សំណុំរឿងព្រំដែន៖ ខ្មែរប្រកួតជម្រុះរកអ្នកឈ្នះ មុននឹងឈានទៅប៉ះវៀតណាម?
ចុះផ្សាយនៅថ្ងៃ៖
ស្តាប់ - ០៤:២៣
ទំនាស់ព្រំដែនរវាងខ្មែរនិងខ្មែរ នៅមិនទាន់បញ្ចប់នៅឡើយទេ។ មុននេះបន្តិច ខ្មែរឈ្លោះគ្នាលើការបោះបង្គោលព្រំដែន។ ឥឡូវនេះ ទំនាស់បានរាលដាលដល់ការប្រើប្រាស់ផែនទីក្នុងការកំណត់ព្រំដែនជាមួយប្រទេសជិតខាង។ ចំពោះការខ្វែងគំនិតគ្នារវាងខ្មែរគ្នាឯងនេះ មតិមួយចំនួនហៅថា វាគឺជាការប្រកួតគ្នាដើម្បីរកអ្នកឈ្នះ មុននឹងឈានទៅតទល់ជាមួយប្រទេសវៀតណាម។ ជាការប្រកួត ដែលគ្មានចំណេញអ្វីសោះ ដល់ជាតិ និងប្រជាជនខ្មែរ។
ព្រំដែន គឺជាបញ្ហាដែលចោទឡើងមិនចេះចប់នៅក្នុងប្រវត្តិសាស្ត្រកម្ពុជា។ បញ្ហាព្រំដែនរបស់កម្ពុជា មានតាំងពីជាមួយបរទេស និងជាពិសេស គឺជាមួយខ្មែរគ្នាឯង។ ដោយមិននិយាយអំពីទំនាស់ជាមួយប្រទេសជិតខាង បញ្ហាព្រំដែនបានក្លាយទៅជាចំណាប់ខ្មាំងរបស់អ្នកនយោបាយនៅកម្ពុជា។ អ្នកនយោបាយ ដែលតែងតែព្យាយាមយកបញ្ហាព្រំដែននេះ ទៅកេងចំណេញខាងនយោបាយសម្រាប់ខ្លួននិងបក្សពួក។
កន្លងទៅថ្មីៗនេះ បក្សប្រឆាំងនិងបក្សកាន់អំណាចនៅកម្ពុជា បានបង្ហាញជំហរួមគ្នាមួយលើបញ្ហាព្រំដែន គួរឲ្យកត់សម្គាល់។ ជំហរួមគ្នានោះគឺ គាំទ្រឲ្យពន្យារពេល ឬផ្អាកការបោះបង្គោលព្រំដែនជាមួយប្រទេសជិតខាងសិន ក្នុងករណីមានបញ្ហាចម្រូងចម្រាស់។
រហូតមកទល់ពេលនេះ ថ្វីត្បិតតែគណបក្សធំៗទាំងពីរនៅកម្ពុជា ធ្លាប់បានបង្ហាញជំហស្រដៀងគ្នាចំពោះបញ្ហាព្រំដែននេះក៏ដោយ ក៏គេសង្កេតឃើញថា បក្សទាំងពីរនេះ មិនទាន់ពួតដៃគ្នាជាធ្លុងមួយ ដើម្បីរួមគ្នាដោះស្រាយបញ្ហាព្រំដែនជាមួយប្រទេសជិតខាងនៅឡើយទេ។ ទាំងបក្សប្រឆាំង ទាំងបក្សកាន់អំណាច សុទ្ធតែទទួលស្គាល់ថា បញ្ហាព្រំដែនគឺជាអាយុជីវិតរបស់ជាតិខ្មែរទាំងមូល។ ប៉ុន្តែបក្សទាំងពីរនេះ នៅតែមានគំនិតខ្វែងគ្នាច្រើនលើបញ្ហាព្រំដែន ជាពិសេសការប្រើប្រាស់ផែនទី។
ថ្មីៗនេះ លោក អ៊ំ សំអាន តំណាងរាស្ត្រគណបក្សសង្គ្រោះជាតិ បានប្រកាសពីសហរដ្ឋអាមេរិកថា លោកបានរកឃើញផែនទីចំនួន២៦ផ្ទាំង។ លោក អ៊ំ សំអានអះអាងថា ផែនទីទាំង២៦ផ្ទាំងនោះ ជាផែនទីបោន ដែលព្រះបរមរតនកោដ្ឋបានយកទៅតម្កល់ទុកនៅសហរដ្ឋអាមេរិក តាំងពីឆ្នាំ១៩៦៤។ បើតាមមន្ដ្រីគណបក្សប្រឆាំងរូបនេះ ផែនទីដែលខ្លួនទើបតែរកឃើញ គឺមិនមានត្រាប្រទេសវៀតណាម ដូចផែនទីរបស់រដ្ឋាភិបាលសព្វថ្ងៃឡើយ។
ប៉ុន្តែមន្ដ្រីទទួលបន្ទុកកិច្ចការព្រំដែនកម្ពុជាគូសបញ្ជាក់ថា ផែនទីដែលលោក អ៊ំ សំអាន រកឃើញនៅសហរដ្ឋអាមេរិកនោះ មិនមានអ្វីខុសប្លែកពីផែនទីដែលរដ្ឋាភិបាលកំពុងប្រើនោះទេ។ បើតាមមន្ដ្រីរដ្ឋាភិបាល ផែនទីដែលលោក អ៊ំ សំអាន ទើបតែរកឃើញនេះ ត្រូវបានរដ្ឋាភិបាលយកពីអាមេរិកមកកម្ពុជាតាំងពីជាង១០ឆ្នាំមុនមកម្ល៉េះ។ ក្រៅពីនោះ មន្ដ្រីរដ្ឋាភិបាលនៃគណបក្សកាន់អំណាច បានដាក់វេនគ្នារិះគន់ បន្តុះបង្អាប់សកម្មភាពរបស់តំណាងរាស្ត្របក្សប្រឆាំង ថាជាការញុះញង់ ឃោសនា ដើម្បីវាយប្រហាររដ្ឋាភិបាលថែមទៀតផង។
នៅខណៈពេលដែលខ្មែរមានប្រទេសជិតខាងដែលលោភលន់ចង់បានទឹកដីខ្លាំង និងខណៈដែលបញ្ហាព្រំដែនរវាងកម្ពុជានិងប្រទេសជិតខាងនៅមិនទាន់រៀបចំឲ្យបានស្រួលបួលនៅឡើយ ខ្មែរបែរជាប្រឹងប្រែងប្រកួតគ្នាយកឈ្នះចាញ់ ដើម្បីតែផលប្រយោជន៍នយោបាយរៀងៗខ្លួន។ តើខ្មែរប្រឹងប្រកួតជម្រុះរកអ្នកឈ្នះ មុននឹងឈានទៅប៉ះជាមួយវៀតណាមឬ?តើការប្រកួតប្រជែងរកឈ្នះចាញ់រវាងខ្មែរគ្នាឯងនេះ ចំណេញអ្វីខ្លះ ដល់ជាតិ និងប្រជាជនខ្មែរ?
ចម្លើយនឹងសំណួរនេះមិនពិបាកទេ ព្រោះខ្មែរគ្រប់រូបទទួលស្គាល់ថា ការឈ្លោះទាស់ទែងគ្នារវាងខ្មែរគ្នាឯង វាគ្មានចំណេញអ្វីសោះ ដល់ជាតិ និងប្រជាជនខ្មែរ។ ដូច្នេះ សួរថាតើនៅប្រឹងឈ្លោះគ្នាដល់ពេលណាទៀត? បើសូម្បីតែខ្មែរមិនទាន់ទាំងអាចដោះស្រាយបញ្ហាព្រំដែនជាមួយជាតិខ្លួនឯងបានផងនោះ តើខ្មែរអាចប្រឈមមុខជាមួយប្រទេសជិតខាងបានយ៉ាងម៉េច?
ផ្ដើមចេញពីការតម្កល់ផលប្រយោជន៍ជាតិជាធំ អ្នកនយោបាយខ្មែរត្រូវតែពិចារណាឡើងវិញ ដោយត្រូវធានាថា រាល់សកម្មភាពរបស់ខ្លួនចំពោះបញ្ហាព្រំដែន មិនមែនធ្វើឡើងដើម្បីកេងចំណេញខាងនយោបាយឡើយ។ ជាមួយគ្នានេះ អ្នកនយោបាយព្រមទាំងភាគីពាក់ព័ន្ធទាំងអស់ ចាំបាច់ពួតដៃគ្នាធ្វើការសិក្សាស្រាវជ្រាវរកជំហរួមមួយ មុននឹងឈានទៅដោះស្រាយជាមួយប្រទេសជិតខាង។
កម្ពុជាចាំបាច់ត្រូវស្វែងរកការឯកភាពជាតិជាមុនសិន ព្រោះបើពុំដូច្នោះទេ បញ្ហាព្រំដែននឹងនៅតែជាបញ្ហារ៉ាំរ៉ៃ ដែលចោទឡើងមិនចេះចប់នៅក្នុងប្រវត្តិសាស្ត្រខ្មែរ។ ការដោះស្រាយបញ្ហាព្រំដែនជាមួយបរទេស ខណៈដែលគ្មានការឯកភាពគ្នាពីសំណាក់ខ្មែរគ្នាឯង ក្រៅតែពីធ្វើឲ្យខាតបង់ហើយ វានឹងធ្វើឲ្យខ្មែរចាញ់ប្រៀបគេ ទាំងកម្លាំងនយោបាយនិងកម្លាំងការទូតថែមទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ