ពលរដ្ឋមានទំនាស់ដីធ្លីរ៉ាំរ៉ៃជិត១០០នាក់ ឆ្លងខេត្តកោះកុងមករងចាំដំណោះស្រាយក្នុងវត្តសាមគ្តីរង្ស៊ី ក្រុងភ្នំពេញ
តំណាងប្រជាពលរដ្ឋដែលមានទំនាស់ដីធ្លីជាងដប់ឆ្នាំមកហើយ ជាមួយនឹងក្រុមហ៊ុនស្ករអំពៅ ខេត្តកោះកុង ប្រមាណ ៨០នាក់ កំពុងរងចាំដំណោះស្រាយយ៉ាងអន្ទះសារនៅក្នុងវត្តមួយ ឯរាជធានីភ្នំពេញ បន្ទាប់ពីដំណើរឆ្លងខេត្ត ដើម្បីមកដាក់ញត្តិសុំអន្តរាគមន៍ពីក្រសួងពាក់ព័ន្ធកាលពីសប្តាហ៍មុន។ តំណាងពលរដ្ឋដែលបានឡើងមកតវ៉ាបានបញ្ជាក់ថា ប្រសិនបើនៅតែមិនមានដំណោះស្រាយ ពលរដ្ឋមកខេត្តកោះកុងទាំងនោះ នឹងនាំគ្នាហែញត្តិទៅដល់ផ្ទះលោកនាយករដ្ឋមន្រ្តី តែម្តង។ ញត្តិដែលមានខ្លឹមសារ សុំទាមទារកាត់ដី ៧៨២.១៦ ហិកតា ពីក្រុមហ៊ុន Koh Kong Sugar និង Koh Kong Plantation មកជូនពលរដ្ឋ ១៤៧គ្រួសារវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៤
ទំនាស់ដីធ្លីដ៏រ៉ាំរ៉ៃអូសបន្លាយជាងដប់ឆ្នាំមកហើយ រវាងពលរដ្ឋរស់នៅស្រុកស្រែអំបិល ជាមួយនឹងក្រុមហ៊ុនស្ករអំពៅ នៅខេត្តកោះកុង ហាក់មិនទាន់រកឃើញដំណោះស្រាយឆាប់ៗឡើយ បើទោះបីជាតំណាងពលរដ្ឋមានទំនាស់ដីជាងមួយរយគ្រួសារ បានឆ្លងខេត្ត មកស្នាក់នៅក្នុងវត្ត ដើម្បីដាក់ញត្តិសុំអន្តរគមន៍ពីស្ថាប័នពាក់ព័ន្ធ នៅរាជធានីភ្នំពេញ ហើយរងចាំដំណោះស្រាយតាំងពីសប្តាហ៍មុន។
អ្នកស្រី យី គន្ធា តំណាងប្រជាពលរដ្ឋ ភូមិព្រែកជីក ឃុំជីខក្រោម ស្រុកស្រែអំបិល បានបញ្ជាក់ថា ពលរដ្ឋប្រមាណ ៨០នាក់ ដែលរងគ្រោះបាត់បង់ដីស្រែចំការផ្ទះសម្បែងដូចគ្នា កំពុងស្នាក់នៅហាលភ្លៀង ត្រូវមូសខាំ និងខ្វះខាតការហូបចុក ក្នុងវត្តសាមគ្គីរង្ស៊ី បន្ទាប់ពីពួកគាត់ បានឡើងមកដាក់ញត្តិស្នើសុំអន្តរាគមន៍ពី ក្រសួងដែនដី នគរូបនីយកម្ម និងសំណង់ សហភាពអឺរ៉ុប រដ្ឋសភា និងក្រសួងកសិកម្ម តាំងពីថ្ងៃទី៤ សីហា។ អ្នកស្រីបន្ថែមថា ញត្តិតំណាងអោយពលរដ្ឋ ១៤៧ គ្រួសារ ក្នុងស្រុកស្រែអំបិល គឺការទាមទារកាត់ដី ៧៨២.១៦ ហិកតា ពីក្រុមហ៊ុន Koh Kong Sugar និងKoh Kong Plantation ជូនពលរដ្ឋវិញ។ បើតាមអ្នកស្រី យី គន្ធា ប្រសិនបើគ្មានដំណោះស្រាយ ពលរដ្ឋរងគ្រោះទាំងអស់ នឹងហែញតិ្ត ទៅកាន់ផ្ទះលោកនាយករដ្ឋមន្រ្តី និងទីស្តីការគណៈរដ្ឋមន្រ្តីក្នុងពេលឆាប់ៗ។
អ្នកនាំពាក្យ ក្រសួងរៀបចំដែនដី នគររូបនីយកម្ម និងសំណង់ លោក ជាម សុផលមករា បានបញ្ជាក់ប្រាប់វិទ្យុបារាំងអន្តរជាតិ នៅថ្ងៃអង្គារនេះថា ក្រសួងបានទទួលញត្តិនោះហើយកាលពីសប្តាហ៍មុន ព្រមទាំងបានផ្តោះប្តូរលេខទំនាក់ទំនងគ្នាជាមួយនឹងពលរដ្ឋផងដែរ ដើម្បីបកស្រាយ និងប្រមូលបញ្ហាពាក់ព័ន្ធនឹងដំណើរវិវត្តន៍នៃសំណុំរឿងកំពុងមានទំនាស់។ អ្នកនាំពាក្យរូបនេះ បានបន្ថែមថា ជាគោលការណ៍ គ្រប់ទំនាស់ដែលក្រសួងដែនដីបានទទួល ត្រូវតែមានដំណោះស្រាយ គ្រាន់តែត្រូវការពេលវេលាបន្តិច និងអាស្រ័យលើឆន្ទះដោះស្រាយរបស់ភាគីទំនាស់ប៉ុណ្ណោះ។
តំណាងពលរដ្ឋរងគ្រោះម្នាក់ទៀត គឺអ្នកស្រី ផាវ ញើង បានអះអាងថា ពលរដ្ឋបានទទួលរួចហើយ លេខទំនាក់ទំនងរបស់មន្រ្តីក្រសួងដែនដី ហើយបានដាក់ក្តីសង្ឃឹមខ្លាំងទៅលើដំណោះស្រាយពី ក្រសួងដែនដី។ តំណាងពលរដ្ឋរូបនេះ ចង់បានការកំណត់ពេលវេលាជាក់លាក់ណាមួយ ពីក្រសួងដែនដី ដើម្បីចុះពិនិត្យដោះស្រាយមុនពេលដកខ្លួនវិញទៅខេត្តកោះកុងវិញ។
មន្ត្រីសម្របសម្រួលនៃអង្គការសិទ្ធិមនុស្សលីកាដូ (LICADHO) ប្រចាំខេត្តកោះកុង លោក អ៊ិន គង់ជិត បានបញ្ជាក់ថា ការឡើងទៅដាក់ញត្តិ ដល់រាជធានី របស់ពលរដ្ឋខេត្តកោះកុង គឺធ្វើឡើងបន្ទាប់ពីគ្មានដំណោះស្រាយពីថ្នាក់ឃុំ ស្រុក និងថ្នាក់ខេត្ត។ បើតាមមន្រ្តីសង្គមស៊ីវិលរូបនេះ តាំងពីខែសីហា ២០០៦ ក្រសួងកសិកម្ម បានផ្តល់ដីពីរទីតាំង ក្នុងទំហំ ៩៤០០ ហិកតា និង ៩៧០០ ហិកតា ទៅអោយក្រុមហ៊ុនស្ករអំពៅ Koh Kong Sugar និង Koh Kong Plantation ដោយមិនបានសិក្សាពីផលប៉ះពាល់ ដល់ពលរដ្ឋ ដែលបានប្រើប្រាស់ដី កន្លងមកទើបមានទំនាស់រ៉ាំរ៉ៃ មកដល់សព្វថ្ងៃ។ លោក អ៊ិន គង់ជិត បានស្នើអោយអន្តរស្ថាប័នពាក់ព័ន្ធ គួរតែដោះស្រាយជាបន្ទាប់ដោយ ការកាត់ដីមកអោយពលរដ្ឋធ្លាប់ប្រើប្រាស់ដីជាក់ស្តែងវិញ ដើម្បីរំដោះ ពលរដ្ឋមូលដ្ឋានពីបំណុលសេដ្ឋកិច្ច និងការបន្តធ្វើចំណាកស្រុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ