រដ្ឋាភិបាលកម្ពុជារំលឹកខួប៤ឆ្នាំ នៃព្រឹត្តិការណ៍រត់ជាន់គ្នាស្លាប់ នៅស្ពានកោះពេជ្រ
រាជរដ្ឋាភិបាលកម្ពុជា តាមរយៈសាលារាជធានីភ្នំពេញ នៅថ្ងៃសៅរិ៍ទី២២វិច្ឆិការនេះ បានរៀបចំប្រារព្ធខួប៤ឆ្នាំនៃការស្លាប់បាត់បង់ជីវិតរបស់ប្រជាពលរដ្ឋខ្មែរ នៅក្នុងព្រឹត្តិការណ៍រត់ជាន់គ្នា នៅស្ពានកោះពេជ្រ កាលពីឆ្នាំ២០១០។ រយៈពេល៤ឆ្នាំហើយ ព្រឹត្តិការណ៍ដ៍រន្ធត់និងមិនគួរអោយជឿមួយនេះ នៅតែស្ថិតនៅក្នុងការចងចាំរបស់ប្រជាពលរដ្ឋខ្មែរ និងអ្នកនយោបាយ។
ចុះផ្សាយនៅថ្ងៃ៖
ស្តាប់ - ០១:៥០
ពិធីបុណ្យបង្សុកូលឧទ្ទិសកុសលដល់វិញ្ញាណក្ខន្ធ ជនរងគ្រោះ នៅក្នុងឧបទ្ទេវហេតុរត់ជាន់គ្នាស្លាប់នៅលើស្ពានពេជ្រគម្រប់ខួប៤ឆ្នាំនេះ បានរៀបចំធ្វើឡើងនៅព្រឹកថ្ងៃសៅរិ៍នេះ នៅចំពោះមុខស្តូបជនរងគ្រោះ ដែលស្ថិតនៅក្បែស្ពានពេជ្រ ដែលត្រូវបានគេវាយកម្ទេចចោលទៅហើយនោះ។ ស្ពានពេជ្រដែលបានឆក់យកជីវិតមនុស្ស ៣៥៣នាក់ និងរបួស៣៩៦នាក់ នៅក្នុងព្រឹត្តិការណ៍រត់ជាន់គ្នាតែមួយយប់ នៅថ្ងៃចុងក្រោយនៃពិធីបុណ្យអុំទូក កាលពីថ្ងៃទី២២វិច្ឆិកាឆ្នាំ២០១0។
លោក ប៉ា សុជាតិវង្ស អភិបាលរាជធានីភ្នំពេញ ដែលបានធ្វើជាអធិបតីនៅក្នុងពិធីនេះ
ព្រមទាំងមន្ត្រីរាជការ សាលារាជធានីភ្នំពេញ នឹងបងប្អូនសាច់ញាតិរបស់ក្រុមគ្រួសារនៃជនរងគ្រោះសរុបជាង៤០០នាក់ បានធ្វើពិធីរាប់បាត្រព្រះសង្ឃចំនួន ១០៨ អង្គ ដើម្បីឧទ្ទិសកុសលជូនដល់ជនរងគ្រោះ ដែលបានបាត់បង់ជីវិតនៅក្នុងព្រឹត្តិការណ៍កាលពី៤ឆ្នាំមុន។
កាលពីថ្ងៃទី២១វិច្ឆិកាម្សិលមិញនេះ គណបក្សសង្គ្រោះជាតិ ក៏បានរៀបចំប្រារព្ធពិធីនេះ នៅមុខស្តូបរបស់ជនរងគ្រោះផងដែរ។ លោក សម រង្ស៊ី ប្រធានគណបក្សសង្គ្រោះជាតិ ដែលទើបវិលត្រលប់មកពីប្រទេសបារាំងបានចូលរួមនៅក្នុងពិធីនេះកាលពីថ្ងៃម្សិលមិញ បានថ្លែងរិះគន់ចំពោះចំណាត់ការរបស់រដ្ឋាភិបាលថា មិនបានទទួលខុសត្រូវចំពោះការស្លាប់បាត់បង់ជីវិតមនុស្សរាប់រយនាក់នេះទេ។ ប៉ុន្តែរដ្ឋាភិបាលបានប្រើប្រាស់ទឹកប្រាក់ ដើម្បីលុបបំបាត់និទណ្ឌភាពនិងការទទួលខុសត្រូវនេះទៅវិញ។
ប៉ុន្តែលោក ប៉ា សុជាតិវង្ស អភិបាលរាជធានីភ្នំពេញ បានថ្លែងនៅពេលប្រារព្ធពិធីនៅថ្ងៃសៅរ៍នេះ ដោយបានចាត់ទុកសកម្មភាពរបស់គណបក្សសង្គ្រោះជាតិដែលបានប្រារព្ធពិធីបុណ្យឧទ្ទិសកុសលដល់វិញ្ញាណក្ខន្ធអ្នកស្លាប់ជាន់គ្នាលើស្ពានកោះពេជ្រ មុនថ្ងៃកំណត់នោះថា ជាការកេងចំណេញនយោបាយ។
យ៉ាងណាក៏ដោយ រយៈពេល៤ឆ្នាំមកនេះ អាថ៌កំបាំងនៅពីក្រោយព្រឹត្តិការណ៍នេះនៅតែកើតមាន ខណៈជនរងគ្រោះដែលរួចពីស្លាប់ នៅតែបន្តភិតភ័យ និងមានចំងល់ថា ជាព្រឹត្តិការណ៍មិនគួរអោយជឿ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ