សត្វដំរីនៅតំបន់ជួរភ្នំក្រវាញ មានការកើនឡើងបើប្រៀបធៀបនឹង១០ឆ្នាំមុន
សត្វដំរីនៅតំបន់ជួរភ្នំក្រវាញ មានការកើនឡើងបើប្រៀបធៀបនឹង១០ឆ្នាំមុន។ នេះគឺជាការលើកឡើងរបស់អង្កការសម្ព័ន្ធមិត្តសត្វព្រៃ (Wildlife Alliance) នៅក្នុងសន្និសិទសារព័ត៌មានមួយ ស្តីពី ការអបអរសមិទ្ធផលរបស់ខ្លួន ដែលសម្រេចបាន ដោយធ្វើឱ្យការបរបាញ់សត្វដំរី អាស៊ីក្នុងតំបន់ព្រៃឈើជួរភ្នំក្រវាញ ក្នុងរយៈពេលមួយទស្សវត្សរ៍ចុងក្រោយនេះ មានចំនួនសូន្យ។ អត្តបទដោយ ប៉ុន សោភ័ណ៖
ចុះផ្សាយនៅថ្ងៃ៖
ស្តាប់ - ០២:១១
ស្របពេលនឹងទិវាសត្វដំរីពិភពលោកថ្ងៃទី ១២ សីហា ឆ្នាំនេះ អង្កការសម្ព័ន្ធមិត្តសត្វព្រៃនៅកម្ពុជា (Wildlife Alliance) នឹងប្រារព្ធពិធីអបអរសមិទ្ធិផល ដែលខ្លួនសម្រេចបាន ដោយធ្វើឱ្យគ្មានការបរបាញ់ សត្វដំរីនៅអាស៊ី នៅក្នុងតំបន់ជួរភ្នំក្រវាញ។ នៅក្នុងនោះ អង្កការសម្ព័ន្ធមិត្តសត្វព្រៃ ក៏បានបញ្ជាក់ដោយស្រង់សិ្ថតិពីការចុះសិក្សាស្រាវជ្រាវរបស់ អង្កការរុក្ខជាតិ និងសត្វអន្តរជាតិ (FFI) ថាចំនួនសត្វដំរី នៅតំបន់ជួរភ្នំក្រវាញមានចំនួនចន្លោះពី ១៧០ក្បាល ទៅ ២០០ ក្បាល និងចន្លោះពី ២០០ក្បាល ទៅ៣០០ក្បាល ផ្សេងទៀត រស់នៅតំបន់ទេសភាពខ្ពង់រាបភាគខាងកើតប្រទេសកម្ពុជា។ យ៉ាងណាក៏ដោយ អង្កការសម្ព័ន្ធមិត្តសត្វព្រៃបានបញ្ជាក់ថា នេះគ្រាន់តែជាតួលេខបឋមប៉ុណ្ណោះ មិនទាន់មានការសិក្សាច្បាស់លាស់ណាមួយ ពីចំនួនសត្វដំរី ដែលរស់នៅប្រទេសកម្ពុជានៅឡើយទេ។
កាលពីដើមឆ្នាំ ២០០០ ព្រៃឈើជួរភ្នំក្រវាញ គឺជាទីប្រមាញ់សត្វដំរី និងខ្លាធំដ៏ក្តៅគគុក។ ដែលនៅចន្លោះពី ឆ្នាំ២០០២ ដល់ឆ្នាំ២០០៦ មានសត្វដំរីអាស៊ីចំនួន៣៧ក្បាល និងសត្វខ្លាធំ ២៩ក្បាលត្រូវបានគេសម្លាប់។ ឆ្លើយតបទៅនឹងវិបត្តិនៃការបរបាញ់នេះ អង្កការសម្ព័ន្ធមិត្តសត្វព្រៃ (Wildlife Alliance)បានចុះល្បាត និងពង្រឹងការអនុវត្តន៍ ចាប់តាំងឆ្នាំ២០០៦រហូតមកដល់ពេលនេះ ដោយបានសហការណ៍ជារដ្ឋបាលព្រៃឈើ ក្រសួងបរិស្ថាន ព្រមទាំងភាគីពាក់ព័ន្ធបានចាប់អន្ទាក់ចំនួនជាង១៤ម៉ឺន អន្ទាក់ ព្រមទាំងចាប់បានជនល្មើសជាង៣០០នាក់បញ្ជូនទៅតុលាការផងដែរ។
នាយិកាប្រតិបត្តិការអង្កការសម្ព័ន្តមិត្តសត្វព្រៃ កញ្ញា Sowanna Gauntlett បានគូសបញ្ជាក់ថា គោលដៅ ដែលបានកំណត់រហូតដល់ទទួលបានជោគជ័យ នៃសមិទ្ធិផលក្នុងរយៈពេលមួយទសវត្សរ៍ចុងក្រោយនេះ បានឆ្លុះបញ្ចាំងថា ការវិនិយោគ លើការពង្រឹង ការអនុវត្តន៍ច្បាប់ គឺជាវិធីដ៏ប្រសើរបំផុតក្នុងការសម្រេចបាននូវលទ្ធផលការងារអភិរក្ស។ ក៏ប៉ុន្តែដើម្បីបន្តជោគជ័យនេះ ឧទ្យានុរក្សត្រូវតែបង្កើនការចុះល្បាតបន្ថែមទៀត ហើយត្រូវតែពង្រឹងច្បាប់ ដែលហាមឃាត់ការបរបាញ់ប្រភេទសត្វ ដែលត្រូវអភិរក្ស និងច្បាប់ដែលទប់ស្កាត់ការដាក់អន្ទាក់ផងដែរ។
សូមបញ្ជាក់ថា អង្កការសម្ព័ន្ធមិត្តសត្វព្រៃ (Wildlife Alliance) ដែលធ្វើការអភិរក្សព្រៃឈើ និងសត្វព្រៃនៅកម្ពុជាបានឱ្យដឹងថា នាបណ្តាឆ្នាំកន្លងទៅ អង្កការបានដាក់ម៉ាស៊ីនថតស្វ័យប្រវត្តិបានចំនួន ១១ ម៉ាស៊ីន នៅជុំវិញតំបន់ជីផាត ក្នុងតំបន់ទេសភាពព្រៃឈើជួរភ្នំក្រវាញ ដើម្បីស្វែងយល់អំពីចលនាបន្លាស់ទី និងរចនាសម្ព័ន សង្គមរបស់ក្រុមសត្វដំរី។
ឧទ្យានជាតិជួរភ្នំក្រវាញខាងត្បូង ជាឧទ្យានជាតិ ដែលទើបត្រូវបានបង្កើតថ្មី មានទំហំ ៤១ម៉ឺនហិចតា ស្ថិតនៅចំកណ្តាលជម្រកដំរីតែម្តង និងជួយថែរក្សាដែនជម្រកនេះ សម្រាប់ជាតំបន់ទេសភាពសត្វដំរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ