ប្រជាពលរដ្ឋមានកង្វល់ចំពោះសេចក្តីព្រាងច្បាប់ថ្មី
នៅទីលានប្រជាធិបតេយ្យ ក្នុងរាជធានីភ្នំពេញ ប្រជាពលរដ្ឋ បានចូលរួមជជែកពិភាក្សាគ្នាជាសាធារណៈ ចំពោះសេចក្តីព្រាងច្បាប់ ស្តីពី ឧក្រិដ្ឋកម្មលើប្រព័ន្ធបច្ចេកវិទ្យា សេចក្តីព្រាងច្បាប់ ស្តីពី ដីកសិកម្ម និងសេចក្តីព្រាងច្បាប់ ស្តីពី សហជីពនៃសហគ្រាស។ វាគ្មិនដែលមកពីអង្គការសង្គមស៊ីវិល និងប្រជាពលរដ្ឋ បានសម្តែងមតិនិងកង្វល់របស់ខ្លួន ព្រោះថា សេចក្តីព្រាងច្បាប់ទាំងបីនេះអាចនឹងរឹតបណ្តឹងសិទ្ធិសេរីភាពរបស់ប្រជាជន ហើយពួកគេទាមទារឲ្យរដ្ឋាភិបាលដាក់បង្ហាញនិងបញ្ចេញច្បាប់ទាំងនេះ ឲ្យពួកគេបានដឹងឮនិងអាចចូលរួមផ្តល់យោបល់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៩
ជាវេទិកាសាធារណៈ ពេញមួយថ្ងៃអាទិត្យ ទី២១ធ្នូ ដែលមានប្រជាពលរដ្ឋ កសិករ កម្មករ ព្រះសង្ឃ យុវជន និងសិស្សនិស្សិត ចូលរួមប្រមាណជិត៩០០នាក់។ វេទិកានេះ ជាលើកទី១ ដែលផ្តួចផ្តើមឡើងដោយ បណ្តាញយុវជនកម្ពុជា សម្ព័ន្ធសហគមន៍កសិករកម្ពុជា សហជីព សង្គមស៊ីវិល មណ្ឌលសិទ្ធិមនុស្សកម្ពុជា និងមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ។
គោលបំណងនៃវេទិកានេះ គឺ ដើម្បីឲ្យប្រជាពលរដ្ឋសម្តែងមតិយោបល់និងបង្ហាញពីក្តីកង្វល់ចំពោះ សេចក្តីព្រាងច្បាប់ ស្តីពី ឧក្រិដ្ឋកម្មលើប្រព័ន្ធបច្ចេកវិទ្យា សេចក្តីព្រាងច្បាប់ ស្តីពី ដីកសិកម្ម និងសេចក្តីព្រាងច្បាប់ ស្តីពី សហជីពនៃសហគ្រាស។ វត្ថុបំណងមួយទៀត គឺដើម្បីផ្សព្វផ្សាយពីខ្លឹមសារនិងផលប៉ះពាល់នៃច្បាប់ទាំងបីនេះ ដល់ប្រជាពលរដ្ឋទូទៅ ពិសេស យុវជន កសិករ និងកម្មករ។ មិនតែប៉ុណ្ណោះ គឺដើម្បីប្រមូលមតិយោបល់ និងសំណូមពរទាំងឡាយ ដាក់ជូនរដ្ឋាភិបាល និងក្រសួងពាក់ព័ន្ធ ហើយទាមទារឲ្យមានដោះស្រាយ និងឆ្លើយតបសមរម្យ ។
តាំងពីម៉ោង៨ព្រឹក វាគ្មិន និងអ្នកចូលរួម បានពន្យល់ និងជជែកពិភាក្សា ប្តូរយោបល់ ជុំវិញខ្លឹមសារនៃសេចក្តីព្រាងច្បាប់ទាំងបី។ សេចក្តីព្រាងច្បាប់ដែលមានភាពចម្រូងចម្រាសខ្លាំងជាងគេ គឺ ច្បាប់ស្តីពីឧក្រិដ្ឋកម្មលើប្រព័ន្ធបច្ចេកវិទ្យា ដែលក្រុមសង្គមស៊ីវិលអះអាងថា មានការបែកធ្លាយពង្រាងច្បាប់នេះ។ ក្នុងនោះមាន ៦ជំពូក និង៤០មាត្រា។ មាត្រា២៨ស្តីពីខ្លឹមសារ និងគេហទំព័រ នៃជំពូកទី៤ ចែងពីបទល្មើស សេចក្តីព្រាងក្រៅផ្លូវការនេះ បានចែងពីទោសជាប់ពន្ធនាគារពី១ឆ្នាំ ទៅ៣ឆ្នាំ និងពិន័យប្រាក់ពី២លាន ដល់៦លានរៀល ចំពោះជនណាដែលប្រើប្រាស់ប្រព័ន្ធអ៊ីនធ័ណេត ធ្វើឲ្យប៉ះពាល់ដល់សន្តិសុខជាតិ ប៉ះពាល់ដល់សណ្តាប់ធ្នាប់សាធារណៈ និងស្វេរភាពនយោបាយ។
ចំពោះមាត្រា២៨នោះដែរ យុវជនមួយចំនួនដែលជានិស្សិតសិក្សាផ្នែកទស្សនវិជ្ជា បានសង្កត់ធ្ងន់ត្រង់ចំណុចបទល្មើសដែលប៉ះពាល់ដល់សណ្តាប់ធ្នាប់សាធារណៈ។ ពួកគេចង់ឲ្យអ្នកធ្វើច្បាប់កំណត់និយមន័យ កំណត់ព្រំដែន និងផ្តល់ការបកស្រាយឲ្យបានច្បាស់លាស់ ចំពោះ ពាក្យថា ប៉ះពាល់ដល់សណ្តាប់ធ្នាប់សាធារណៈ។
ដោយឡែក ចំពោះសេចក្តីព្រាងច្បាប់ ស្តីពី ដីកសិកម្ម កសិករដែលចូលរួមក្នុងវេទិកានេះ មានការព្រួយបារម្ភថា ច្បាប់នេះ អាចនឹងធ្វើឲ្យប៉ះពាល់ដល់ដីធ្លីដែលពួកគេកំពុងកាន់កាប់និងបង្កបង្កើនផល។
លោក វ៉ន ពៅ ប្រធានសមាគមន៍សេដ្ឋកិច្ចក្រៅប្រព័ន្ធ ដែលជាវាគ្មិននៅក្នុងវេទិកានេះ បានប្រាប់វិទ្យុបារាំងអន្តរជាតិថា លោកបានទទួលដំណឹងមិនផ្លូវការមួយថា សេចក្តីព្រាងច្បាប់ ស្តីពី សហជីពនៃសហគ្រាស ត្រូវបានបញ្ជូនដល់រដ្ឋសភាជាតិហើយ និងរង់ចាំតែថ្ងៃអនុម័តតែប៉ុណ្ណោះ។ លោកសំដែងការព្រួយបារម្ភដែលថា បើច្បាប់នេះនឹងអនុម័តឲ្យប្រើប្រាស់មែននេះ វានឹងបិទសិទ្ធិរបស់កម្មករក្នុងការចូលរួមបង្កើតសហជីព និងបំបិទសិទ្ធិរបស់សហជីពក្នុងការធ្វើសកម្មភាពដើម្បីបម្រើផលប្រយោជន៍របស់កម្មករ។ មិនតែប៉ុណ្ណោះ លោក វ៉ន ពៅ ថា ច្បាប់នេះអាចនឹងរឹតត្បិតសិទ្ធិធ្វើបាតុកម្ម កូដកម្ម របស់កម្មករ ដើម្បីទាមទារលក្ខខណ្ឌការងារសមរម្យ។
ទោះបីយ៉ាងណាក្តី លោក ផៃ ស៊ីផាន អ្នកនាំពាក្យទីស្តីការគណរដ្ឋមន្ត្រី បានបញ្ជាក់ប្រាប់វិទ្យុបារាំងអន្តរជាតិ RFI ថា រដ្ឋាភិបាលមិនបានរៀបចំសេចក្តីព្រាងច្បាប់ទាំងបីខាងលើនេះឡើយ ហើយថា រឿងនេះគឺសង្គមស៊ីវិលចេះតែបំប៉ោង និងបង្កើតព្រឹត្តិការណ៍ដើម្បីស្វែងរកជំនួយថវិកាតែប៉ុណ្ណោះ។
ចំពោះសេចក្តីព្រាងច្បាប់ ស្តីពី ឧក្រិដ្ឋកម្មលើប្រព័ន្ធបច្ចេកវិទ្យាវិញ លោក ផៃ ស៊ីផាន បានអះអាងថា ក្នុងអាណត្តិមុន នៅឆ្នាំ២០១២ រដ្ឋាភិបាលធ្លាប់បានលើកយកមកសិក្សាម្តងដែរ តែក្រោយមក ក៏ទុកចោលទៅវិញ ដោយមិនយកមកពិភាក្សានិងពិចារណាឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ