ទាហានមួកខៀវសញ្ជាតិកម្ពុជា៣នាក់ទទួលមេដាយបច្ឆាមរណៈពី អ.ស.ប
ថ្ងៃទី២៩ ខែឧសភា គឺជាទិវាអន្តរជាតិនៃកងកម្លាំងរក្សាសន្តិភាពអង្គការសហប្រជាជាតិ។ ក្នុងឱកាសនេះ នៅឯទីស្នាក់ការរបស់ខ្លួន អ.ស.ប រៀបចំពិធីប្រគល់មេដាយបច្ចាមរណៈឱ្យទាហាន នគរបាល និងបុគ្គលិកស៊ីវិល សរុប១២៦រូប ដែលបានពលីក្នុងបេសកកម្មរក្សាសន្តិភាពអង្គការសហប្រជាជាតិក្នុងឆ្នាំ២០១៤។ ក្នុងចំណោមនោះ ទាហានមួកខៀវសញ្ជាតិកម្ពុជា៣រូប ផ្នែកវិស្វកម្មព្រលានយន្តហោះដែលបានស្លាប់ក្នុងប្រទេសម៉ាលី ក៏ទទួលមេដាយអតីតអគ្គលេខាធិការអង្គការសហប្រជាជាតិដែរ។នៅកម្ពុជាលោកនាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិហ្វឹកហ្វឺនរក្សាសន្តិភាពឧត្តុង្គ បានធ្វើពិធីរម្លឹកដល់យុទ្ធជនទាំងបីរូបបន្ថែមទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
អតីតអនុសេនីយ៍ឯក មាគ សេរីវឌ្ឍនា អតីតអនុសេនីយ៍ទោ នី ណុល និងអនុសេនីយ៍ទោ ចន្ទ សំគុន ដែលបានពលីក្នុងបេសកម្មរក្សាសន្តិភាពក្នុងក្របខ័ណ្ឌអង្គការសហប្រជាជាតិនៅប្រទេសម៉ាលី កាលពីឆ្នាំ២០១៤ ត្រូវបានអង្គការពិភពលោកនេះប្រគល់មេដាយបច្ឆាមរណៈជូន ដើម្បីទទួលស្គាល់នូវការងារអាជីពកម្រិតខ្ពស់ ការលះបង់ និងសេចក្តីក្លាហាន ព្រមទាំងដើម្បីចងចាំនូវវីរៈភាពរបស់អតីតទាហានមួកខៀវសញ្ជាតិកម្ពុជាទាំងបីរូប។
មេដាយបច្ឆាមរណៈ ឌែក ហាម៉ាស្កចូលដ៍ (Dag Hammarskjöld) នេះក៏ត្រូវប្រគល់ជូនអតីតទាហាន នគរបាល និងបុគ្គលិកស៊ីវិលរបស់អង្គការសហប្រជាជាតិសញ្ជាតិផ្សេងៗចំនួន១២៣រូបទៀត ដែលបានបាត់បង់ជីវិតនៅក្នុងបេសកកម្មរក្សាសន្តិភាពនៅក្នុងប្រទេសដ៏ទៃទៀតដែរ។ លោក ឌែក ហាម៉ាស្កចូលដ៍ គឺជាអតីតអគ្គលេខាធិកាអង្គកាសហប្រជាជាតិពីឆ្នាំ១៩៥៣ ដល់ឆ្នាំ១៩៦១ ដែលបានដើរតួនាទីយ៉ាងសំខាន់ក្នុងការរក្សាសន្តិភាពពិភពលោក ប៉ុន្តែលោកបានស្លាប់ដោយសារធ្លាក់យន្តហោះពេលកំពុងធ្វើដំណើរទៅចរចារកសន្តិភាពក្នុងប្រទេសកុងហ្គោ ក្នុងឆ្នាំ១៩៦១។
បច្ចុប្បន្ន បុរសស្ត្រីប្រហែល១២៥ ០០០នាក់កំពុងបំពេញបេសកកម្មថែររក្សាសន្តិភាពចំនួន១៦កន្លែងនៅក្នុងពិភពលោក ហើយចាប់តាំងពីបេសកកម្មរក្សាសន្តិភាពដំបូងក្នុងឆ្នាំ១៩៤៨ រហូតដល់ខែមេសា ឆ្នាំ២០១៥នេះ ទាហាន នគរបាល និងបុគ្គលិកស៊ីវិលអង្គការសហប្រជាជាតិ៣ ៣៥៨នាក់បានពលីដោយសារអំពើហិង្សា គ្រោះថ្នាក់ និងជំងឺ។
អតីតអនុសេនីយ៍ឯក មាគ សេរីវឌ្ឍនា និងអតីតអនុសេនីយ៍ទោ នី ណុល បានស្លាប់នៅខែមិថុនា ឆ្នាំ២០១៤ ដោយសារថបដង្ហើយ និងទាស់ចំណីអាហារ ហើយអតីតអនុសេនីយ៍ទោ ចន្ទ សំគុណ បានពលីនៅខែសីហា ឆ្នាំដដែល នៅពេលដែលអ្នកទាំងបីកំពុងបំពេញបេសកម្មផ្នែកវិស្វកម្មព្រលានយន្តហោះនៅតំបន់ងអាហ្វ្រិកភាគពាយ័ព្យ។
បច្ចុប្បន្ន កងកម្លាំងមួកខៀវអង្គការសហប្រជាជាតិសញ្ជាតិកម្ពុជាចំនួ៣១១នាក់កំពុងបន្តបេសកកម្មថែររក្សាសន្តិភាពនៅម៉ាលី ហើយ៤៨៩នាក់ទៀតនៅប្រទេសស៊ូដង់ខាងត្បូង។ ចាប់តាំងពីឆ្នាំ២០០៦មក កម្ពុជាបានបញ្ជូនកងកម្លាំងចូលរួមប្រតិបត្តិការរក្សាសន្តិសុខរបស់ អ.ស.ប នៅប្រទេសស៊ូដង់ ស៊ូដង់ខាងត្បូង សាធារណរដ្ឋអាហ្វ្រិកកណ្តាល ឆាដ ស៊ីរី លីបង់ និងម៉ាលី សរុប២ ៨១៦នាក់ ក្នុងនោះមាននារី៨១នាក់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ