«ពិពិធភាពភាសាខ្មែរ» ត្រូវបានលើកមកជជែកខណៈភាសាខ្មែរកំពុងប្រើប្រាស់ខ្វះការឯកភាពក្នុងសង្គម
ដើម្បីស្វែងរកឯកភាពខាងការសរសេរអក្ខរាវិរុទ្ធ ការបង្កើតពាក្យ កម្ចីពាក្យប្រកបដោយក្បួនខ្នាតត្រឹមត្រូវ ក្រុមប្រឹក្សាជាតិភាសាខ្មែរ រួមជាមួយនឹងក្រសួងអប់រំ បានបើកវេទិកាសិក្ខាសាលាចំនួនពីរថ្ងៃ គឺថ្ងៃព្រហស្បតិ៍ ទី ១៥ ខែកញ្ញានេះ និងថ្ងៃសុក្រស្អែក ក្រោមប្រធានបទ«ពិពិធភាពភាសាខ្មែរ»។ កិច្ចប្រជុំ ដែលមិនសូវញឹកញាប់នេះ បានធ្វើឡើងដោយមានបទអន្តរាគមន៍ពីសំណាក់អ្នកជំនាញភាសាជាតិ និងបរទេសជំនាញភាសាខ្មែរផងដែរ។
ចុះផ្សាយនៅថ្ងៃ៖
ស្តាប់ - ០២:០០
គេអាចនិយាយបានថា ដល់ពេលវេលា ឬក៏ជ្រែពេលបន្តិចក៏ថាបាន ដែលខ្មែរត្រូវតែឯកភាពគ្នា ក្នុងការប្រើប្រាស់ភាសាខ្មែរ ទាំងការសរសេរអក្ខរាវិរុទ្ធ ទាំងការបង្កើតពាក្យថ្មី និងកម្ចីពាក្យជាដើម។ នៅក្នុងសិក្ខាសាលារយៈពេល ២ថ្ងៃនេះ លោកបណ្ឌិត ច័ន្ទ សំណព្វ អនុប្រធានរាជបណ្ឌិតសភាកម្ពុជា និងជាប្រធានក្រុមប្រឹក្សាជាតិភាសាខ្មែរ បានលើកឡើងថា ការជជែកគ្នាលើប្រធានបទនេះ មានសារៈសំខាន់ ដើម្បីស្វែងរកគន្លឹះថ្មីៗថែមទៀត ក្នុងការអភិរក្ស និងអភិវឌ្ឍភាសាខ្មែរឲ្យកាន់តែរីកចម្រើនទៅមុខ ដោយឈរលើស្មារតីឯកភាពជាតិខាងភាសា និងរក្សាបាននូវអត្តសញ្ញាណជាតិខ្មែរ។
លើសពីនេះលទ្ធផលនៃការពិភាក្សានេះ នឹងអាចជាទុនសម្រាប់ចែករំលែក ព្រមទាំងជួយផ្សព្វផ្សាយទៅដល់មហាជន ពិធីករ ពិធីការិនី អ្នកបង្រៀនភាសាខ្មែរ ដែលជាចលករនៃការបណ្តុះបណ្តាលភាសាខ្មែរ ដល់ជនបរទេសផងដែរ។ នេះបើតាមលោកបណ្ឌិត ច័ន្ទ សំណព្វ។
នៅក្នុងសិក្ខាសាលានេះដែរ អ្នកជំនាញភាសាខ្មែរ ដែលជាសាស្ត្រាចារ្យបង្រៀនភាសាខ្មែរជនជាតិចិន និងជនជាតិថៃ មកពីសកលវិទ្យាល័យប្រទេសថៃ និងចិន ក៏បានធ្វើបទបង្ហាញ ក្នុងចំណោមបទបង្ហាញតៗគ្នាចំនួន៩។
ជាការពិតការធ្វើសិក្ខាសាលាស្តីពីពិពិធភាពភាសាខ្មែរ គឺជាការស្វែងរកស្តង់ដារួមមួយ ខាងការនិយាយ ការអាន ការសរសេរ ការបង្កើតពាក្យ ការប្រើប្រាស់ពាក្យជាដើម គឺជាកត្តាចាំបាច់ ក្នុងការអភិរក្ស និងអភិវឌ្ឍភាសាខ្មែរនាពេលបច្ចុប្បន្ន។
ភាសា និងអក្សរសាស្ត្រខ្មែរ គឺជាការបង្ហាញពីអត្តសញ្ញាណរបស់ជាតិសាសន៍ខ្មែរ និងព្រលឹងវប្បធម៌ខ្មែរ។ ជាការកត់សម្គាល់ ការប្រើប្រាស់ភាសាខ្មែរ ទាំងសំណេរ និងការនិយាយស្តីបច្ចុប្បន្ន នៅមិនទាន់មានឯកភាពគ្នា ឬក៏មានការណែនាំ ត្រួតពិនិត្យពីសំណាក់ស្ថាប័នមានសមត្ថកិច្ចនោះទេ។ ជាក់ស្តែងសំណេរនៅលើបណ្តាញសង្គមនានា ជាពិសេសហ្វេសប៊ុក បាននឹងកំពុងបង្កឲ្យមានភាពខាតបង់កិត្យានុភាពភាសាខ្មែរ យ៉ាងច្បាស់លាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ