សេចក្តីព្រាងច្បាប់ស្តីពីអង្គការ-សមាគមត្រូវបានកែសម្រួល មុនពេលបញ្ចូនទៅរដ្ឋសភាអនុម័ត
សេចក្តីព្រាងច្បាប់ដ៏ចម្រូងចម្រាស់ស្តីពី សមាគម និងអង្គការមិនមែនរដ្ឋាភិបាល ត្រូវបានក្រសួងមហាផ្ទៃកែសម្រួលឡើងវិញ បន្ទាប់ពីមានការរិះគន់។ កំណែប្រែចុងក្រោយនៃសេចក្តីព្រាងច្បាប់នេះ ត្រូវបានអ្នកនាំពាក្យក្រសួងមហាផ្ទៃ ចាត់ទុកថា ជាកាដូមួយ ដែលផ្តល់ជូនអង្គការសង្គមស៊ីវិលជាតិនិងអន្តរជាតិ។ សេចក្តីព្រាងច្បាប់នេះ ទើបតែត្រូវបានទីស្តីការគណៈរដ្ឋមន្រ្តីអនុម័តកាលពីថ្ងៃទី៥មិថុនាកន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
យ៉ាងហោចណាស់មានមាត្រាសំខាន់ៗចំនួន២ ដែលក្រសួងមហាផ្ទៃបានកែសម្រួលឡើងវិញ ទៅលើសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាលនេះ បន្ទាប់ពីសេចក្តីព្រាងច្បាប់នេះ បានទទួលរងការរិះគន់យ៉ាងខ្លាំង។ ចំណុចទាំងពីរនោះរួមមាន ទី១ទាក់ទងទៅនឹងការចុះបញ្ជីរបស់អង្គការសមាគម និងទី២ គឺទាក់ទងទៅនឹងការធ្វើរបាយការណ៍ប្រចាំឆ្នាំរបស់អង្គការសមាគមជាតិនិងអន្តរជាតិដែលកំពុងធ្វើសកម្មភាពនៅក្នុងប្រទេសកម្ពុជា ដែលលោក ខៀវ សុភ័ក្រ អ្នកនាំពាក្យក្រសួងមហាផ្ទៃ បានចាត់ទុកថា ជាកាដូថ្មីមួយសំរាប់អង្គការសង្គមស៊ីវិលនៅក្នុងប្រទេសកម្ពុជា។
បើតាមលោក ខៀវ សុភ័ក្រ កំណែប្រែចុងក្រោយនៃមាត្រា១នៃសេចក្តីព្រាងច្បាប់នេះ គឺមិនចាំបាច់តម្រូវឱ្យអង្គការសមាគមជាតិ និងអន្តរជាតិចុះបញ្ជីឡើងវិញនៅក្រសួងមហាផ្ទៃនិងក្រសួងការបរទេសទៀតនោះទេ។ មានន័យថា អង្គការសង្គមស៊ីវិលជាតិនិងអន្តជាតិមានជាង៤ពាន់ដែលចុះបញ្ជីរួចរាល់នៅក្រសួងទាំងពីរ អាចបំពេញបេសកម្មការងាររបស់ខ្លួនដដែល។ ចំណែកឯលក្ខណ្ឌសំរាប់អង្គការសង្គមស៊ីវិលជាតិ និងអន្តរជាតិថ្មី ដែលមានបំណងមកបំពេញបេសកម្មការងារនៅកម្ពុជា ក៍មិនមានភាពស្មុគស្មាញដូចមុននេះដែរ។
ចំណែកឯ មាត្រាដែលបានចែងពីការធ្វើរបាយការណ៍ប្រចាំឆ្នាំរបស់អង្គការសង្គមស៊ីវិលវិញ ក៍មិនតម្រូវឱ្យធ្វើរបាយការណ៍មកកាន់ក្រសួងមហាផ្ទៃទៀតដែរ តែក្រសួងមហាផ្ទៃបានស្នើសុំច្បាប់ចម្លងមួយនៃរបាយការណ៍ប្រចាំឆ្នាំ ដែលអង្គការទាំងនោះ បានផ្ញើទៅកាន់ប្រទេសម្ចាស់ជំនួយប៉ុណ្ណោះ។
សេចក្តីព្រាងច្បាប់ស្តីពីសមាគមនិងអង្គការមិនមែនរដ្ឋាភិបាលដែលតាក់តែងឡើងដោយក្រសួងមហាផ្ទៃនេះ រួមមាន៩ជំពូក និង៣៩មាត្រា ត្រូវបានទីស្តីការគណៈរដ្ឋមន្រ្តីពិភាក្សានិងអនុម័តកាលពីថ្ងៃទី៥មិថុនាកន្លងទៅ។ សេចក្តីព្រាងច្បាប់នេះ ធ្វើឡើងក្នុងបំណងធានាការពារសិទ្ធិសេរីភាព ក្នុងការបង្កើតសមាគម និងអង្គការមិនមែនរដ្ឋាភិបាលនៅកម្ពុជា ដើម្បីការពារផលប្រយោជន៍ស្របច្បាប់របស់ខ្លួន និងការពារផលប្រយោជន៍សាធារណៈ ។ ប៉ុន្តែក្រុមអង្គការសង្គមស៊ីវិលជាតិ និងអន្តរជាតិ បានរិះគន់ទៅលើសេចក្តីព្រាងច្បាប់នេះយ៉ាងខ្លាំង និងបានចាត់ទុកថា ច្បាប់នេះ នឹងកាត់បន្ថយសកម្មភាពការងាររបស់អង្គការសង្គមស៊ីវិលជាតិនិងអន្តរជាតិ ហើយអង្គការអន្តរជាតិមួយចំនួន អាចនឹងឈានទៅបិទការិយាល័យរបស់ខ្លួននៅកម្ពុជាទៀតផង។
លោក សុន ឆៃ តំណាងរាស្រ្តគណបក្សសង្រ្គោះជាតិ បានបញ្ជាក់ថា គណបក្សប្រឆាំង នឹងមិនចូលរួមអនុម័តសេចក្តីព្រាងច្បាប់នេះទេ បើសេចក្តីព្រាងច្បាប់នេះ មិនអនុញ្ញាតឲ្យមានការពិភាក្សាដោយបើកទូលាយទៀតនោះ។ ចំណែកឯលោក ឈាង វុន អ្នកនាំពាក្យរដ្ឋសភាជាតិបានបញ្ជាក់ថា រដ្ឋសភានៅមិនទាន់កំណត់ពេលអនុម័តសេចក្តីព្រាងច្បាប់នេះនៅឡើយទេ បន្ទាប់ពីដឹងថា សេចក្តីព្រាងច្បាប់នេះ ត្រូវបានបញ្ជូនត្រលប់ទៅក្រសួងមហាផ្ទៃវិញ ដើម្បីកែសម្រួល។
បើតាមព័ត៌មានចុងក្រោយ សេចក្តីព្រាងច្បាប់នេះ បានកែសម្រួលរួចរាល់ហើយ នឹងត្រៀមបញ្ជូនទៅទីស្តីការគណៈរដ្ឋមន្រ្តីជាថ្មី មុនពេលបញ្ជូនទៅឱ្យរដ្ឋសភាពិភាក្សានិងអនុម័ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ