កម្ពុជាត្រូវការពេល៤ឆ្នាំ ដើម្បីរៀបឯកសារប្រាសាទកោះកេរ ទៅក្នុងសម្បត្តិបេតិកភ័ណ្ឌពិភពលោក
ក្រសួងវប្បធម៌ បាននិងកំពុងរៀបចំឯកសារស្នើសុំដាក់ប្រាសាទកោះកេរ ទៅក្នុងសម្បត្តិបេតិកភ័ណ្ឌពិភពលោក ខណៈក្រសួងវប្បធម៌ លើកឡើងថា ការងារនេះត្រូវចំណាយពេលរហូតដល់ទៅ៤ឆ្នាំ។ ការប៉ុនប៉ងរបស់កម្ពុជា ដើម្បីបញ្ចូលសម្បត្តិវប្បធម៌ថ្មីរបស់ខ្លួន ទៅជាសម្បត្តិបេតិកភណ្ឌពិភពលោកពេលនេះ គឺធ្វើឡើងបន្ទាប់ពីអង្គការ UNESCO ទទួលស្គាល់ប្រាសាទសំបូរព្រៃគុក កាលពីឆ្នាំទៅជាសម្បត្តិបេតិកភណ្ឌពិភពលោក។
ចុះផ្សាយនៅថ្ងៃ៖
ស្តាប់ - ០២:០៨
បន្ទាប់ពីកិច្ចប្រជុំបច្ចេកទេសលើកទី៤ នាខេត្តសៀមរាបស្តីពី គណៈកម្មាធិការសម្របសម្រួលអន្តរជាតិសម្រាប់ការអភិរក្ស និងលើកតម្លៃប្រាសាទព្រះវិហារ កាលពីល្ងាចថ្ងៃទី២០ខែកញ្ញា ម្សិលមិញ រដ្ឋមន្ត្រីក្រសួងវប្បធម៌ លោកស្រី ភឿង សកុណា បានថ្លែងប្រាប់អ្នកកាសែតថា ប្រាសាទកោះកេរ ជាប្រាសាទបុរាណខ្មែរមួយដ៍អស្ចារ្យ ដែលអ្នកជំនាញក្រសួងវប្បធម៌ បាននិងកំពុងរៀបចំឯកសារស្នើសុំដាក់បញ្ជូលជាសម្បត្តិបេតិកភណ្ឌពិភពលោក ក្នុងបញ្ជីរបស់អង្គការ UNESCO បន្ទាប់ពីប្រាសាទសំបូរព្រៃគុក។
លោកស្រីរដ្ឋមន្ត្រី បញ្ជាក់ថាការរៀបចំឯកសារ ដាក់ទៅកាន់អង្គការពិភពលោកខាងសម្បត្តិបេតិកភណ្ឌនេះ កម្ពុជាអាចនឹងប្រឈមនូវការលំបាកច្រើន ដោយសារលក្ខខណ្ឌអង្គការ UNESCO មានលក្ខណៈតឹងតែង និងទាមទារពេលវេលាយូរ រហូតដល់ទៅ៤ឆ្នាំឯណោះ។ ទោះយ៉ាងណា អាជ្ញាធរព្រះវិហារ អ្នកជំនាញទាំងថ្នាក់ជាតិ និងថ្នាក់អន្តរជាតិ កំពុងតែធ្វើការនិងរៀបចំនូវឯកសារពាក់ព័ន្ធនឹងប្រាសាទកោះកេរនេះ ដោយមានការវិវត្តន៍ទៅមុខបន្តិចហើយ។
យោងតាមឯកសារប្រវត្តិសាស្ត្រ ប្រាសាទកោះកេរ ដែលមាន៧ជាន់ កំពស់៣៥ម៉ែត្រ ស្ថិតក្នុងខេត្តព្រះវិហារ គឺអតីតរាជធានីរបស់អាណាចក្រខ្មែរ កសាងឡើងក្នុងរជ្ជកាលព្រះបាទជ័យវរ្ម័នទី៤(៩២៨-៩៤២) គឺដើម្បីឧទ្ទិសថ្វាយដល់ព្រះឥសូរ តាមបែបព្រហ្មញ្ញសាសនា។ ប្រាសាទកោះកេរ ពីមុនមានឈ្មោះថា ឆកគគីរ ដែលមានផ្ទៃដីប្រមាណ២៥៦គីឡូម៉ែត្រការ៉េ ដោយរួមមានប្រសាទចំនួន៩៨ សង់ដាច់ៗពីគ្នា ចន្លោះពី៣ ឬ៤គីឡូម៉ែត្រ នៅក្នុងតំបន់នោះ។
សូមបញ្ជាក់ថា ការដាក់ប្រាសាទកោះកេរ ទៅក្នុងសម្បត្តិបេតិកភណ្ឌពិភពលោក នៅពេលនេះ គឺជាការបន្ថែមសម្បត្តិវប្បធម៌របស់ខ្មែរថ្មីមួយទៀត ទៅក្នុងអង្គការវប្បធម៌កំពូលនេះ បន្ទាប់ពីអង្គការ UNESCO បានទទួលស្គាល់រួចមកហើយ នូវប្រាសាទអង្គរវត្ត ប្រាសាទព្រះវិហារប្រាសាទសំបូរព្រៃគុក រួមនឹងសម្បត្តិបេតិកភណ្ឌវប្បធម៌អរូបិយសម្រាប់មនុស្សជាតិមួយចំនួនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ