«ទ្រឹស្តី រ» របស់លោក យ៉ង សាំងកុមារ ដែលជាអ្នកជំរុញឱ្យបង្កើតគណបក្សមូលដ្ឋាន
លោក យ៉ង សាំងកុមារ ស្ថាបនិកម្នាក់នៃបណ្តាញពលរដ្ឋដើម្បីអភិវឌ្ឍន៍សង្គម កំពុងជំរុញសមាជិកនៃបណ្តាញនោះ ឱ្យបង្កើតគណបក្សនយោបាយនៅតាមឃុំចាប់ពីឆ្នាំ២០១៥ទៅ។ ប្រធានមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា (CEDAC) រូបនេះ បានលើកទស្សនៈមួយឡើងកាលពីថ្ងៃសៅរ៍ នៅក្នុងការប្រជុំថ្នាក់ជាតិលើកទី១របស់បណ្តាញសង្គម ដែលមានឈ្មោះលើហ្វេសប៊ុកថា«ខ្មែរដើម្បីខ្មែរ»។ លោក យ៉ង សាំងកុមារ ដាក់ឈ្មោះឱ្យទស្សនៈនោះថា«ទ្រឹស្តីរ »។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
បណ្តាញពលរដ្ឋដើម្បីអភិវឌ្ឍន៍សង្គម ដែលត្រូវបានអះអាងថាបង្កើតឡើងនៅឆ្នាំ២០១៤ ដោយបញ្ញវន្តខ្មែរក្នុងសង្គមស៊ីវិលប្រហែល១០នាក់ កំពុងជំរុញឱ្យប្រជាជននៅតាមមូលដ្ឋានបង្កើតគណបក្សនយោបាយ ដើម្បីចូលរួមប្រកួតប្រជែងក្នុងការបោះឆ្នោតឃុំសង្កាត់ឆ្នាំ២០១៧។
ក្នុងចំណោមបញ្ញវន្តទាំងនោះ ប្រធានមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា ហៅកាត់ថាអង្គការសេដាក គឺជាសមាជិកស្ថាបនិកនៃបណ្តាញនោះម្នាក់ ដែលបានដឹកនាំការប្រជុំថ្នាក់ជាតិលើកទី១របស់សមាជិកប្រហែល២០០នាក់ កាលពីថ្ងៃសៅរ៍។ បណ្ឌិត យ៉ង សាំងកុមារ នៅព្រឹកនោះ បានរំលេចទស្សនៈមួយឡើងបែបកំប្លែងថា «ទ្រឹស្តី រ» មាន រ នាំទៅរុងរឿង និង រ នាំទៅរលាយរលត់។ អ្នកកសិកម្មពន្យល់ថា ទង្វើអ្វីដែលផ្តើមដោយអក្សរ រ នាំទៅរលាយរលត់មាន «រអ៊ូ» «រង់ចាំ» «រិះគន់» «រញ៉េវរញ៉ាវ» រីឯ រ ដែលនាំទៅរុងរឿងគឺ «រាប់រក» «រីករាយ» «រាក់ទាក់» «រាវ» «រៀន» «រួបរួម»។
អ្នកកសិកម្មរូបនេះចោទសួរថា៖ «រត់» និង«រត់ចោលជួរ» ជារុងរឿង ឬរលាយ? ហើយបើក្នុងពលរដ្ឋ និងរដ្ឋមួយសំបូរតែ រ រលាយយ៉ាងម៉េចទៅ? ចុះបើក្នុងរដ្ឋហ្នឹងពលរដ្ឋសំបូរ រ រុងរឿង?
កន្លងទៅ ការធ្វើសកម្មភាពជាមួយគណបក្សនយោបាយ ជាពិសេសជាមួយគណបក្សនៅក្រៅរដ្ឋាភិបាល តែងរងការបំភិតបំភ័យ ឬការធ្វើទុកបុកម្នេញនៅតាមភូមិឃុំ ប៉ុន្តែថ្មីៗនេះ ការគំរាមកំហែង និងអំពើហិង្សាទាក់ទងនឹងគណបក្សនយោបាយនៅថ្នាក់ក្រោមជាតិ ត្រូវបានកត់សម្គាល់ឃើញថា ថយចុះនៅកម្ពុជា។
បណ្តាញពលរដ្ឋដើម្បីអភិវឌ្ឍន៍សង្គម ព្យាយាមធ្វើ«ឱ្យប្រជាពលរដ្ឋចូលរួមប្រកបដោយប្រសិទ្ធភាពក្នុងកិច្ចការនយោបាយ ដើម្បីកសាងសង្គមប្រជាធិបតេយ្យបានល្អប្រសើរ»។ នេះបើយោងតាមឯកសារទស្សនទានស្តីអំពីយុទ្ធសាស្ត្រកសាងសង្គមប្រជាធិបតេយ្យ ដែលចេញផ្សាយក្នុងអង្គប្រជុំរបស់សមាជិកដែលមកពី១៣បណ្តាញសង្គមផ្សេងៗគ្នានោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ