ព្រះមហាក្សត្រជូនព្រះរាជដំណាក់សម្តេចឳដល់មន្ទីរពេទ្យគន្ធបុប្ផាដើម្បីជួយសម្រាលដល់បញ្ហាថវិកា
ព្រះមហាក្សត្រប្រទេសកម្ពុជាព្រះបាទនរោត្តម សីហមុនី បានសម្រេចកាលពីចុងសប្តាហ៍មុនជូនព្រះរាជដំណាក់សម្តេចឳនៅខេត្តកោះកុង ដល់មន្ទីរពេទ្យគន្ធបុប្ផា។ ការសម្រេចព្រះទ័យរបស់ព្រះមហាក្សត្រខ្មែរនៅពេលនេះ បានធ្វើឡើងបន្ទាប់ពី ព្រះអង្គសម្តែងព្រះទ័យព្រួយបារម្ភខ្លាំងពីស្ថានភាពហិរញ្ញវត្ថុរបស់មន្ទីរពេទ្យដ៏សប្បុរសមួយនេះ ដែលប្រឈមនឹងការខ្វះខាត។
ចុះផ្សាយនៅថ្ងៃ៖ កែប្រែថ្ងៃទី៖
ព្រះករុណាព្រះបាទសម្តេចព្រះនរោត្តម សីហមុនី ព្រះមហាក្សត្រនៃប្រទេសកម្ពុជា បានសព្វព្រះរាជហឬទ័យកាលពីថ្ងៃសៅរ៍សប្តាហ៍មុន សម្រេចជូនព្រះរាជដំណាក់ ដែលជាព្រះរាជទ្រព្យផ្ទាល់របស់ព្រះបិតាព្រះអង្គ គឺសម្តេចឪនរោត្តម សីហនុ នៅខេត្តកោះកុងនាសម័យសង្គមរាស្ត្រនិយមទសវត្សឆ្នាំ៦០ជូនមន្ទីរពេទ្យគន្ធបុប្ផា។
នៅក្នុងព្រះរាជសារលិខិតរបស់ព្រះមហាក្សត្រចុះថ្ងៃទី ១៧តុលា ឆ្នាំ២០១៥នេះ ជាភាសាបារាំងផ្ញើរជូនលោកសាស្ត្រាចារ្យវេជ្ជបណ្ឌិត Beat RICHNER ព្រះអង្គសម្តែងនូវព្រះទ័យព្រួយបារម្ភយ៉ាងខ្លាំង ដោយសម្គាល់ឃើញថាសមិទ្ធិផលដ៏អស្ចារ្យរបស់លោកនាយកមន្ទីរពេទ្យ ទាំងនៅភ្នំពេញ និងនៅខេត្តសៀមរាប កំពុងប្រឈមមុខនឹងការលំបាកផ្នែកហិរញ្ញវត្ថុ។
ដោយមានការកោតសរសើរ និងគាំទ្រនូវស្នាដៃរបស់លោកនាយកមន្ទីរពេទ្យគន្ធបុប្ផា ព្រះរាជសារលិខិតព្រះមហាក្សត្របន្ថែមថា ព្រះអង្គមានក្តីសង្ឃឹមថាព្រះរាជអំណោយនេះនឹងជួយរំលែកនិងដោះស្រាយការលំបាកផ្នែកហិរញ្ញវត្ថុ និងបំរើផលប្រយោជន៍ជូនកុមារទីទ័លក្រ។
សូមបញ្ជាក់ថាមន្ទីរពេទ្យគន្ធបុប្ផាចំនួន៥ដែលត្រូវបានបង្កើតឡើងជាបន្តបន្ទាប់ចាប់តាំងពីដើមទសវត្សកាលពីឆ្នាំ៩០មក ពេលនេះកំពុងតែមានបញ្ហាហិរញ្ញវត្ថុខ្លាំង បើទោះណាជាមាន សប្បុរសជនជាតិ មូលនិធិ និងសហគ្រាសបរទេសមួយចំនួននៅបន្តជួយឧបត្ថម្ភជារៀងរាល់ឆ្នាំយ៉ាងណាក៏ដោយ។
តាមការឲ្យដឹងពីលោកវេជ្ជបណ្ឌិត Beat RECHNER ប្រធានមន្ទីរពេទ្យគន្ធបុប្ផា នៅឆ្នាំ២០១៥នេះមន្ទីរពេទ្យគន្ធបុផ្ផាទាំងអស់ ត្រូវការចំណាយថវិកាចំនួន៤៣,៥លានដុល្លារ។រីឯប្រភពថវិកាវិញនោះគឺបានមកពីកញ្ចប់ជំនួយរបស់រដ្ឋាភិបាលកម្ពុជាដែលបានកើនឡើងជាង៥លានដុល្លារក្នុងមួយឆ្នាំ បានមកពីរដ្ឋាភិបាលស្វីស និងសប្បុរសជនទាំងក្នុងនិងក្រៅប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ