មន្ត្រីច្រានចោលសំណើរបន្ថយនឹងលើកលែងទោសចំពោះអ្នកទោសគ្រឿងញៀន
គណៈកម្មាធិការជាតិសម្រាប់ពិនិត្យការលើកលែងទោសទណ្ឌិត នឹងជួបពិភាក្សាគ្នាម្ដងទៀតនៅរសៀលនេះ បន្ទាប់ពីការពិភាក្សានេះបានធ្វើម្ដងរួចមកហើយកាលពីម្សិលមិញ ដើម្បីពិនិត្យមើលសំណើរ បន្ធូរបន្ថយទោស និងលើកលែងទោសដល់អ្នកទោសចំនួន ៣៩១នាក់ក្នុងឱកាសពិធីបុណ្យចូលឆ្នាំខ្មែរនាពេលខាងមុខ។ ក្នុងនោះ អ្នកទោសគ្រឿងញៀន និងអ្នកទោសប្រព្រឹត្តបទល្មើសឧក្រិដ្ឋធំៗ មិនត្រូវបានលើកយកមកជជែក សម្រាប់ការលើកលែង និងបន្ថូរបន្ថយទោសទេ។ នេះជាការអះអាងរបស់លោក គឹម សន្តិភាព អ្នកនាំពាក្យក្រសួងយុត្តិធម៌។
ចុះផ្សាយនៅថ្ងៃ៖
ស្តាប់ - ០២:១៧
លោក គឹម សន្តិភាព អ្នកនាំពាក្យក្រសួងយុត្តិធម៌ បានគូសបញ្ជាក់ថា តាមរយៈកិច្ចពិភាក្សានៅថ្ងៃ ៣០ខែមីនាម្សិលមិញ គឺគ្មានអ្នកទោសគ្រឿងញៀនណាម្នាក់ស្ថិតនៅក្នុងចំណោមអ្នកទោសចំនួន ៣៩១នាក់ សម្រាប់សំណើរ បន្ធូរបន្ថយទោស និងលើកលែងទោសនោះទេ។ សូម្បីតែអ្នកទោសប្រព្រឹត្តបទឧក្រិដ្ឋធំៗក៏ត្រូវច្រានចោលដូចគ្នាដែរ។
លោកបន្ថែមថា គោលការណ៍ដែលមិនពិនិត្យសំណើរបន្ថូរបន្ថយនឹងលើកលែងទោសដល់អ្នកទោសគ្រឿងញៀន និងបទឧក្រិដ្ឋធំៗគឺផ្ដើមអនុវត្តចាប់តាំងពីឆ្នាំ ២០១៦មកម្ល៉េះ។ ហើយនៅឆ្នាំ ២០១៧ គោលការណ៍នេះនៅតែបន្តអនុវត្តដើម្បីឲ្យស្របជាមួយនឹងយុទ្ធនាការបង្ក្រាបញៀនរបស់រដ្ឋាភិបាល។
ទាក់ទងបញ្ហានេះកន្លងមកលោកនាយករដ្ឋមន្ត្រី ហ៊ុន សែន ស្នើឲ្យក្រសួងយុត្តិធម៌ ពិនិត្យឡើងវិញចំពោះសំណើរបន្ថូរបន្ថយ ឬលើកលែងទោសដល់ទណ្ឌិតណាដែលបានប្រព្រឹត្តបទល្មើសគ្រឿងញៀន និងករណីប្លន់ជាដើម ។ បើតាមលោកនាយករដ្ឋមន្ត្រីពួកគេអាចប្រព្រឹត្តបទល្មើសដដែលឡើងវិញនៅពេលចេញពីពន្ធនាគារ។
តាមរយៈកិច្ចពិភាក្សានៅថ្ងៃទី ៣០មីនាម្សិលមិញ គណកម្មាធិការជាតិរកឃើញទណ្ឌិតជាស្រ្តី ២៤នាក់ និងទណ្ឌិតចំនួន ៧០នាក់បានស្នើសុំលើកលែងទោសហើយ។ សម្រាប់ទណ្ឌិតជាង ៣០០នាក់ផ្សេងទៀតគឺកំពុងស្នើសុំបន្ធូរបន្ថយទោស។ លោក គឹម សន្តិភាព បានពន្យល់បន្ថែមថា ការលើកលែងនិងបន្ធូរបន្ថយទោសដល់ទណ្ឌិត គណកម្មាធិការជាតិពិនិត្យទៅលើទិដ្ឋភាពជាក់ស្ដែងនៃប្រភេទបទល្មើស ចរឹកនៃការប្រព្រឹត្តបទល្មើស និងព្យសនកម្មនៃបទល្មើស។
បន្ថែមពីលើនេះទៀត ទណ្ឌិតត្រូវមានសេចក្ដីសម្រេចស្ថាពររបស់តុលាការ ឬទណ្ឌិតទទួលបានការអប់រំកែប្រែនៅក្នុងពន្ធនាគារ។ ម្យ៉ាងទៀតប្រសិនបើទណ្ឌិតបានផ្លាស់ប្ដូរទៅជាមនុស្សល្អ និងបានជាប់ពន្ធនាគារចំនួន ២/៣ នៃចំនួនទោសរបស់ខ្លួនអ្នកទោសទាំងនោះអាចនឹងត្រូវបានពិចារណាដើម្បីបន្ធូរបន្ថយទោស ខណៈដែលអ្នកទោសដែលជាប់ពន្ធនាគារអស់រយៈពេល ២/៣នៃចំនួនទោសរបស់ខ្លួននោះពួកគេអាចត្រូវបានលើកលែងទោសបាន។
សូមបញ្ជាក់ថា ក្នុងមួយឆ្នាំមានការលើកលែងទោស និងបន្ធូរបន្ថយទោសលើទណ្ឌិតចំនួនបីដង នៅពេលមានពិធីបុណ្យធំៗ រួមមានបុណ្យចូលឆ្នាំខ្មែរ ច្រត់ព្រះនង្គ័ល និងព្រះរាជពិធីបុណ្យអុំទូក។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ