គោរពវិញ្ញាណខន្តជនរងគ្រោះសម័យខ្មែរក្រហម៖ «គោលដៅដូចគ្នាតែកាលបរិច្ឆេទផ្សេងគ្នា»
ចុះផ្សាយនៅថ្ងៃ៖
ស្តាប់ - ០៥:០៩
មន្ត្រីនិងអ្នកគាំទ្រគណបក្សប្រជាជនកម្ពុជា ដោយមានការចូលរួមពីប្រជាជន បានបន្តប្រារព្ធថ្ងៃ២០ឧសភា ដែលគេយល់ថាជាថ្ងៃគោរព្ធវិញ្ញាណខន្តអ្នកដែលបានបាត់បង់ជីវិតទៅ ក្នុងរបបខ្មែរក្រហម។ ការប្រារព្ធពិធីនេះត្រូវបានធ្វើឡើងជាច្រើនកន្លែងនៅក្នុងប្រទេសតាមរូបភាពតូច ៗ ដោយសារពិធីនេះនៅមិនទាន់ចាត់ចូលជាថ្ងៃបុណ្យជាតិនៅឡើយ។ ខុសពីគណបក្សកាន់អំណាច បក្សប្រឆាំងបានជ្រើសរើសយកថ្ងៃ១៧មេសាទៅវិញទេសម្រាប់ធ្វើការគោរពវិញ្ញាណខន្តជនរងគ្រោះសម័យខ្មែរក្រហម។ តែការកំណត់ពេលវេលាខុសគ្នានេះ គឺបានធ្វើឡើងនៅក្នុងគោលដៅនិងខ្លឹមសារតែមួយ។
ថ្ងៃ២០ឧសភា កាលពីជាង២០ឆ្នាំមុន ក្នុងសម័យកាលអតីតរដ្ឋកម្ពុជា ត្រូវបានគេប្រារព្ធយ៉ាងខ្ជាប់ខ្ជួនថាជា«ទិវាចងកំហឹង»ដែលរបបប្រល័យពូជសាសន៍ប៉ុលពត បានសម្លាប់ប្រជាជនខ្មែរយ៉ាងរង្គាល។ ថ្ងៃដែលគេគិតថាអាចជួយលុបលាងទឹកភ្នែក និងមុខរបួស កាលពីជាង៣០ឆ្នាំមុននោះ បានបាត់ជាផ្លូវការពីប្រតិទិនថាជាថ្មីបុណ្យរបស់ជាតិមួយរយៈចុងក្រោយនេះ ក៏ប៉ុន្តែអាជ្ញាធរនានា និងអ្នកស្ម័គ្រស្មោះរបស់គណបក្សប្រជាជននៅតែរក្សាបាន និងប្រារព្ធទិវាបុណ្យ២០ឧសភានេះ សម្រាប់ជាការចង់ចាំ តាមរូបភាពទ្រង់ទ្រាយតូចៗ នៅទូទាំងប្រទេស។
ជាការកត់សម្គាល់ការប្រារព្ធទិវា ២០ឧសភានេះឡើងទោះផ្លូវការ ឬមិនផ្លូវការក្តី គេមើលមិនឃើញពីចំណុចអវិជ្ជមានពីការគោរពថ្ងៃនេះឡើង បើទោះណាជាប្រជាជនខ្មែរគ្រប់និន្នាការដែលធ្លាប់ទទួលរងអំពើព្រៃផ្សៃពីរបបប្រល័យពូជសាសន៍មិនបានធ្វើព្រមៗគ្នា ដូចកាលពីសម័យក្រោយរំដោះ ៧មករា ១៩៧៩ក៏ដោយ។
ជាការពិតថ្ងៃ២០ ឧសភា កំពុងអាចក្លាយជាផ្នែកមួយនៃសំណងរដ្ឋប្បវេណីនៃសម័យខ្មែរក្រហម ខណៈដែលមេដឹកនាំកំពូលនៃរបបនេះ កំពុងស្ថិតនៅក្នុងដំណើរការកាត់ទោសនៃតុលាការចំរុះនៅឡើយ។ នៅពេលដែលមានសាលក្រមស្ថាពរ សំណងរដ្ឋប្បវេណីសម្រាប់ជនរងគ្រោះនៃរបបខ្មែរក្រហមនោះ ត្រូវបានគេគិតថាជាការសង់ស្តូប ហើយអាចនឹងកំណត់យកថ្ងៃ២០ឧសភាជាថ្ងៃប្រវត្តិសាស្ត្រ សម្រាប់ជាការរំលឹកវិញ្ញាណខន្តសាច់ញាតិអ្នកដែលបានបាត់បង់ជីវិតទៅ នាពេលនោះ។
គេអាចនិយាយបានថានៅថ្ងៃខាងមុខថ្ងៃ២០ឧសភានឹងក្លាយជាថ្ងៃបុណ្យជាតិដ៏សំខាន់បំផុត ទីមួយវាអាចជួយលួងលោមទឹកចិត្តអ្នកដែលនៅសល់ពីការកាប់សម្លាប់ឲ្យអស់ចិត្ត និងមួយទៀត ២០ឧសភា គឺជាថ្ងៃដែលខ្មែរក្រហមបន្ទាប់ពីឡើងកាន់អំណាច នៅថ្ងៃទី១៧មេសា ឆ្នាំ១៩៧៥ ក្រោមការដឹកនាំរបស់សាឡុត ស ហៅ ប៉ុលពត បានដាក់ចេញនូវផែនការបន្សុទ្ធផ្ទៃក្នុងបក្ខកុម្មុយនីស្តកម្ពុជា ដែលនាំដល់ការកាប់សម្លាប់មនុស្សយ៉ាងព្រៃផ្សៃបំផុត។
តាមរយៈនេះគណបក្សប្រជាជនកម្ពុជាដែលបានវាយកំទេចនិងលុបបំបាត់របបខ្មែរក្រហមនៅប្រទេសកម្ពុជា ជាញឹកញយបានប្រកាន់យកថ្ងៃនោះជាថ្ងៃចងកំហឹងរហូតមក គ្រាន់តែថា ម្តងផ្លូវការ ម្តងមិនផ្លូវការ ពោលគឺមួយរយៈកន្លងមកប្រែប្រួលទៅតាមកាលៈទេសៈនយោបាយ។
ទាក់ទងទៅនឹងថ្ងៃ២០ឧសភានេះ និយាយពីទិដ្ឋភាពទូទៅ ភាគីខ្មែរដែលពាក់ព័ន្ធ ទទួលបានផលចំណេញទាំងអស់គ្នាក្នុងនោះមានជនរងគ្រោះ រដ្ឋាភិបាលនិងគណបក្សប្រជាជនកម្ពុជាដែលបានបង្ហាញពីស្នាដៃរបស់ខ្លួនដែលបានកំទេចខ្មែរក្រហមហើយ បានបន្សល់ទុកនូវថ្ងៃមួយ ឲ្យគេចងចាំក្នុងជីវិតជាប្រវត្តិសាស្ត្រ។
ចំណែកឯក្រុមគ្រួសារជនរងគ្រោះវិញ ខាងផ្លូវចិត្តភាគច្រើនពួកគេពិតជាមានការសុខចិត្តបើទោះណាជាសាច់ញាតិរបស់គេស្លាប់ទៅហើយក៏ដោយ ក៏ប៉ុន្តែពួកគេមានថ្ងៃមួយសម្រាប់ប្រាប់គ្នីគ្នាតកូនតចៅ ថាជីដូនជីតារបស់ពួកគេ បានស្លាប់នៅក្នុងសម័យប៉ុល ពត ហើយរបបហ្នឹងត្រូវគេនៅចងចាំតាមរយៈថ្ងៃមួយគឺ២០ឧសភានេះឯង។
មើលទៅលើជ្រុងម្ខាងទៀតនៃប្រទេសកម្ពុជា គណបក្សប្រឆាំងដែលកំពុងមានឥទ្ធិពលនយោបាយគួរសម នៅក្នុងប្រទេសកម្ពុជា ហាក់ដូចជាមិនបានចាប់អារម្មណ៍នឹងថ្ងៃ២០ឧសភានេះទេ ដោយសារតែថ្ងៃ២០ឧសភានេះ ជាការជួយបង្ហាញពីស្នាដៃរបស់រដ្ឋាភិបាលបច្ចុប្បន្ន។ក៏ប៉ុន្តែគណបក្សប្រឆាំងមានហេតុផលផ្សេងពីនេះ ដោយបានជ្រើសរើសយកថ្ងៃ១៧មេសាជាមួយនឹងការយល់ថាថ្ងៃ១៧មេសាគឺជាថ្ងៃដែលខ្មែរក្រហមឡើងកាន់អំណាច ហើយដោយសារតែថ្ងៃនោះហើយនាំឲ្យមានមនុស្សស្លាប់ និងយកថ្ងៃនោះរំលឹកវិញ្ញាណខន្តអ្នកស្លាប់តែម្តង។
ទោះយ៉ាងនេះក្តីថ្ងៃ១៧មេសាក៏ដោយ ថ្ងៃ២០ឧសភាក៏ដោយ អ្វីដែលសំខាន់គឺជាការរំលឹកអតីតកាលជូរចត់មួយ ហើយអតីតកាលជូរចត់នេះ គឺជាអំពើព្រៃផ្សៃ ដែលសាធារណៈមតិជាតិនិងអន្តរជាតិមិនអាចអត់ឱនឲ្យបាន និងចាំបាច់ត្រូវតែនាំអ្នកទទួលខុសត្រូវនៅក្នុងការសម្លាប់រង្គាលនេះមកកាត់ទោសនៅពេលនេះ។
សរុបមកវាគឺជាប្រវត្តិសាស្ត្រ បើទោះជាមានការរំលឹកវិញ្ញាណខន្តខុសថ្ងៃគ្នាក៏ដោយទាក់ទងទៅនឹងខ្មែរក្រហមក៏ប៉ុន្តែអ្នកទាំងពីរគឺរដ្ឋាភិបាលនិងបក្សប្រឆាំង ពិតជាស្ថិតនៅក្នុងគោលដៅចង់ឲ្យមានការចងចាំនូវ ឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិ ទារុណកម្មផ្សេងៗនិងការកាប់សម្លាប់ក្រៅច្បាប់ មកលើប្រជាជនខ្មែរគ្នាឯង។ ហើយចំណុចទាំងអស់នេះកំពុងស្ថិតនៅក្រោមការកាត់ទោស ដែលមានការជ្រោមជ្រែងពីអន្តរជាតិទូទាំងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ