ក្រសួងវប្បធម៌ គ្រោងរៀបចំក្រមប្រតិបត្តិ សម្រាប់អ្នកនិពន្ធទំនុកច្រៀង
ក្រសួងវប្បធម៌និងវិចិត្រសិល្បៈ គ្រោងរៀបចំឲ្យមានក្រមប្រតិបត្តិសម្រាប់អ្នកនិពន្ធទំនុកច្រៀងនៅកម្ពុជា។ គម្រោងនេះត្រូវបានលើកឡើងនៅក្នុងជំនួបមួយរវាងតំណាងក្រសួងវប្បធម៌ និងអ្នកនិពន្ធ ព្រមទាំងតំណាងក្រុមហ៊ុនផលិតចម្រៀង នៅព្រឹកថ្ងៃពុធនេះ។ សម្រាប់ក្រសួងវប្បធម៌ ការបង្កើតក្រមប្រតិបត្តិសម្រាប់អ្នកនិពន្ធទំនុកច្រៀង មានគោលដៅលើកស្ទួយវប្បធម៌ខ្មែរក្នុងវិស័យសិល្បៈចម្រៀង ក៏ដូចជារំលឹកដាស់តឿនដល់អ្នកនិពន្ធអំពីសីលធម៌ក្នុងការតែងនិពន្ធ។
ចុះផ្សាយនៅថ្ងៃ៖
ស្តាប់ - ០១:៥៤
អ្នកនិពន្ធ និងតំណាងក្រុមហ៊ុនផលិតចម្រៀងនៅកម្ពុជាប្រមាណ៥០នាក់ ត្រូវបានក្រសួងវប្បធម៌និងវិចិត្រសិល្បៈ កោះហៅទៅដុះក្អែលនៅថ្ងៃពុធនេះ បន្ទាប់ពីមានការចេញផ្សាយបទចម្រៀងគ្មានសីលធម៌ប៉ុន្មានបទកាលពីដើមខែកក្កដា។ នៅក្នុងជំនួបនេះ ទាំងអ្នកនិពន្ធ តំណាងក្រុមហ៊ុនផលិតចម្រៀង ព្រមទាំងក្រសួងវប្បធម៌ បានផ្លាស់ប្ដូរយោបល់និងចំណេះដឹងអំពីការតែងនិពន្ធបទចម្រៀង ការប្រើប្រាស់ពាក្យពេចន៍ឃ្លោងឃ្លានៅក្នុងទំនុកច្រៀង ធ្វើយ៉ាងណាឲ្យសមស្របទៅនឹងវប្បធម៌ប្រពៃណីខ្មែរ។
ក្រៅពីនេះ អង្គប្រជុំក៏បានលើកឡើងផងដែរអំពីការពិនិត្យលើស្នាដៃចម្រៀងជាមុនសិន មុននឹងអនុញ្ញាតឲ្យចេញផ្សាយ។ ប៉ុន្តែតំណាងក្រសួងបានលើកឡើងថា ការពិនិត្យស្នាដៃជាមុនដូច្នេះ គឺជាការរំលោភលើសេរីភាពនៃគំនិតច្នៃប្រឌិត ក៏ដូចជាជំនាញវិជ្ជាជីវៈ របស់អ្នកនិពន្ធនិងសិល្បករ។ ក្រសួងសម្រេចអនុវត្តតាមគោលការណ៍ដែលមានស្រាប់ គឺគ្មានការឆ្លងស្នាដៃជាមុនឡើយ សម្រាប់បទចម្រៀងមានតែសំឡេង។ ប៉ុន្តែក្រសួងរក្សាសិទ្ធិណែនាំដល់សិល្បករ និងហាមប្រាមដល់ស្នាដៃណាដែលចេញផ្សាយទៅហើយ មានការប៉ះពាល់ដល់ភាពថ្លៃថ្នូរនិងសីលធម៌សង្គម។
លើសពីនេះ ដើម្បីលើកស្ទួយវប្បធម៌ខ្មែរក្នុងវិស័យសិល្បៈចម្រៀង ក្រសួងវប្បធម៌និងវិចិត្រសិល្បៈ គ្រោងរៀបចំឲ្យមានក្រមសីលធម៌ និងក្រមប្រតិបត្តិសម្រាប់អ្នកនិពន្ធទំនុកច្រៀងនៅកម្ពុជា។ សម្រាប់ក្រសួងវប្បធម៌ ក្រមប្រតិបត្តិសម្រាប់អ្នកនិពន្ធទំនុកច្រៀង មិនត្រឹមតែអាចលើកស្ទួយវប្បធម៌ខ្មែរក្នុងវិស័យសិល្បៈចម្រៀងប៉ុណ្ណោះទេ វាក៏រួមចំណែករំលឹកដាស់តឿនដល់អ្នកនិពន្ធអំពីសីលធម៌ក្នុងការតែងនិពន្ធផងដែរ។
គួរជម្រាបជូនថា សព្វថ្ងៃនេះ ការដេញតាមទីផ្សាររបស់ផលិតកម្មផលិតចម្រៀង កំពុងតែធ្វើឲ្យគុណភាពនៃបទចម្រៀងធ្លាក់ចុះ។ អ្នកនិពន្ធទំនុកច្រៀងមួយចំនួនដែលមានគ្រឹះនៃការតែងនិពន្ធមិនសូវរឹងមាំ មិនបានយកចិត្តទុកដាក់ខ្លាំងអំពីខ្លឹមសារនៃបទចម្រៀងរបស់ខ្លួនទេ។ ទំនុកច្រៀងខ្លះគ្មានសីលធម៌ ខ្លះមានខ្លឹមសារអាសអាភាស និងខ្លះទៀតគ្មានខ្លឹមសារទាល់តែសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ