អង្គការក្រៅរដ្ឋាភិបាលចង់ឲ្យ គជប រៀបចំចុះឈ្មោះពលករចំណាកស្រុកនៅក្រៅប្រទេស
នៅថ្ងៃនេះ ក្រុមអង្គការក្រៅរដ្ឋាភិបាល ដែលបានជជែកគ្នាពីសេចក្តីព្រាងនីតិវិធីសម្រាប់ការធ្វើបច្ចុប្បន្នភាពបញ្ជីបោះឆ្នោត បានស្នើឲ្យ គ.ជ.ប ពិចារណាក្នុងការរៀបចំឲ្យពលករចំណាកស្រុកនៅក្រៅប្រទេសបានចូលរួមក្នុងការចុះឈ្មោះបោះឆ្នោត ដែលគ្រោងរៀបចំធ្វើនៅថ្ងៃទី១ ខែកញ្ញា ដល់ថ្ងៃទី៩ ខែវិច្ឆកា។
ចុះផ្សាយនៅថ្ងៃ៖
ស្តាប់ - ០២:២៤
លោកមឿន តុលា នាយកប្រតិបត្តិនៃមជ្ឈមណ្ឌលសម្ព័ន្ធការងារ និងសិទ្ធិមនុស្សបានថ្លែងថាដើម្បីធានាសិទ្ធិពលករចំណាកស្រុកទៅធ្វើការនៅក្រៅប្រទេសអាចបោះឆ្នោតបាន គឺមានតែការបង្កើតការិយាល័យចុះឈ្មោះបោះឆ្នោត និងបោះឆ្នោតនៅតាមស្ថានទូត ឬស្ថានអគ្គកុងស៊ុលនៅក្នុងប្រទេសនោះ។ លោកបន្ថែមថា គជប ក៏អាចបង្កើតការិយាល័យចុះឈ្មោះ និងបោះឆ្នោតនៅតាមបណ្តោយព្រំដែនសម្រាប់ពលករ ដែលធ្វើការនៅក្នុងប្រទេសថៃ។
ក្នុងឱកាសនៃការជជែកគ្នាពីសេចក្តីព្រាងបទបញ្ជា និងនីតិវិធី សម្រាប់ការធ្វើបច្ចុប្បន្នភាពបញ្ជីបោះឆ្នោត និងចុះឈ្មោះបោះឆ្នោត ឆ្នាំ២០១៧ នៅថ្ងៃទី១៩ ខែកក្កដា លោកតុលាបន្ថែមថាកន្លងមករដ្ឋាភិបាលថៃក៏ធ្លាប់បើកឱកាសឲ្យពលករខ្មែរបានចុះឈ្មោះបោះឆ្នោត និងបោះឆ្នោតដែរ ប៉ុន្តែរដ្ឋាភិបាលកម្ពុជាមិនបានធ្វើសំណើជាផ្លូវការទៅរដ្ឋាភិបាលថៃ។
ក្នុងពេលរៀបចំបញ្ជីបោះឆ្នោតថ្មីកាលពីឆ្នាំ២០១៦កន្លងទៅ ក្រុមអង្គការក្រៅរដ្ឋាភិបាលក៏ធ្លាប់បានលើកឡើងពីសំណើខាងលើនេះដែរ។ នេះគឺជាលើកទី២ហើយ ដែលក្រុមអង្គការសង្គមស៊ីវិលបានស្នើឲ្យ គ.ជ.ប រៀបចំចុះឈ្មោះបោះឆ្នោតពលករចំណាកស្រុកនៅក្រៅប្រទេស ក្នុងឱកាសធ្វើបច្ចុប្បន្នភាពបញ្ចីឈ្មោះបោះឆ្នោត សម្រាប់ការបោះឆ្នោតជ្រើសតាំងតំណាងរាស្ត្រឆ្នាំ២០១៨ខាងមុខនេះ។
លោក វ៉ន ពៅ ប្រធានសមាគមសេដ្ឋកិច្ចក្រៅប្រព័ន្ឋឲ្យដឹងថាពលករខ្មែរ ដែលធ្វើការនៅក្នុងប្រទេសម៉ាឡេស៊ីក៏បានទាមទារឲ្យមានការរៀបចំការិយាល័យចុះឈ្មោះ និងបោះឆ្នោតនៅក្នុងប្រទេសម៉ាឡេស៊ីដែរ។ លោកស្នើឲ្យគជប ទទួលយកសំណើនេះទៅពិចារណា។
លោកឌី ភីរុន អនុប្រធានលេខាធិការដ្ឋាននៃអគ្គលេខាធិការដ្ឋាន គជប ថា សំណើរបស់អង្គការក្រៅរដ្ឋាភិបាលគឺទាក់ទងនឹងផ្លូវច្បាប់របស់គជប ដែលមិនមានចែងចំពោះបញ្ហាខាងលើនេះទេ។ លោកថា ទាល់តែមានការធ្វើវិសោធនកម្មច្បាប់បោះឆ្នោតទើបអាចអនុវត្តអនុសាសន៍របស់សង្គមស៊ីវិលបាន ប៉ុន្តែលោកនឹងទទួលយកសំណើនេះទៅពិភាក្សា។
លោកសុន ឆ័យ មន្ត្រីជាន់ខ្ពស់គណបក្សប្រឆាំង បញ្ជាក់ថាបើការងារមួយចំនួនពាក់ព័ន្ធនឹងច្បាប់ ដែលតម្រូវឲ្យមានការកែមាត្រាណាមួយនោះ គជប អាចបញ្ជាក់ប្រាប់មកតំណាងរាស្ត្រ ដើម្បីស្នើឲ្យមានការកែប្រែច្បាប់នោះភ្លាម។ លោកថា គជប គួរតែស្នើថវិកាដើម្បីរៀបចំការិយាល័យចុះឈ្មោះ និងបោះឆ្នោតនៅតាមប្រទេសដែលមានពលករខ្មែរកំពុងធ្វើការនៅទីនោះ។
បើតាមលោកមឿន តុលា នាយកប្រតិបត្តិនៃមជ្ឈមណ្ឌលសម្ព័ន្ធការងារ និងសិទ្ធិមនុស្ស បច្ចុប្បន្នមានពលករ ខ្មែរ ដែលធ្វើការនៅប្រទេសថៃប្រមាណ១លាននាក់ ម៉ាឡេស៊ីប្រមាណ១០ម៉ឺននាក់ និងកូរ៉េខាងត្បូងប្រមាណ៥ម៉ឺននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ