ខ្មែរនៅអាមេរិកធ្វើបាតុកម្មទាមទារឲ្យចិនឈប់គាំទ្ររដ្ឋាភិបាលកម្ពុជា
ពលរដ្ឋខ្មែររាប់រយនាក់នៅសហរដ្ឋអាមេរិក កាលពីម្សិលមិញ បាននាំគ្នាហែក្បួនធ្វើបាតុកម្មនៅមុខបរិវេណស្ថានអគ្គកុងស៊ុលចិនក្នុងរដ្ឋ California ដោយទាមទារឲ្យទីក្រុងប៉េកាំងឈប់គាំទ្ររដ្ឋាភិបាលលោក ហ៊ុន សែន ដែលពួកគេចាត់ទុកកើតឡើងពីការបោះឆ្នោតក្លែងក្លាយ។ ការទាមទារនេះដោយអ្នកធ្វើបាតុកម្មអះអាងថាដើម្បីកុំឲ្យកម្ពុជាដើរជាន់ដានប្រវត្តិសាស្ត្រដូចសម័យខ្មែរក្រហម។ តែអ្នកនាំពាក្យបក្សកាន់អំណាចនៅកម្ពុជា ចាត់ទុកការទាមទារនេះថា គ្មានឥទ្ធិពលនោះឡើយ។
ចុះផ្សាយនៅថ្ងៃ៖
ស្តាប់ - ០២:២០
សំឡេង«ចិនត្រូវតែគោរពសិទ្ធិមនុស្ស និងប្រជាធិបតេយ្យនៅកម្ពុជា ចិនឈប់គាំទ្រ ហ៊ុន សែន និងរដ្ឋាភិបាល ដែលកើតចេញពីការបោះឆ្នោតក្លែងក្លាយ…»។
នេះជាសម្រែកទាមទាររបស់ពលរដ្ឋខ្មែររាប់រយនាក់ នៅសហរដ្ឋអាមេរិក ដែលបាននាំគ្នាធ្វើបាតុកម្មនៅមុខស្ថានកុងស៊ុលចិន ប្រចាំទីក្រុង Los Angeles រដ្ឋ California កាលពីថ្ងៃទី២កញ្ញាឆ្នាំ២០១៨។ មូលហេតុដែលពលរដ្ឋខ្មែរទាមទារឲ្យចិនឈប់គាំទ្ររដ្ឋាភិបាលកម្ពុជានៅពេលនេះដោយពួកគេចាត់ទុកថា ជារដ្ឋាភិបាលខុសច្បាប់ ដែលកើតចេញពីការបោះឆ្នោតក្លែងក្លាយ។ ការលើកឡើងថា ការបោះឆ្នោតក្លែងក្លាយដោយក្រុមអ្នកតវ៉ាថាមកពីគ្មានវត្តមានអតីតគណបក្សសង្រ្គោះជាតិ ហើយថាការបោះឆ្នោតថ្ងៃទី២៩កក្កដាកន្លងមក មិនមានការទទួលស្គាល់ពីប្រទេសលោកសេរីធំៗ រួមមានសហរដ្ឋអាមេរិក និងសហភាពអ៊ឺរ៉ុបជាដើម។ ប៉ុន្តែផ្ទុយទៅវិញ មានការគាំទ្រពីប្រទេសមហាយក្សចិន និងរុស្ស៊ី។
អ្នកចូលរួមបាតុកម្ម បានលើកឡើងថា ការទាមទារឲ្យចិនដកខ្លួនពីកម្ពុជា គឺមិនមែនពលរដ្ឋខ្មែរស្អប់ប្រជាជនចិននោះទេ ប៉ុន្តែពួកគេមិនចង់ឲ្យរដ្ឋាភិបាលចិនកុំមុយនីស្តប្រើឥទ្ធិពលមកលើរដ្ឋាភិបាលកម្ពុជា ដែលបារម្ភពីការដើរជាន់ដានប្រវត្តិសាស្ត្រនៃរបបខ្មែរក្រហម ដែលចិនគាំទ្រនោះ ធ្វើឲ្យមានការសម្លាប់ពលរដ្ឋខ្មែររាប់លាននាក់ពីឆ្នាំ១៩៧៥ដល់១៩៧៩។
យ៉ាងណាក៏ដោយ លោក សុខ ឥសាន អ្នកនាំពាក្យគណបក្សប្រជាជនកម្ពុជា អះអាងថា ការធ្វើបាតុកម្មទាមទារឲ្យចិនឈប់គាំទ្ររដ្ឋាភិបាលកម្ពុជា គឺមិនអាចទៅរួចនោះឡើយ។
ការធ្វើបាតុកម្មនៅរដ្ឋ California នេះក៏មានការចូលរួមពីសំណាក់អនុប្រធានអតីតគណបក្សសង្គ្រោះជាតិ លោក អេង ឆៃអ៊ាង ផងដែរ។ នេះជាការបញ្ជាក់ នៅលើហ្វេសប៊ុករបស់លោក។
បើតាមគម្រោងពលរដ្ឋខ្មែរនៅសហរដ្ឋអាមេរិក ក៏នឹងធ្វើបាតុកម្មជាថ្មីទៀតនៅចុងខែកញ្ញាខាងមុខនេះ ប្រសិនបើប្រមុខរដ្ឋាភិបាលខ្មែរ ទៅចូលរួមកិច្ចប្រជុំនៅអង្គការសហប្រជាជាតិ។ លោក ហ៊ុន សែន ក៏បានប្រកាសរួចហើយថា លោកនឹងទៅចូលរួមកិច្ចប្រជុំនោះ ហើយបានផ្គើនឲ្យអ្នកគាំទ្រអតីតបក្សប្រឆាំងធ្វើបាតុកម្មប្រឆាំងរូបលោកទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ