កម្ពុជាបង្កើតមហោស្រពជាតិភាពយន្តខ្នាតខ្លីលើកទី១
កម្ពុជានឹងរៀបចំមហោស្រពជាតិភាពយន្តខ្នាតខ្លីលើកទី១ឆ្នាំ២០១៦ ដើម្បីរួមចំណែកអភិវឌ្ឍវិស័យឧស្សាហកម្មភាពយន្តរបស់ខ្លួន។ មហោស្រពភាពយន្តខ្នាតខ្លីនេះ នឹងទទួលយកស្នាដៃភាពយន្តខ្នាតខ្លី មិនលើសពី១៥នាទី ពីសាធារណៈជនតាមលក្ខខណ្ឌរបស់ខ្លួន នៅថ្ងៃទី១៥ ខែវិច្ឆកា ខាងមុខនេះ។ ស្នាដៃភាពយន្តខ្លីចំនួន៥នឹងត្រូវជ្រើសរើសសម្រាប់ពានរង្វាន់។
ចុះផ្សាយនៅថ្ងៃ៖
ស្តាប់ - ០២:៣២
ការបង្កើតព្រឹត្តិការណ៍នេះ គឺដើម្បីលើកកម្ពស់ និងបង្កើនសមត្ថភាពប្រកួតប្រជែង បង្កើតនូវបរិស្ថានបណ្តុះពន្លកថ្មី ផ្តល់ការលើកទឹកចិត្ត ការសម្របសម្រួល និងការគាំទ្រ ក្នុងការអភិវឌ្ឍសមត្ថភាព ការបញ្ចេញគំនិតច្នៃប្រឌិត និងសំឡេងរបស់យុវផលិតករវ័យក្មេងកម្ពុជា ដើម្បីរួមចំណែកអភិវឌ្ឍឧស្សាហកម្មភាពយន្ត។ នេះបើតាមក្រសួងវប្បធម៌ ក្នុងសេចក្តីជូនដំណឹងកាលពីថ្ងៃទី២៩ ខែកក្កដា។
ភាពយន្តដែលផលិតត្រូវផ្អែកទៅលើខ្លឹមសារពីរ គឺ វប្បធម៌/សង្គម និងសង្គម/ការអភិវឌ្ឍ។ លក្ខខណ្ឌ៧ចំណុចត្រូវបានកំណត់សម្រាប់អ្នកចូលរួមដាក់ភាពយន្តខ្នាតខ្លីប្រកួតប្រជែង ដែលមានដូចជា ភាពយន្តដែលផលិតដោយផលិតករខ្មែរ ផលិតចាប់ពីខែមករា ឆ្នាំ២០១៤ ឆ្លងកាត់ថ្នាក់តែងនិពន្ធរឿង មានថិរវេលាបញ្ចាំងមិនលើសពី១៥នាទី ជាទម្រង់ឌីជីថល ចំណងជើងរងជាភាសាអង់គ្លេស ហើយខ្សែភាពយន្តខ្នាតខ្លីផ្សេងទៀតដែលផលិតដោយជនជាតិខ្មែរ និងបរទេសអាចដាក់បញ្ចាំដោយមិនចាំបាច់ប្រកួតប្រជែងបាន។
មហោស្រពភាពយន្តខ្នាតខ្លីនឹងចាប់ផ្តើមចាប់ពីថ្ងៃទី០៩ ខែមករា ឆ្នាំ២០១៧ ដល់ថ្ងៃទី១៤ ខែមករា ឆ្នាំ២០១៧។ កាលបរិច្ឆេទទទួលភាពយន្តខ្នានខ្លីពីផលិតករទូទៅ គឺនៅថ្ងៃទី១៥ ខែវិច្ឆកា ឆ្នាំ២០១៦។ ចំណែកកាលបរិច្ឆេទទទួលភាពយន្តខ្នានខ្លីពីផលិតករដែលឆ្លងកាត់ថ្នាក់តែងនិពន្ធរឿង គឺនៅថ្ងៃទី៣០ ខែវិច្ឆកា ឆ្នាំ២០១៦។
សូមបញ្ជាក់ថាស្នាដៃភាពយន្តជម្រើសចុងក្រោយ៥ចំណងជើង នឹងត្រូវដាក់ឲ្យទស្សនិកជនបោះឆ្នោតតាមអនឡាញ ហើយគណៈកម្មការរៀបចំមហោស្រពមានសិទ្ធិបញ្ជូនទៅចូលរួមក្នុងមហោស្រពភាពយន្តថ្នាក់តំបន់ និងអន្តរជាតិ។
លោក ហួយ សុជាតិ ប្រធានការិយាល័យរដ្ឋបាលនៃនាយកដ្ឋានភាពយន្ត បានថ្លែងថាមហោស្រពជាតិភាពយន្តខ្នាតខ្លីនេះនឹងរួមចំណែកបណ្តុះចំណេះដឹង របស់យុវជនដែលមានទេពកោល្យផលិតភាពយន្ត ដើម្បីឲ្យវិស័យភាពយន្តទាំងមូលចូលក្នុងទីផ្សារដោយមិនមានការព្រួយបារម្ភ។ លោកកត់សម្គាល់ថារាល់ថ្ងៃនេះបច្ចេកទេសនៃការផលិត និងថវិកា(សម្រាប់ការផលិត) នៅមានតិច ដូច្នេះបើប្រៀបជាមួយនឹងភាពយន្តគេ(បរទេស) គឺខ្សោយជាងគេច្រើន។
លោកឆាយ បូរ៉ា ជាផលិតករភាពយន្តខ្មែរ និងជាប្រធានសមាគមភាពយន្តកម្ពុជា បានថ្លែងថាលោកគាំទ្រចំពោះការរៀបចំព្រឹត្តិការណ៍ប្រកួតប្រជែកភាពយន្តខ្នាតខ្លីនេះ ដោយចាត់ទុកថាវាជាចំណុចល្អសម្រាប់ផលិតករក្មេងៗ ដែលគ្មានលទ្ធភាពធ្វើភាពយន្តខ្នាតធំ គឺគាត់អាចធ្វើភាពយន្តខ្នាតខ្លីសម្រាប់ប្រកួតប្រជែងបាន។ លោកបន្ថែមថា ប្រសិនបើយុវផលិតករស្រឡាញ់វិស័យភាពយន្តពិតប្រាកដ នោះគាត់គឺជាអ្នករួមចំណែកធ្វើឲ្យវិស័យនេះរីកចំរើនទៅមុខ ផ្ទុយទៅវិញបើពួកគាត់គ្រាន់តែធ្វើភាពយន្តដើម្បីបំបាត់ការអផ្សុក នោះអាចនឹងធ្វើឲ្យវិស័យនេះថមថយទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ