លោកកឹម សុខាណែនាំមិនឱ្យបេក្ខជននិយាយពីពាក្យស្លោកចម្រូងចម្រាសពេលចុះឃោសនា
លោកកឹម សុខាប្រធានគណបក្សសង្គ្រោះជាតិនៅថ្ងៃទី ១៣ មីនានេះ កំពុងបន្តបំពាក់បំប៉នគោលនយោបាយចំនួន៥ចំណុចរបស់ខ្លួនទៅដល់បេក្ខជនក្រុមប្រឹក្សាឃុំសង្កាត់នៅខេត្តកំពង់ចាម។ ប៉ុន្តែលោកកឹម សុខា មិនបានណែនាំឱ្យសកម្មជនប្រើប្រាស់ពាក្យស្លោកដូរមេឃុំបម្រើបក្ស ដាក់មេឃុំបម្រើរាស្ត្រនោះទេ។ ការណែនាំមិនឱ្យប្រើពាក្យស្លោកដ៏ចម្រូងចម្រាស់នេះ គឺខណៈដែលគណបក្សប្រជាជនកម្ពុជាព្រមានប្តឹងគណបក្សសង្គ្រោះជាតិទៅកាន់តុលាការ។ គួររំលឹកថា លោកកឹម សុខា បានផ្តើមចេញយុទ្ធនាការឃោសនាតាំងពីថ្ងៃ ០៦ មីនាមក។ ហើយលោកកឹម សុខា នឹងបន្តចុះឃោសនាឱ្យចប់២៥ខេត្តក្រុងនៅមុនការឃោសនាបោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
លោកកឹម សុខាប្រធានគណបក្សសង្គ្រោះជាតិ មិនឱ្យបេក្ខជនរបស់ខ្លួនឃោសនាអ្វីក្រៅពីគោលនយោបាយចំនួន ៥ចំណុចរបស់ខ្លួនទៅដល់ប្រជាពលរដ្ឋនោះទេ។ នេះគឺជាការបញ្ជាក់ពីលោកស្រីឌុច នូសេរី ប្រតិបត្តិខេត្តកំពង់ស្ពឺដែលបានប្រាប់វិទ្យុបារាំងនៅថ្ងៃទី ១៣មីនានេះ។ លោកស្រីបានបន្តទៀតថា លោកកឹម សុខា បានណែនាំមិនឱ្យឃោសនាងាកឆ្វេង ងាកស្តាំខុសពីគោលនយោបាយទាំង ៥ចំណុចរបស់បក្សនោះទេ ហើយសូម្បីតែពាក្យស្លោកកំពុងពេញនិយមរបស់គណបក្សសង្គ្រោះជាតិ«ដូរមេឃុំបម្រើបក្ស ដាក់មេឃុំបម្រើរាស្ត្រ» ក៏លោកណែនាំមិនឱ្យឃោសនាដល់ប្រជាពលរដ្ឋពេលឃោសនានោះដែរ។
ទន្ទឹមនឹងនេះ ប្រតិបត្តិខេត្តកំពត និងខេត្តតាកែវ ក៏បានបញ្ជាក់ដែរថា លោកកឹម សុខាមិនបាននិយាយពីពាក្យស្លោករបស់គណបក្សក្នុងពេលចុះឃោសនាពីគោលនយោបាយបក្សនៅទីតាំងរបស់ខ្លួននោះទេ។ សម្រាប់ខេត្តកំពត លោកកឹម សុខាផ្តោតសំខាន់ទៅលើការបង្រួបបង្រួមផ្ទៃក្នុងបក្ស និងយន្តការ ៥ចំណុចសម្រាប់ឃោសនាតែប៉ុណ្ណោះ។ នេះបើតាមការបញ្ជាក់ពីលោក យឹន ឈូករ័ត្ន ក្រុមការងារថ្នាក់ខេត្តរបស់គណបក្សសង្គ្រោះជាតិ។ គោលនយោបាយទាំង ៥ចំណុចរួមមាន ការពង្រឹងសិទ្ធិអំណាចប្រជាពលរដ្ឋ ការលើកកម្ពស់ជីវភាពប្រជាជន និងវិមជ្ឈការដែលគណបក្សប្រឆាំងសន្យាផ្តល់ប្រាក់ ៥០ម៉ឺនដុល្លារក្នុងរយៈពេល ១ឆ្នាំជាដើម។
សូមរំលឹកថា ពាក្យលោករបស់គណបក្សដែលបានសម្រេចដាក់សម្រាប់ការបោះឆ្នោតឃុំខាងមុខ បានក្លាយជាសង្គ្រាមប៉ាការវាងគណបក្សសង្គ្រោះជាតិ និងគណបក្សប្រជាជនកម្ពុជា។ គណបក្សកាន់អំណាចបានប្រកាសប្តឹងគណបក្សសង្គ្រោះជាតិទៅតុលាការក៏ព្រោះតែពាក្យនេះ គណបក្សកាន់អំណាចយល់ឃើញថាជាពាក្យញុះញ៉ុង និងប្រមាថមន្ត្រីឃុំសង្កាត់ដែលរាស្ត្រជាអ្នកបោះឆ្នោតគាំទ្រ។ ស្របពេលគ្នានេះ មេឃុំ និងចៅសង្កាត់រាប់រយនាក់ មកពីខេត្តក្រុងមួយចំនួន រួមទាំងរាជធានីភ្នំពេញមួយចំនួនផង បានចេញសេចក្តីថ្លែងការណ៍ថ្កោលទោសគណបក្សសង្គ្រោះជាតិចំពោះពាក្យស្លោកដ៏ចម្រូងចម្រាស់នេះផងដែរ។
គួរកត់សំគាល់ថា ទន្ទឹមគ្នានេះ ក្រុមអ្នកគាំទ្រគណបក្សប្រជាជនកម្ពុជា ក៏បានបង្កើតពាក្យស្លោកថ្មីមួយដែរ គឺកុំយកមេឃុំប្រូ មកដូរមេឃុំពិត។ បើទោះបីជាមិនត្រូវបានគណបក្សទទួលស្គាល់សម្រាប់យុទ្ធនាការឃោសនាផ្លូវការណ៍របស់បក្សមែន ក៏មន្ត្រីជាន់ខ្ពស់គណបក្ស មានជាអាថ៌ លោក ខៀវ កាញារីទ្ធ រដ្ឋមន្ត្រីក្រសួងពត៌មានបានអំពាវនាវឱ្យមានការផ្សព្វផ្សាយយ៉ាងទូលំទូលាយចំពោះពាក្យស្លោកនេះដែរ។ ចំពោះបញ្ហាពាក្យស្លោករបស់គណបក្សសង្គ្រោះជាតិដ៏ចម្រូងចម្រាស់នេះ គណបក្សនៅមិនទាន់បញ្ជាក់ជាជំហរផ្លូវការថា ដូរ ឬក៏មិនដូរនោះទេ។ នេះបើតាមការបញ្ជាក់របស់លោកយឹម សុវណ្ណ អ្នកនាំពាក្យគណបក្សសង្គ្រោះជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ