង់សេដ្ឋកិច្ចគ្រួសារ និងខូចខាតកិត្តិយស សេចក្តីថ្លៃថ្នូរ។ ដើមបណ្តឹងទីបី គឺ កញ្ញា ធី សុវណ្ណថា ដែលបាន បណ្ដឹង លោក កឹម សុខា (នៅព្រឹកថ្ងៃទី២៧ ខែមេសា) ទាមទារប្រាក់ ១លានដុល្លារ ពីបទបរិហារកេរ្តិ៍ ទាក់ទងនឹងសំណុំរឿងខ្សែអាត់សំឡេង។
ដោយឡែក អ្នកត្រូវជាប់ឃុំទាំងប្រាំមួយរួមមាន លោក ស៊ាង ចែត មេឃុំស្រក ស្រុកកំពង់សៀម ដែលត្រូវ សាលាដំបូងរាជធានីភ្នំពេញ ឃុំខ្លួនជាបណ្តោះអាសន្ននៅពន្ធនាគារព្រៃស កាលពីថ្ងៃទី ២៧ ខែមេសា ដោយចោទពី បទសូកប៉ាន់សាក្សី ។ ចំណែក មន្ត្រីអាដហុក និង គជប ចំនួន ៥ រូប ទៀត រួមមាន លោក ណៃ វ៉ង់ដា លោក នី សុខា លោក យី សុខសាន្ត អ្នកស្រី លឹម មុនី និង លោក នី ចរិយា អគ្គលេខាធិការរងនៃ គ.ជ.ប ត្រូវបាន ចៅក្រមស៊ើបសួរសាលាដំបូងរាជធានីភ្នំពេញ សម្រេចចេញ ដីកាឃុំខ្លួនជាបណ្តោះអាសន្ន ដោយចោទពីបទសូកប៉ាន់សាក្សី និងបទសមគំនិតសូកប៉ាន់សាក្សី នៅថ្ងៃទី ២ ខែឧសភា។
គួររំលឹកដែរថា តុលាការក្រុងភ្នំពេញ ធ្លាប់បានកោះហៅ តំណាងរាស្រ្តបីរូប គឺ លោក កឹម សុខា លោក តុ វ៉ាន់ចាន់ និងលោក ពិន រតនា មកបំភ្លឺតាមការចោទប្រកាន់របស់ ស្រី មុំ ក្នុងនាមជាសាក្សី និងទាក់ទងនឹងសំណុំរឿងសញ្ចារកម្ម ប៉ុន្តែអ្នកទាំង៣ មិនដែលមកឆ្លើយបំភ្លឺតាមដីការបស់តុលាការឡើយ។ កាលពីថ្ងៃទី២៦ ខែឧសភា លោក កឹម សុខា ត្រូវបានអយ្យការអមសាលាដំបូងរាជធានីភ្នំពេញ ចោទប្រកាន់ថា បានប្រព្រឹត្តបទល្មើសជាក់ស្ដែង មាត្រា៥៣៨ នៃក្រមព្រហ្មទណ្ឌ បន្ទាប់ពីលោកបានបដិសេធមិនចូលខ្លួនទៅបំភ្លឺចំនួន ២លើកក្នុងសំណុំរឿងសញ្ចារកម្ម ពាក់ព័ន្ធនឹងអ្នកនាង ខុម ចាន់តារាទី ហៅ ស្រីមុំ។ រហូតមកដល់ពេលនេះ លោក កឹម សុខា បានប្រកាន់យកគោលជំហរមិនឆ្លើយ មិនឆ្លង និងមិនឈ្លោះ ចំពោះទំនាក់ទំនងមួយនេះ ហើយបានសម្ងំលាក់ខ្លួនពីការតាមចាប់របស់តុលាការ នៅទីស្នាក់ការគណបក្ស តាំងពីថ្ងៃទី២៦ ឧសភា ២០១៦ មកម៉្លេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ