ជម្លោះដីធ្លីនៅខេត្តព្រះសីហនុ៖ សាលដីកាតុលាការកំពូលនៅតែបន្តអនុវត្ត ខណៈពលរដ្ឋ៦នាក់ត្រូវបានដោះលែង
ព្រះរាជអាជ្ញារងនៃខេត្តព្រះសីហនុបានឲ្យដឹងនៅថ្ងៃនេះថា ពលរដ្ឋ៦នាក់ដែលត្រូវបានចាប់ខ្លួន កាលពីល្ងាចថ្ងៃទី២៥មករាម្សិលមិញ បានទទួលសេរីភាពរបស់ខ្លួនវិញហើយនៅថ្ងៃសុក្រនេះ ខណៈសាលដីកាតុលាការកំពូលនៅតែបន្តអនុវត្តដដែល។ ពលរដ្ឋទាំង៦នាក់ ត្រូវបានចាប់ខ្លួន ដោយជាប់ទាក់ទងអំពើហិង្សាមួយ រវាងពលរដ្ឋនិងអាជ្ញាធរ ក្នុងការអនុវត្តសាលដីការបស់តុលាការកំពូល ក្នុងសំណុំដីធ្លី។
ចុះផ្សាយនៅថ្ងៃ៖
ព្រះរាជអាជ្ញារងនៃខេត្តព្រះសីហនុលោក ហួត វិចិត្រ បានគូសបញ្ជាក់ថា ការដោះលែងពលរដ្ឋទាំង៦នាក់នេះធ្វើឡើងជាមួយនឹងកិច្ចសន្យាបិទបញ្ចប់បញ្ហារវាងតុលាការខេត្តព្រះសីហនុនិងពលរដ្ឋទាំង៦នាក់។ ទោះបីជាពួកគេត្រូវបានដោះលែងក៏ដោយ តែសាលដីការបស់តុលាការកំពូលនៅបន្តអនុវត្ត ខណៈស្ថានភាពទូទៅនៅកន្លែងប៉ះទង្គិច ស្ថិតនៅភូមិគគីរ ឃុំបិទត្រាំង ស្រុកព្រៃនប់ ខេត្តព្រះសីហនុ មានសភាពស្ងប់ស្ងាត់គិតមកដល់ពេលនេះ។
សូមបញ្ជាក់ថា សាលដីការបស់តុលាការកំពូល បានកាត់ក្តីឲ្យប្រជាពលរដ្ឋជាង២០គ្រួសារ ចាញ់លោកឧកញ៉ាម្នាក់នៅក្នុងជម្លោះដីធ្លីជាង៧០ហិចតា។ ប៉ុន្តែប្រជាពលរដ្ឋមិនយល់ព្រមសេចក្ដីសម្រេចនេះឡើយ ទើបនាំគ្នាដុតកង់ឡាន បិទផ្លូវ និងគប់ដុំថ្ម ទៅលើសមត្ថកិច្ចចំរុះប្រដាប់ដោយខែល ដំបង និងអាវុធគ្រប់ដៃ។
ជាការកត់សម្គាល់ ហេតុការណ៍ប៉ះទង្គិចឈានដល់ការប្រើហិង្សារវាងអាជ្ញាធរ និងពលរដ្ឋនេះ បានបណ្ដាលឲ្យមានការរិះគន់ទៅលើចំណាត់ការរបស់អាជ្ញាធរ។ លោកស្រី ជាប សុធារី មន្រ្តីសម្របសម្រួលសមាគមអាដហុកប្រចាំខេត្តព្រះសីហនុ បានប្រៀបប្រដូចស្ថានការណ៍នេះទៅនឹងសមរភូមិមួយ ដែលមានការត្រៀមប្រយុទ្ធទាំងសងខាង។ ប៉ុន្តែអាជ្ញាធរបានថ្លែងការពារថា ខ្លួនក៏បានក្លាយជាជនរងគ្រោះដែរ តាមរយៈសកម្មភាពពលរដ្ឋបណ្ដាលឲ្យសមត្ថកិច្ចពីរនាក់រងរបួសក្បាលនិងខូចខាតរថយន្តមួយចំនួនថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ