រដ្ឋាភិបាលកំណត់អត្តសញ្ញាណអ្នកកាត់តរូបព្រះមហាក្សត្រ
ក្រសួងមហាផ្ទៃបានបញ្ជាក់សាជាថ្មីថា អាជ្ញាធរស្គាល់មុខជន ដែលកាត់តព្រះសិរសាព្រះមហាក្សត្រដាក់លើមនុស្សផ្សេងក្នុងទ្រង់ទ្រាយអាសអាភាស ហើយពេលនេះអាជ្ញាធរសុំពេលធ្វើការទាំងជាមួយភាគីថៃ និងនៅក្នុងប្រទេស។ យ៉ាងណាក៏ដោយកិច្ចការងារនេះនឹងនៅតែក្តៅគគុក ព្រោះថារដ្ឋមន្ត្រីក្រសួងមហាផ្ទៃគឺជាអ្នកបញ្ជាផ្ទាល់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
លោកខៀវ សុភ័គ បានបញ្ជាក់ថា ការស៊ើបអង្កេតស្រាវជ្រាវរកអ្នកដែលកាត់តព្រះសិរសាព្រះមហាក្សត្រហើយ បានឈានដល់ការកំណត់មុខសញ្ញា ប៉ុន្តែអាជ្ញាធរត្រូវការពេលវេលា ដើម្បីឈានដល់ការចាប់ខ្លួនជនអ្នកដែលពាក់ព័ន្ធ។ អ្នកនាំពាក្យបានគូសបញ្ជាក់ថា ប្រតិបត្តិការនេះគឺជាបទបញ្ជាលោក ស ខេង រដ្ឋមន្ត្រីក្រសួងមហាផ្ទៃផ្ទាល់ ដែលត្រូវតែឈានដល់ការឃាត់ខ្លួនអ្នក ដែលប្រមាថដល់ព្រះមហាក្សត្រ។ អ្នកដែលជាប់ពាក់ព័ន្ធនោះត្រូវបានគេដឹងថាមានគ្នាចំនួន ៣រូបនៅកម្ពុជា ហើយក្នុងនោះក៏មានដែរជនជាតិថៃ ដែលកាលពីថ្ងៃទី ២៥ធ្នូ កន្លងទៅ បានប្រើបច្ចេកវិទ្យាកាត់តព្រះសិរសាព្រះមហាក្សត្រដាក់លើខ្លួនមនុស្សស្រាត ហើយបង្ហោះចូលក្នុងបណ្តាញសង្គមហ្វេសប៊ុក។ ភ្លាមៗក្រសួងមហាផ្ទៃ បានប្រកាសស្រាវជ្រាវវែកមុខរកអ្នកដែលបង្ហោះនិងអ្នកដែលពាក់ព័ន្ធ។ រដ្ឋាភិបាលបានបញ្ជាក់ថា ការប្រមាថព្រះមហាក្សត្រ គឺជាការប្រមាថដល់ឪពុកម្តាយរបស់ជនជាតិកម្ពុជាយ៉ាងដូច្នោះដែរ។
គួរបញ្ជាក់ថា រដ្ឋធម្មនុញ្ញកម្ពុជា ដែលជាច្បាប់កំពូលរបស់រដ្ឋ បានការពារព្រះមហាក្សត្រដែលមិនអាចនរណាប៉ះពាល់ព្រះអង្គបានឡើយ។ ចំពោះករណីនៃការកាត់តរូបភាពនេះ ក្រសួងមហាផ្ទៃបានបញ្ជាក់ថា បានស្នើឱ្យសារធារណៈមតិត្រូវអត់ធ្មត់ និងទុកចិត្តអាជ្ញាធរក្នុងការស្រាវជ្រាវ ហើយឈានដល់ការចាប់ខ្លួនតែម្តង។ ហើយថាអាជ្ញាធរមិនទាន់បង្ហាញអត្តសញ្ញាណអ្នកដែលពាក់ព័ន្ធនោះទេ ព្រោះខ្លាចការរត់គេចខ្លួន។
យ៉ាងណាក៏ដោយ អ្នកតាមដានសង្គមបានគាំទ្រចំពោះការចាត់វិធានការរបស់អាជ្ញាធរ ក្នុងករណីដែលមានអ្នកប្រមាថដល់ព្រះមហាក្សត្រ ដែលជានិមិត្តរូបនៃប្រទេស។ ប៉ុន្តែក៏បានស្នើឱ្យអាជ្ញាធរក៏ត្រូវធ្វើការដោយតម្លាភាព ហើយមិនត្រូវយកលេះនេះទៅទម្លាក់លើជនដែលមិនមានកំហុសនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ